1 Cha losan un mamati un si Jesus chi Kristu un imbuun Apudyus utla pita, ked alak Apudyus. Ked lu silu mangay-ayat si Ama, ay-ayatola bo aalak chi Ama. 2 Ked lu ay-ayaton taku si Apudyus ya tuttuwaon taku cha bilinla, hachi mangagammuwan taku un ay-ayaton taku bo cha aalak Apudyus. 3 Ti ha mangay-ayatan taku kan Apudyus, siya maluttuwaan taku kan cha bilinla. Ked cha bilinla, chakampun un mansigeb un tuttuwaon, 4 ti cha losan un alak Apudyus, eɏgoncha cha kilalawwing utla lubung un sumupling kan Apudyus. Ked ha pammati taku kan Jesu Kristu, siya mangɏogen taku. 5 Abus cha mamati kan Jesu Kristu un Alak Apudyus chi makaeɏog kan cha kilalawwing utla lubung.

6-8 Hachiʼn ummaliyan Jesu Kristu utla pita, awed cha tiɏu un maluttuwaan un siya Alak Apudyus. Ha umula, hachiʼn lampabunyagela si chelum. Ked ha mikadwa, ha libukbukan chi chaɏala si latoyala. Ked ha mikatlu, ha Ispiritu Santu, ked tuttuwa cha losan un ibyegala. Cha allaʼn tiɏu, mantitimbuɏuy cha pionchaʼn ibyega mipanggop kan Jesu Kristu. 9 Lu awed malistigu, tuttuwaon taku ngim lapotpotog chi mansisistigun Apudyus, ti sigulachuʼn tuttuwaon taku cha imbyegan Apudyus mipanggop si Alakla. 10 Ked ha mamati si Alak Apudyus, limuɏa si somsomokla hachiʼn silistiguwan Apudyus mipanggop si Alakla. Ngim ha achipun mamati si imbyegan Apudyus, mambyalilola si Apudyus matuli, ti achipun mamati si imbyegan Apudyus mipanggop si Alakla. 11 Ked ha insistigun Apudyus, illidchola kan chitaku biyeg un mallalayun, ked leɏpu allaʼn biyeg kan Alakla. 12 Ha taguʼn litimpuyug si Alak Apudyus, awed kan siya biyeg un mallalayun. Ngim ha taguʼn achipun litimpuyug si Alak Apudyus, lappun kan siya biyeg un mallalayun.

13 Ha langisuɏatak kan cha alla kan chikayuʼn mamati si ngachen chi Alak Apudyus, taplu agammuwonyu un awed kan chikayu biyeg un mallalayun. 14 Ked mantegod taku un umachali kan Apudyus ti lu silu kochewon taku kan siya, lu mitimbuɏuy si piola, chongɏola chitaku. 15 Ked lu ammu taku un chongɏola cha chawaton taku, ammu taku un lagamput taku maaɏa cha kinchew taku kan siya.

16 Lu maila taku sulud taku un makabyasuɏ, un chakampun si misilaala kan Apudyus, iluwalu taku kan Apudyus ta pakawalola ya idchela siya si biyeg un mallalayun. Ngim awed chi byasuɏ un ha mambyalagela misilaan kan Apudyus, ked chakampun un ibyegak un masapuɏ iluwaluwan taku katchi un tagu ta mapakawan. 17 Tuttuwaʼn losan un lawwing un koon ked byasuɏ, ngim awed chi byasuɏʼn makwan mapakawan taplu achipuncha mipooy si machusaan un lappun kigedla.

18 Ammu taku un lappun alak Apudyus un ituɏutuɏuyla mambyasbyasuɏ, ti seɏaklibyen chi mismuʼn Alak Apudyus siya ked achipun si Satalas makatikchin kan siya.

19 Ammu taku bo un aalak chitaku kan Apudyus, ngim cha taguʼn achipun mamati si Satalas chi mangituray kan chicha.

20 Ya ammu taku bo un ummali Alak Apudyus utla pita ked lilawagela somsomok taku taplu ammuwon taku tuttuwaʼn Apudyus. Ked litimpuyug taku kan siya un tuttuwaʼn Apudyus ti litimpuyug taku si Alakla un si Jesu Kristu. Siya tuttuwaʼn Apudyus ya siya lampeɏpuwan chi biyeg un mallalayun.

21 Ked chikayuʼn imbilangkuʼn aalakku, masapuɏʼn allachenyu cha silan-apudyus.