30
ዒስራዔኤሌ ዴራ ማዒ ሙካንዳያ ማዒፃ ኬኤዚንቴሢ
1 ዒስራዔኤሌኮ ፆኦሲ ማዔ ናንጊና ናንጋ ጎዳ ታኣም ሂዚ ጌይ ኬኤዜኔ፤ ዒስራዔኤሌ ፆኦሲ ማዔ ናንጊና ናንጋ ጎዳሢ ሂዚ ጋዓኔ፦ 2 «ታ ኔኤም ኬኤዜ ባኮ ቢያ ማፃኣፔይዳ ፃኣፔ። 3 ታኣኮ ዴሮ ዒስራዔኤሌንታ ዪሁዳ ዴሮንታ ጊንሣ ማሂ ታኣኒ ዔኪ ዬዓንዳ ዎዳ ዑኬኔ፤ ዔያቶኮ ቤርታኣ ዓዶንሢም ታኣኒ ዒንጌ ዓጮ ታ ዔያቶ ማሃንዳኔ፤ ዔያታ ጊንሣ ዬያ ዓጮ ፔ ዓጪ ማሃንዳኔ፤ ዬያ ጌዔሢ ታና፥ ናንጊና ናንጋ ጎዳኬ።»
4 ናንጊና ናንጋ ጎዳ ዒስራዔኤሌና ዪሁዳ ዴሮናም ሂዚ ጋዓኔ፦
5 «ኮሺ ዑኢሲቱዋንቴ ካራ ባይቂ
ዒጊቹሞና ጎጋይቂሢ ዑኡሲ ታኣኒ ዋይዛኔ፤
6 ሂንዳ ጫክ ጌይ ማሉዋቴ!
ዓቲንቄ ባኒ ናይ ሾዓ?
ሂዳዖ ዓቲንቃ ቢያ ሾሾዓ ላኣሊጉዲ
ፔኤኮ ኩጮና ጎጶ ዓርቂ ዓኣንቴ ታ ዛጋሢ ዎይቲዳይ?
ፔቴ ፔቴ ዓሶኮ ዓኣፖ ካራ ዎይቲ ቦኦሬይ?
7 ዬና ኬላ ዎዚ ሜታሳያ ማዓንዳይ!
ዬኖጉዴ ኬሊ ሜሌ ባኣያ ማዓንዳኔ፤
ያይቆኦቤም ዬይ ሜቶ ዎዴ ማዓንዳኔ፤
ያዺ ማዔቴያ ዔያታ ዬያ ዋኣዪፃፓ ቢያ ዻቃንዳኔ።»
8 ቢያ ባኮ ማዤ ጎዳ ሂዚ ጋዓኔ፦ «ዬኖ ኬላ ሄላኣና ታኣኮ ዴሮኮ ባቃና ዓጊ ዎይሦ ቃምባሮ ታኣኒ ሜንሣንዳኔ፤ ዔያታ ቱኪንቴ ካኖ ቢራቶዋ ታኣኒ ዱኡዛንዳኔ፤ ዬካፓ ዔያታ ሜሌ ፃንጎ ማዔ ዴሮም ዓይሌ ማዒ ዎርቃዓኬ፤ 9 ጋዓንቴ ታና፥ ዔያቶኮ ፆኦዛሢም ዔያታ ዚጋንዳኔ፤ ታኣኒ ካኣቱሞ ዖይቶይዳ ጌሣ፥ ዳውቴ ዜርፆ ማዔ ዔያቶኮ ካኣቲም ዔያታ ዎርቃንዳኔ።»
10 «ታኣም ማዻ፥ ያይቆኦቤ ዒጊጪፖ፤
ዒስራዔኤሌ ዲቃቲፖ፤
ታኣኒ ኔና ሃኬ ማዔ ዓጮይዳፓ
ኔኤኮ ዜርፆዋ ዲዒንቲ ዴንዲ ዓኣ ሳዖይዳፓ ዓውሲ ዔኪ ማሃንዳኔ፤
ያይቆኦቤ ማዒ ሙኪ ሂርጋ ባኣያ ኮሺ ናንጊ ናንጋንዳኔ፤
ዒዛ ዒጊቻንዳ ባኣዚያ ባኣሴ።
11 ታኣኒ ታኣሮ ዒንሢና ዎላ ማዒ ዒንሢ ዓውሳንዳኔ፤
ታኣኒ ዒንሢ ዜርቂ ዔያቶ ባኣኮ ዳኬ ዴሮ ታኣኒ ባይዛንዳኔ፤
ዒንሢ ጋዓንቴ ታኣኒ ባይዛዓኬ፤
ያዺ ማዔቴያ ሜቶ ታ ዒንሢዳ ዓጉዋ ሃሻዓኬ፤
ታ ዒንሢዳ ሜቶ ዓጋንዳሢ ዒንሢ ዻቤ ጎይፆጉዴያኬ፤
ዬያ ጌዔሢ ታና፥ ናንጊና ናንጋ ጎዳኬ።» 30፡11 ዔር. 46፡27-28።
12 ናንጊና ናንጋ ጎዳ ሂዚ ጋዓኔ፦
«ኪፃ ዒንሢኮ ፓፁዋያ
ዒንሢ ጋፒ ማኣሳኔኔ።
