28
ዔራቶ ጋዳይሲሢና ጌስቶና ካላሊ
1 «ቢሮ ዓንጎ ኬሳኒ ማዒዲኔ ጌይንታ ባካ ቦኦኪንታያንታ
ዎርቄ ሼኤሾ ቤሲያ ዓኣኔ።
2 ዓንጊ ሳዓይዳፓ ቦኦኪንቲ ጴዻኔ፤
ማዳኣቤ ጌይንታ ባካኣ ሹቺዳፓ ሼኤሺንታኔ።
3 ዓሳ ዹሞይዳ ዓኣ ባኮ ፔጋሲ ኬሳኔ፤
ዴንዲ ሳዖኮ ዴሞ ሄሊ ሻኔ ዹሞይዳ ዓኣ
ማዒዲኖ ሹጮ ኮዓኔ።
4 ዓሲ ናንጋ ቤዛፓ ሃኪ ዴንዲ
ዓሲ ሄሊ ቤቂባኣ ቤሲ ሄላኔ።
ዒኢካ ኮሺ ዔታዻ ዔቴ ቦኦካኔ፤
ሱሲዳኣ ሹላሊ ሹላሊ ዓሲዳፓ ዱማዺ ፔኤኮ ማዻኔ።
5 ሳዓ ሙኡዚም ማዓ ሃኣኮ ባቃልሳኔ፤
ዒዞኮ ጋራ ጋዓንቴ ታሚና ዓልቂ ባይቃኔ።
6 ሴኔፔሬ ጌይንታ ቦንቺንታ ሹጫ
ዒዞይዳ ዓኣ ሹጮ ባኣካፓ ጴዻኔ፤
ዒኢካ ዓኣ ዓጮይዳፓኣ ዎርቄ ጴዻኔ።
7 ዬያ ማዒዲኖ ባንሢ ዔኪ ዓኣዻ ጎይፆ
ኪላንቄያ ዔሩዋሴ፤
ሃምፑራኣ ዴንቁዋሴ።
8 ፑርቶ ቦዓ ዬኖ ባንሢ ዓኣዺያ ዓኣዹዋሴ፤
ዞቢያ ዒኢና ሃንቱዋሴ።»
9 «ዓሲ ሳዖ ቦኦካኣና ፔ ኩጮና ዓጬ ሹጮ ቡጋኔ፤
ዹኮዋ ማዢንቶ ፃጳፓ ዶይሳኔ።
10 ላሎ ቆኦቂ ኬስኮ ጎይሢ ኮሻኔ፤
ቦንቺንታያ ማዔ ማዒዲና ኬስካ ሹጮዋ ዒኢፓ ዴንቃኔ።
11 ዋኣሢ ዬያ ማዒዲኖ ባንሢ ዎቱዋጉዲ
ዎራ ዔቃ ካሮ ዲርቂ ቃዛኔ፤
ሳዖ ዴማ ዓኣቺንቲ ዓኣ ቆሎዋ ዴንቃኔ።
12 ዓካሪ፦ ዔራቶ ዓንካፓ ጴዻይ?
ማሊ ጶቂሥሢኮዋ ቤዛ ዓንካዳይ?»
13 «ዔራቶ ሼምፓ ዓኣ ማዢንታ ናንጋ ሳዖይዳ ጴዹዋሴ፤
ዒዛ ዋኣዺም ሻንቺንታቴያ ዔራይ ባኣሴ።
14 ዼኤፖ ባዞንታ ዳልጎ ዋኣፆንታ
‹ዔራቶ ኑ ኮራ ባኣሴ› ጋዓኔ።
15 ዔራቶ ጌኤሺ ዎርቄና ሻንቂንቱዋሴ፤
ዒዛ፦ ‹ያኣዼ ቢራ ዔካንዳኔ› ጌይንቱዋሴ።
16 ዔራቶ፦ ዖፔሬ ጌይንታ ዎርቆንታ ሜሬጊዴንታ
ሴንፔሬ ጌይንታ ሚዛጶ ሹጮፓኣ ባሼ ቦንቺንታያኬ።
17 ዎርቄንታ ጌኤሺ ሌማሌኤሼያ ዒዞና ቤቃያቱዋሴ፤
ዎርቄፓ ኮሾና ፓልሞናኣ ላኣሚንታያቱዋሴ።
18 ዔራቶ ኪቤና ዓልማዞ ጌይንታ ባኮፓ ቢያ ባሼኬ፤
ዞቄ ሚዛጶ ሹጮፓኣ ዑሣ ባሻያኬ።
19 ‹ቶጳዚዮኔ› ጌይንታ ዒቶጲያኮ ሚዛጶ ሹጫ ዒዞ ሄሉዋሴ፤
ኮሺ ጌኤሺ ማዔ ዎርቄናኣ ማላቲንቱዋሴ።
20 ሂዴቶ፦ ዔራቶ ዓንካፓ ሙካይ?
ማሊ ጶቂሥሢያ ዎካፓ ጴዻይ?»
21 «ሼምፓ ዓኣ ማዢንቲ ቢያፓ ዒዛ ዓኣሺንቴያኬ፤
ጫሪንጫ ባራና ካፓታዖ ኮይ ዴንቁዋያኬ።
22 ባይሲንታና ሃይቢና፦
‹ኑ ዒዞ ዛሎ ዔራሢ
ኬኤዚንታ ሃይሴና ሌሊኬ› ጋዓኔ።»
23 «ዔራቶ ባንሢ ዔኪ ዓኣዻ ጎይፆና
ዒዛ ናንጋ ቤዞዋ ፆኦሲ ሌሊ ዔራኔ።
24 ዓይጎሮ ጌዔቴ ፆኦሲ ሳዖኮ ጋፖ ሄላንዳኣና ቢያ ዛጋኔ፤
ጫሪንጮኮዋ ዴማ ዓኣ ባኮ ቢያ ዴንቃኔ።
25 ዢባሮኮዋ ዎልቆ ዒ ማዤ ዎዶና
ዳልጎ ባዞ ዋኣፆዋ ዒ ማኬ ዎዶና
26 ዒሮና ጉጉንፆናም
ዳምቦ ዒ ጊኢጊሼ ዎዶና
27 ፆኦሲ ዔራቶ ዛጌኔ፤
ቦንቺሲ ዼጊሴኔ፤
ማሂ ማሂያ ዛጊያ ዶዲሼኔ።»
28 «ዒማና ፆኦሲ ዓሲም፦
‹ዓካሪ ዔራቶ ጌይሢ ፆኦሲ ዒጊጪሢኬ፤
ማሊ ጶቂሥሢ ጌይሢያ ፑርቱሞፓ ሃኪሢኬ› » ጌዔኔ። ዓይኑ. 111፡10፤ ዒሲ. 1፡7፤ 9፡10።