1 Gapu si kachegun Apudyus, laatod kan chikami allaʼn kawachi, ked achipun kami umuya. 2 Man-awichenmi cha losan un pin-an cha tagu koon un litataɏu ya kabibiin. Achipunmi sikapan cha tagu. Achipunmi suksukatan chi ugud Apudyus ngim ipakaawatmiʼn ustu katuttuwaan. Koonmi cha alla si sangwalan Apudyus ta ammuwon cha ulay siluʼn tagu, siyad ipalawegmi ibyega katuttuwaan, ked kapilitan un mailasin cha losan un tagu un bibiɏu ugalimi. 3 Ked lu awatlaʼn litaɏu Bibiɏuʼn Chameg un ibyegbyegami, litataɏu kan cha mibyellu. 4 Ti si Satalas un manturay si tagu utla lubung, sileilala somsomokcha ta achipuncha maila silaw un mampeɏpu si Bibiɏuʼn Chameg mipanggop si kilachayaw Kristu un issu-issun Apudyus. 5 Ti chakampun si ibyegbyegami mipanggop si long-egmi ngim siyad ibyegbyegami si Jesu Kristu un Apu ked chikami mansimsimbi kan chikayu gapu kan Jesu Kristu. 6 Ked si Apudyus chi langibyega un, “Lumoswa laweg ta malawagen chi gikbot!”* 4:6 Genesis 1:3 Siya bo manlaweg si somsomokmi ta ipailala mipagapu kan chikami kilachayaw Apudyus un maila si lupan Kristu.

7 Ngim chikami un mangibyegbyega, isumi byanga un langiggaan Apudyus si kilaɏuub. Kamatchi killingwala ta mipaila chi kangatuwan un pallakabyelinla, chakampun un leɏpu kan chikami ti lampeɏpu kan Apudyus. 8 Kalayun un achu lak-amonmi un ligligat un isun chi posposposon chikami, ngim chakampun un paabyak kami. Ked ulay lu sin-udchuman un manchuwachuwa kami, ngim chakampun un umuya kami. 9 Patunged kami mapampaligatan kan cha tagu, ngim achipun Apudyus chikami man-awichen. Ked ulay lu allaʼn otoyon chikami, achipun kami matoy. 10 Kamatchi laklakwa kan chikami, ked sosòogonmi matoyanmi un isun chi lakwa kan Jesus taplu maila biyegla kan chikami. 11 Si allaʼn mataguwanmi, pasigmi sosòogon chi matoyanmi gapu kan Jesus taplu mailan cha losan chi biyeg Jesus si allaʼn long-egmi un lalaka un matoy. 12 Ked ulay lu sosòogonmi matoyanmi, intalu ti siya mataguwanyu si ing-inggala.

13 Awed chi liigili un ugud Apudyus, “Gapu ta lamatiyak kan Apudyus, hachi man-uguchek.”† 4:13 Psalm 116:10 Ked si isula un ispiritun chi pammati, man-ugud kami bo ta mamati kami. 14 Ti ammumi un si Apudyus chi lalagu kasin kan Apu Jesus, taguwola bo kasin chikami un isun Jesus, ya iyawit chitaku si awechela. 15 Ked losan cha allaʼn ligatmi, gapu kan chikayu ta umachu-achu cha taguʼn makaawat si tuɏung Apudyus ya umachu-achu bo cha manyaman kan siya si machayawala.

16 Ked chakampun un umuya kami, ti ulay kumapkapsut chi allaʼn long-egmi, biligat un kumoskoscheɏ biyeg un awed kan chitaku un achipun matoy. 17 Ti cha allaʼn mallangpaw ya sin-akitan un ligligatmi, ked idchola kan chikami chi chakeɏ ya mallalayun un chayaw un lappun miyisuwala. 18 Ti achipunmi sakbyayan cha mamàila utla pita si sala ti siyad sakbyayanmi cha achipun maila un awed ud langit. Ti cha maila un awed utla pita, maumascha losan, ngim cha achipun maila un awed ud langit, ked lappun mangkigachencha.