3
1 Ked lu kamatchi, lappun simbin chi kila Judio lù? Ya lappun bo simbin chi lasogyatan? 2 Ngim ha katuttuwaala, achu simbin chi kila-Judio! Umula, chicha langipuɏangan Apudyus si ugudla. 3 Ngim lu awatlaʼn awed cha uchum un Judioʼn achipuncha mapiyeɏ, piola kamman un uguchon un achipun bo si Apudyus mapiyeɏan? 4 Chakampun! Ti si Apudyus, ulay lu lantuntulli cha losan un tagu, achipun makwa un mantuntulli si Apudyus. Ti ha liigili si ugudla, kalala,
“Taplu mipaila un tuttuwa cha losan un ibyegam ya mangɏogka si
mangichiɏuman cha tagu kan sika.”* 3:4 Psalm 51:4
5 Ngim lu ha kilalawwing taku ipailala kilalintog Apudyus, himma kalan taku? Chakampun kamman un lalintog si Apudyus lu sumanga ya chusaola chitaku? (Ha man-uugudku ked kopyan chi tagu.) 6 Chakampun! Ti lu achipun lalintog si Apudyus, himma in-ilola un manguis kan cha losan un tagu si lubung.
7 Ngim lu gapu si lantuntulliyak, mipaila kilatuttuwaan Apudyus ya kilachayawla, puggey un machusaak pay laing un osaʼn malagbyasuɏ? 8 Ya puggey un achipun taku koon cha lawwing taplu awed iloswalaʼn bibiɏu! Tuttuwa un awed cha mamabpabyasuɏ kan sakon, ked pabyasuɏolak un sakon chi langug-uggud si alla. Kalintogelaʼn machusacha.
Losan Un Tagu Makabyasuɏ
(1Jn. 1:8-10)
9 Himma ilola lù? Ha piola kamman un ibyega, labibbiɏu kasasaedmiʼn Judio lu cha Gentil? Lai! Chakampun si kamatchi! Ti lagamputku imbyega un man-iisuʼn iturayan chi byasuɏ cha losan un tagu, Judio man willu Gentil. 10 Ti kalan chi liigiliʼn ugud Apudyus,
“Lappun tagu si lalintog, ulay ossaan.
11 Ked lappun ossaan si makaawat mipanggop kan Apudyus,
ya lappun mangit kan Siya.
12 Lan-awichencha losan si Apudyus, ya losan cha lambyalin lawwing,
lappun ulay ossaan un mangwa si bibiɏu.† 3:12 v. 10-12, Psalm 14:1-3, 53:1-3
13 Ha tupokcha isun chi kabbuktan un lobon, mangkalawwing un tilutuli
ug-uggudcha. Ya isun chi gitaʼn chi uɏog un umtoy cha ugud
un ibungangay chi tupokcha.‡ 3:13 Psalm 140:3
14 Ya pasig eɏaweg ya mampait cha ugudcha,
kan cha asintatagucha.§ 3:14 Psalm 10:7
15 Ya alistucha boʼn mamaligat
ya mamatoy si asintatagucha.
16 Ya ulay siluʼn ayancha,
awed yam-aloncha ya guluwoncha cha tagu.
17 Lappun akit somsomokcha
un tumimpuyug kan cha uchum un tagu,* 3:17 Isaiah 59:7-8
18 ya lappun akit ogyatcha kan Apudyus.Ӡ 3:18 Psalm 36:1
19 Ked chitaku, ammu taku un cha losan un liigili un lintog, para kan cha Judio un mamangchon si lintogla. Ked gapu si hachiʼn lintog, lappun mallasun chi ulay siluʼn tagu un inggew utla pita un achipun Apudyus chusaon, ti lappun achi lakabyasuɏ. 20 Ti lappun tagù mapalintog si sangwalan Apudyus gapu si malungpaɏala si lintog, ti ha simbin chi lintog ipakaammula si tagu un lakabyasuɏcha.
Ha Mangibilangan Apudyus Si Tagu Lalintog Kan Siya
(Gal. 3:1-14; Eph. 2:1-10)
21 Ngim si sala, impailan Apudyus chi koola un mangibilang si tagu un lalintog. Chakampun un malungpaɏan si lintog, ulay lu siya pilaloklokan chi lintog Moses ya cha propeta. 22 Ti ha mangibilangan Apudyus si tagu un lalintog, ked gapu si pammaticha kan Jesu Kristu. Ti lappun laksigon Apudyus si tagu, Judio man willu Gentil. 23 Losan un tagu lakabyasuɏ, ked lappun makakopya si machayawan Apudyus.‡ 3:23 Ha piolaʼn uguchon si Greek, losan taku lakabyasuɏ ked adchayuwan taku si ummallamungan Apudyus 24 Ngim gapu si kachegula un insagutla kan chitaku un libli, ibilang Apudyus chitaku lalintog gapu si killingwan Jesu Kristu un lansaka kan chitaku. 25 Ti inchuyan Apudyus si Jesu Kristu un matoy, libukbuk chi chaɏala ta siya mamayedla kan cha byasuɏn cha tagu, ked cha losan un mamati kan siya mapakawan cha byasuɏcha. Hachi killingwan Apudyus ta mangipain-ala si kilalintogla. Ked inggala si sala, ilan-alusala lakabyasuɏan cha tagu ti kacheguwala chitaku. 26 Ngim si sala, impailala un lalintog si Apudyus si ustuʼn mangkokopyala un manchusa si byasuɏ, ya ibilangla lalintog cha losan un mamati kan Jesus.
27 Ked himma makwa un ipaspasweɏ taku? Lappun! Chakampun un siyad ipasweɏ taku malungpaɏan taku si lintog, ti gapu si pammati. 28 Ked maila un ha mangibilangan Apudyus si tagu lalintog, ked gapu si lamatiyala kan Jesu Kristu chakampun si lalungpaɏala si lintog. 29 Ti si Apudyus, chakampun un Apudyus cha Judio abus ti Apudyus bo cha Gentil. 30 Ti os-ossaan si Apudyus, ked man-iisuwola mangibilangala kan cha Judio ya cha Gentil un lalintog gapu si pammaticha. 31 Ked iwalin taku kamma lintog gapu si allaʼn pammati? Lai, ngim ipaila taku tuttuwaʼn pion chi lintog un uguchon.