1 Ot kalala bo kan chicha, “Katuttuwaan chi ibyegak kan chikayu. Awed cha uchum kan chikayu si sala un achipuncha matoy inggala mailacha kilabyelin Apudyus si mampangatala.”

2 Lummaus pu olom eɏgew, ilayagen Jesus cha Peter, James ya John ot illiyoyla chicha intalin si osaʼn mantaklang un bilig. Udchi, summabyali tullong Jesus si sangwalancha, 3 ya malilisiling chi silupla ya mamputilak un lappun mangiyisuwan si kilaputilakla si allaʼn lubung.

4 Ot lummoswa cha Elijah kan Moses ot makaug-uggudcha kan Jesus. 5 Ot kalan Peter kan Jesus, “Mistulu, bibiɏu ta awed kami utla. Mangwa kami si tiɏun sigey. Mangkuwam osa, mangkuwan Moses osa ya mangkuwan Elijah bo osa.” 6 Imbyegala hachi ti lappun ammula si uguchola gapu ta amod chi ogyatcha.

7 Ot si hachi, tilalikchungan chi libuu chicha, ot ladngeɏcha ginga un lampeɏpu si libuu un kalala, “Allaya Alakkuʼn tagtagopok. Chongɏonyu siya!” 8 Kakmacha lanlangɏanga, lappun intullongcha si uchum ngim abus si Jesus.

9 Ot lan-osogcha pun si hachiʼn bilig, bililin Jesus chicha un kalala, “Achipunyu ibyegbyega intullongyu kan cha uchum inggala Sakon un Alak chi Tagu si awi ked umuli matagu kasin.”

10 Ot tiluttuwacha bilinla, ngim lan-asi-imuscha lu silu piolaʼn uguchon chi umuli matagu kasin. 11 Ot ilimuscha kan siya, “Puggey cha mimistulun chi lintog ibyega un masapuɏʼn umun-ula umali si Elijah lu si Kristu.”

12-13 Summongbyat si Jesus, “Tuttuwa un ummula si Elijah ummali ta isagalala cha tagu si umaliyak. Tuttuwa ibyegak kan chikayu, lagamput ummali si Elijah ked lakwa cha losan un pion cha taguʼn koon kan siya un isun chi liigili si ugud Apudyus. Ked liigili boʼn Sakon un Alak chi Tagu si awi, masapuɏʼn mapaligatalak ya maam-amsiwak bo kan cha tagu.”* 9:12-13 Miila bo si Mateo 17:13

14 Langulin pun cha Jesus si inggewan cha uchum un disipulus, intullongcha cha achuʼn taguʼn langalluɏung kan chicha. Inggew bo cha uchum un mimistulun chi lintog un lakasongsongbyat kan cha disipulus. 15 Intullong pun cha achuʼn tagu si Jesus, laschaawcha ot lalodchakcha ummoy kan siya ot pakumustaoncha. 16 Ot ilimus Jesus kan chicha, “Simma pin-ayu man-is-isikan kan chicha?”

17 Ot gumminga osaʼn leɏaki un inggew kan cha achu un tagu, un kalala, “Mistulu, inggetongku alakkuʼn leɏaki kan sika, ti ilumeɏn chi aɏan un awed kan siya. 18 Ked lu gumatong chi aɏan, ipat-ugla alak si pita. Mantetebuteb chi tupokla, mangngillongillot chi ngiponla, ya kuminkinteɏeg chi long-egla. Imbyegak kan cha disipuluslu ta peɏyawoncha aɏan un awed kan siya, ngim achipuncha makapeɏyaw.”

19 Summongbyat si Jesus kan chicha, “Chikayuʼn lappun pammatila! Atoma byeyegku un illiinggew kan chikayu ya atoma alusku kan chikayu?” Oli pun kalala si aman chi alak, “Igetongyu kan sakon chi halat un alak.”

20 Ot illiyoycha kan Jesus. Intullong pun chi aɏan si Jesus, kakmala langayaskason chi alak ot lipat-ug si pita un mambyenbyelikted ya mantetebuteb chi tupokla.

21 Ilimus Jesus si aman chi alak, “Kam-amman chi lallugiyala?”

Ot kalala, “Likabyen-og.” 22 “Iyeɏ-eɏgewla siya ichukmam si apuy ya si chelum, ta mangtoyala kan siya. Ngim lu awed makwam, kacheguwam u chikami ya tuɏungam u chikami.”

23 Kalan Jesus kan siya, “Puggey ibyega, lu makwam? Makwa losan chi koon chi tagu lu mamati.”

24 Ot kakman chi ama chilakeɏ gingala un kalala, “Oo, mamatiyak, ngim tuɏungalak ti kuɏang chi pammatik!”

25 Intullong pun Jesus cha amod un taguʼn sintotodchak un umachali, ilomeɏala aɏan, un kalala, “Sikaʼn aɏan un lampatuɏong ya langumeɏ si allaʼn alak, ibyegak kan sika lumawaka kan siya ya achika mangulin kasin.”

