14
1 «ዓሲኮ ናንጎ ሌዖማ ቃሚሢኬ፤
ያዺታቴያ ሜታ ኩሜያኬ።
2 ቡኒጉዲ ጴዻዖ ቤዞማና ዲኢናኔ፤
ሺቢጉዲ ሚርጌ ኔጉዋዖ ቤዛፓ ዑኬና ሺራኔ።
3 ዓካሪ ዬያጉዴ ዓሢ ኔ ኮጲሲ ሺራንዳያዳ?
ኔ ቤርቶ ዎጌም ኔ ሺኢሻንዳያዳ?
4 ዒኢቴ ባኣዚፓ ጌኤሺ ባኣዚ ዴንቃኒ ዳንዳዓ
ዓይጎ ዓሲያኣ ባኣሴ።
5 ዓሲኮ ናንጊ ሌዔ ዔርቲ ጌሢንቴያኬ፤
ናንጋ ዓጊናኣ ኔ ቤርታ ፓይዲንቴያኬ፤
ኔ ናንጋንዳጉዲ ጌሤማፓ ዑሣ ዓኣዻይ ባኣሴ።
6 ሚኢሾም ጌይ ማዻሢ ማዻ ኬሎ ጋፒሲ ሃውሻሢጉዲ
ዓሲያ ፔኤኮ ላቢፆ ዎዶይዳ ዎዛዻንዳጉዲ ጊቢ ዳንዳዔ።»
7 «ቲቂንቴ ሚሢ ዱርሚኮታዖ
ሃጋ ማዓንዳ ዎዛ ዓኣኔ፤
ዎይቲ ጌዔቴ ላሚ ቶሻኒና
ካኣፒ ኬሳኒ ዳንዳዓሢሮኬ።
8 ዎዚ ፃጳ ሳዖ ዴማ ጋርቼቴያ፤
ሃሣ ዱርማ ዓጮ ዴማ ዎዔቴያ
9 ሳዓ ዎዒ ዴንቄቴ ጊንሣ ቶሻኔ፤
ሃጊ ቱቱኮና ሚሢጉዲ ካኣፒ ኬሳኔ።
10 ዓሲ ጋዓንቴ ሃይቃዖ ባኣያ ማዓኔ፤
ዒ ሃይቄስካፓ ማይ ዓንካዳይ?»
11 «ዴዔ ዋኣሢ ሱኡሌና ዔቂ ጋፓሢጉዲ
ዎርዚ ዋኣሢያ ሚጫሢጉዲ
12 ዬያጉዲ ዓሲያኣ ሃይቄስካፓ ጊንሣ ማዑዋሴ፤
ጫሪንጫኣ ባይቃንዳያ ሄላንዳኣና ጴጩዋሴ፤
ጊንዓስካፓኣ ዔቁዋሴ።»
13 «ሄኤዶ ኔ ታና ዱኡፓ ዓኣቼያታቶ!
ዻጋ ኔኤኮ ጋፓንዳያ ሄላንዳኣና ኔ ታና ዓኣቼያታቶ!
ኬሊ ኔ ታኣም ሜንሢ ማሌያታቴ ዓይጎ!
14 ዓሲ ሃይቄስካፓ ጊንሣ
ሼምፔና ናንጋኒ ዳንዳዓ?
ጊንሣ ታና ዓካሲ ኮሾንዶ ዎዳ ሄላንዳኣና
ሃያ ታኣኮ ማሹምባሢ ናንጎኮ ጋፒንፆ
ጊቢ ታ ካፓንዳኔ።
15 ዬኖ ዎዶና ኔ ታና ዔኤላንዳኔ፤
ታኣኒያ ኔኤም ዬሃንዳኔ፤
ኔኤኮ ማዢንቲ ማዔሢ፥ ታና ኔ ዛጋኒ ጶቂሣንዳኔ።
16 ሃሢ ኔ ታኣኮ ሃንቲፆ ቢያ ዛጋኔ፤
ጋዓንቴ ጎሞ ኔ ታኣኮ ዓርቁዋሴ።»
17 «ዔኤቢ ጋርካ ቱኪንቲ ኬኤሪንታ ቡኡራጉዲ
ዻቢንቶ ቢያ ታኣኮ ኔ ሺኢሻንዳኔ፤
ጎሞዋ ታኣኮ ኔ ባይዛንዳኔ።
18 ሃኖ ዓጮይዳ ጋዓንቴ
ዹኬ ዲኢሞ ዶዓሢጉዲ
ዼኤፖ ሹጫ ቤዛፓ ቡምባላሢጉዲ
19 ዋኣሢ ሹቺ ቦኦኪ ቦኦኪ ኩርሳሢጉዲ፤
ሃሣ ዼኤፒ ዒርዚያ ሳዖ ዛራሢጉዲ
ኔኤኒያ ላቤ ዓሲኮ ዬያጉዲ ሃጊ ማዓንዳ ዎዞ ባይዛኔ።
20 ኔኤኮ ዎልቃ ናንጊና ዒዛይዳ ዶዳኔ፤
ዒዚያ ባኣያ ማዓኔ፤
ዒዛኮ ማላሢ ኔ ላኣሚ ኔ ቤርታፓ ባይዛኔ።
21 ዒዛኮ ናኣታ ቦንቾ ዴንቄቴያ ዒ ዔሩዋሴ፤
ዔያታ ዻውሲንቴቴያ ዒ ዴንቁዋሴ።
22 ዒዛም ዒዛ ዑፆ ሜታሢ ዔርታኔ፤
ዒዚ ፔ ቶኦኮ ሜታሢሮ ሌሊ ዬኤካኔ።»