1 Chakampun un masapuɏʼn isuɏatku kan chikayu mipanggop si tuɏungyu un maiyoy kan cha tagun Apudyus ud Judea. 2 Ti ammuk un chakeɏ ayatyuʼn tumuɏung, ked inchayawku chikayu kan cha iMacedonia. Imbyegak un, “Cha susulud taku ud Achaia, lakasagalacha un tumuɏung lalipud si lummaus un tawon.” Ked gapu si ayatyu un tumuɏung, laawis cha kaachuwan kan chichaʼn tumuɏung. 3 Ked ibuunku cha allaʼn susulud taplu mabogasan otyan hachiʼn chayawmi mipanggop kan chikayuʼn lakasagala ituɏungyu. 4 Ta lu awed mitun-ud kan sakon kan cha iMacedonia ked maochesancha un achipun kayu lakasagala, gettok un mabiilan kami ulay chikayu ti mantegod kami kan chikayu. 5 Ked laslasmokku un masapuɏʼn paulaok cha allaʼn susulud taku ta chaguponcha cha ingkariyun tuɏung, ta lu gumatong kami, lakasagala cha halat un ituɏungyu. Ked maila un chakeɏ chi ayatyuʼn tumuɏung un chakampun un lapatut kayu.

6 Somsomkonyu un ha taguʼn akit chi imuɏala, akit bo apitola. Ked ha taguʼn achu imuɏala, achu bo apitola. 7 Ked mangatod otyan chi kacha osa un mampeɏpu si somsomokla. Chakampun un mansigeb chi somsomokla willu mapatut, ti ay-ayaton Apudyus cha mallaay un mangatod. 8 Ya kabyeeɏan Apudyus un idchon cha losan un masapuɏyu ked masasaweɏ, taplu pappasig umalay un useɏonyu si allaʼn matattaguwanyu ya awed achu si ituɏungyu kan cha mangwa si bibiɏu. 9 Isun chi liigili si ugud Apudyus, un kalala,

10 Si Apudyus un meɏpuwan chi bukeɏ un imuɏan chi man-osok ya siya mangatod si makan un kalon cha tagu. Ked idchen chikayu si losan un bukeɏ un masapuɏyu ked paachuwola taplu umachu apitonyu gapu ta mallaay kayu un mangàatod. 11 Pabyaklangon chikayu ta makwaʼn mallaay kayuʼn mangàatod si losan un timpu. Ked achu cha manyamyaman kan Apudyus gapu cha tuɏungyu un ilawatcha kan chikami.

12 Ta lu katchi pin-ayu koon, chakampun un abus si matuɏunganyu cha tagun Apudyus, ngim peɏoswaola bo ayat cha achuʼn tagu un manyaman kan siya. 13 Ked gapu si langipain-anyu si mansimbiyanyu, achu mangichaychayaw kan Apudyus gapu si tummuttuwaanyu si Bibiɏuʼn Chameg mipanggop kan Kristu. Tuttuwaʼn manyamancha kan Apudyus gapu si ayatyu un mangatod si kasapuɏancha ya bumaɏuwan cha losan. 14 Ked siyad iluwaluwancha chikayu ya amod chi somsomokcha kan chikayu gapu si lappun miyisuwalaʼn kachegun Apudyus kan chikayu. 15 Ked manyaman taku kan Apudyus gapu si illidchola un lappun miyisuwala.