26 Laakikis chi aɏan ot pilatungedla langayaskason chi alak, ot lummawa. Isun chi lecheg chi alak ot achu langibyegan, “Latoy.” 27 Ngim iloglen Jesus chi imala ot bilangonla siya ot summiked.

28 Lilumlok cha Jesus ya disipulusla si osaʼn byeɏoy. Ummabuscha pun, ilimus cha disipulusla kan siya, “Pakamiggey achipun makapeɏyaw si hachiʼn aɏan?”

29 Kalan Jesus kan chicha, “Abus chi luwalu si makapeɏyaw si katchin aɏan.”

30 Ot tilelan cha Jesus chi hachiʼn ili ot langoychaʼd Galilee. Achipun Jesus pion un maammuwan chi inggewancha, 31 ti tudtudtuchuwala cha disipulusla. Kangkalala kan chicha, “Sakon un Alak chi Tagu si awi ked mipuɏangak kan cha taguʼn mamatoy kan sakon. Ngim si mikatluʼn eɏgew, umuliyak matagu kasin.” 32 Ngim achipun cha disipulusla maawatan chi piolaʼn ibyega ot ummogyatchaʼn maka-imus kan siya.

33 Gummatong cha Jesus ud Capernaum. Lilumlokcha pun si byeɏoy, ilimus Jesus kan cha disipulusla, “Simma pin-ayu man-is-isikan si chaɏan?” 34 Ngim gummilokcha ti ha pin-acha lan-is-isikan si chaɏan lu silu kangatuwan kan chicha. 35 Ot ummamuy si Jesus, ilayagela cha lasawaɏan si chuwaʼn disipulusla, ot kalala kan chicha, “Lu silu simpion un mambyalin kangatuwan kan chikayu, masapuɏʼn mambyalin kabyabyaan ya mansimbi kan cha losan un kadwala.” 36 Ilayagela osaʼn alak ot pilasikedla siya si sangwalancha. Ilaklila siya ot kalala kan chicha, 37 “Lu silu mangipotog si kabyabyaan un tagu un isun chi allaʼn alak mipagapu si pammatila kan sakon, potgola bo sakon. Ked lu silu mangipotog kan sakon, potgola bo langibuun kan sakon.”

38 Kalan John kan Jesus, “Mistulu, intullongmi osaʼn tagu un pin-a mampeɏyaw kan cha aɏan un us-useɏola ngachenlu, ot impalitmi siya ti chakampun un biɏun taku.”

39 Ngim kalan Jesus kan chicha, “Achiyu ipalit siya ti lu silu mangwa si lakaskaschaaw un useɏola ngachenku, ked achipun man-ugud si lawwing mipanggop kan sakon. 40 Ti lu silu achipun mallawwing kan chitaku ked biɏun taku. 41 Tuttuwa ibyegak kan chikayu, lu silu mamailum si chelum kan chikayu gapu ta tagu chikayu kan Kristu, tuttuwaʼn maidchen si gunggulala.”

42 “Lu silu mangmangwa si makabyasuɏan cha allaʼn kabyabyaan un taguʼn mamati kan sakon, un-ulloy chi ibitinla biletuʼn gilingan si byegangla ked lantup-ung si byeybyey. 43-44 Lu ha imayu chi gapun chi makabyasuɏanyu, lampogenyu. Ti un-ulloy chi gungsuɏ kayu un maidchen si biyeg un mallalayun lu wechewed chi imayu un mibyellu ud impiyeɏlu un mallalayun un apuy.† 9:43-44 Verse 44 ya 46, chakampun si mipati allayaʼn bersikulu si cha gettok un chachaan un kasuyatan un liigili si Greek. 45-46 Lu ikiyu gapun chi makabyasuɏanyu, lampogenyu. Ti un-ulloy chi mapilay kayu un maidchen si biyeg un mallalayun lu wechewed chi ikiyu un mibyellu ud impiyeɏlu. 47 Ked lu ha atayu chi gapun chi makabyasuɏanyu, ukaonyu! Ti un-ulloy chi mabussok kayu un lumlok si mampangatan Apudyus lu wechewed chi atayu un mibyellu ud impiyeɏlu, 48 ‘un inggewan cha ogos un, achipun matoy ya apuy un achipun maksop.’

49 “Losan un tagu, masapuɏʼn mapachasancha ligat ta bumaɏu ugalicha, un isun chi makan un lu maasilan pumiya.‡ 9:49 Ha ibyegala si Greek, losan un tagu masapuɏn maasilan si apuy. 50 Bibiɏu asin, ngim lu makaan chi simsimla lappun in-ilon un mangiyulin si kilaasinla. Ked isun otyan chi mallamlaw un laasilan chi mambibiɏulanyu ta mallin-awa kayu.”