13 ዒንሢ ዛሎ ሞኦታንዳ ዓሲ ባኣሴ፤
ዒንሢ ኪፆኮ ዼኤሻኣ ጴዻዓኬ፤
ዒንሢ ዻቃዓኬ።
14 ዒንሢ ማኣዲ ዖላ ዓሳ ቢያ ዒንሢ ዋሌኔ፤
ዔያታ ዒንሢ ኮዑዋሴ፤
ጎማ ዒንሢኮ ዺቢ፤
ፑርቱማኣ ዒንሢኮ ዑሣ ዓኣዼ ሚርጌሢሮ
ታ ዒንሢ ታኣኮ ሞርኬጉዲ ጳርቄኔ፤
ሚጪንቱዋዖ ታ ዒንሢዳ ሜቶ ዓጌኔ።
15 ጎማ ዒንሢኮ ዺቢ፤
ፑርቱማ ዒንሢኮ ዑሣ ዓኣዼ ሚርጌሢሮ
ፓፃንዳ ካራ ዒንሢ ባኣሴ፤
ዬያሮ ዒንሢኮ ኪፆ ዛሎ ጉንዱሚፖቴ፤
ታኣኒ ዬያይዲ ዒንሢ ሜቶይዳ ዓጋንዳኔ።
16 ጋዓንቴ ጋኣሺ ዒንሢ ሙዔ ዓሳ ቢያ
ዔያታኣ ፔኤሮ ጋኣሺንቲ ሙይንታንዳኔ፤
ዒንሢኮ ሞርካ ቢያ ዲዒንቲ ዔውታንዳኔ፤
ዒንሢ ቡራ ዓሳ ቢያ ቡሪንታንዳኔ።
ዒንሢዳፓ ሳሪ ዔቦ ዔኬ ዓሳ ቢያ
ዒማይዲ ሳሪንቲ ዔውታያ ማዓንዳኔ።
17 ዒንሢኮ ሞርካ፦ ‹ፂዮኔ ኬኤሪንቲ ዓቴኔ፤
ዒዞም ኮሺ ባኣዚ ማዻያኣ ባኣሴ› ጌዔቴያ፥
ታኣኒ ጊንሣ ዒንሢኮ ዒቢሎ ማሃንዳኔ፤
ኪፆዋ ታ ዒንሢኮ ፓፂሳንዳኔ፤
ዬያ ጌዔሢ ታና፥ ናንጊና ናንጋ ጎዳኬ።»
18 ናንጊና ናንጋ ጎዳ ሂዚ ጋዓኔ፦
«ዒስራዔኤሌ ናኣቶኮ ማኣሮ ጊንሣ ታኣኒ ማዣንዳኔ፤
ፔቴ ፔቴ ማኣሮ ታኣኒ ሚጪንቲ ማኣራንዳኔ፤
ዬሩሳላሜ ካታማ ላሚ ጊንሣ ማዢንታንዳኔ፤
ካኣቱሞ ማኣራ ጊንሣ ሚናኣ ቤዛ ማዢንታንዳኔ።
19 ዒኢካ ናንጋ ዴራ ቢያ
ጋላታ ዓይኑሞ ዓይናዻንዳኔ፤
ዎዛናኣ ዒሊሻንዳኔ፤
ታ ዔያቶ ዺዺቢሻንዳኔ፥ ፓይዳ ዔያቶኮ ዻካዓኬ፤
ታ ዔያቶ ቦንቺሳንዳኔ፤ ዬካፓ ዔያታ ቦሂንታዓኬ።
20 ዔያቶኮ ናኣታ ቤርታኣ ዓዶንሢጉዲ ዒጊጪንቲ ናንጋንዳኔ፤
ዔያታ ዎላ ናንጋ ናንጋኣ ታ ቤርታ ዶዲ ማዓንዳኔ፤
ዔያቶ ሄርቂ ዎይሣ ዓሶ ቢያ ታኣኒ ሜቶይዳ ዓጋንዳኔ።
21 ዔያቶኮ ዒጊኒ ዔያቶ ባኣካፓ ዔቂ
ዔያቶኮ ሱኡጌ ማዓንዳኔ፤
ታኣኒ ታኣሮ ዒዛ ዔኪ ዬዓንዳሢሮ ታ ባንሢ ዒዚ ዑካንዳኔ፤
ያዺ ማዒባኣቴ ዖኦኒ ጫርቂ ዑካኒ ዳንዳዓይ?
22 ዒንሢ ታ ዴሬ ማዓንዳኔ፤
ታኣኒያ ዔያቶኮ ፆኦሲ ማዓንዳኔ፤
ዬያ ጌዔሢ ታና፥ ናንጊና ናንጋ ጎዳኬ።»
23 ዓልጎ ዢባሬጉዲ ማዔ፥ ጎዳኮ ዻጋ ዶዲ ዢባሬጉዲ ዢባርሺ ፑርቶ ዓሶ ዑፃ ዬዓንዳኔ። 24 ናንጊና ናንጋ ጎዳኮ ዼኤፖ ዻጋ ማዻኒ ማሌ ባኮ ማዺ ኩንሡዋዖ ጊንሣ ማዓዓኬ፤ ዬይ ዎዳ ሄላዛ ዴራ ፔኤሮ ዬያ ቢያ ፔጌና ዔራንዳኔ።