Mokanda ŋwa Polo oka
Ɓaebele
Maphɔɔ ma etatele
Mokanda mumu o imokyeka, mowɛnɛnɛ ndokolo ɓamotomelaka ɓaanosi ɓaali Ɓayuda. Moɓalenza phɔ ɓaɓaka ɓanyɔkɔmɔ emba ɓaunvaka na lɛ ianola sa ɓɛ̀ɛ. Moto owakoma mokanda mumu taeɓane.
Etatele ya mokanda mumu kyewɛninya saa oɓokye Ŋwaphongo amiwɛninyaka oka ɓanga na nzela ya Ŋwana wɛ Yesu Klisto (1.1-3). Mateya ma mokanda mɛ makaɓana na bite biɓale binɛnɛ.
- Etee eya o ɓoo (1.4–10.18) kyeteya oɓokye Yesu ali na mwiya mokusi. Taikyi leka nde Ɓaimosi na ɓaimosi (1.1), kasi alekyi na ɓanze, na Mose na Zozuwe. Oli yo Nganga ya Ŋwaphongo o munɛnɛ o sangola eenyakune, aleki ɓanganga ɓa Ŋwaphongo ɓanɛnɛ ɓasɔ ɓa sangola eekasi. Amiambyaka nde mbala yɔnɔyɔ ɓoɓɛlɛ ndokolo mbeka, alekyi na mambeka masɔ ma Isalayɛlɛ ma kalakala.
- Etee eye iɓale (10.19–13.25) kyekuya ɓaanosi phɔ ɓaphile nde ianola, ɓaɓengye moɓesi ŋwa ɓasantu ɓa Sangola eekasi, ɓakyekyele nde Yesu Klisto. Phɔ ya isukya, mokanda mumu moamba mateya na miɓeko ndengye na ndengye.
Maphɔɔ mali o mokanda mumu mango mama:
- Ɓaebele 1.1-3: Ŋwaphongo amiwɛninye na ɓato na nzela ya Ŋwana wɛ Yesu Klisto
- Ɓaebele 1.4–2.18: Klisto alekyi ɓanze
- Ɓaebele 3.1–4.13: Klisto alekyi Mose na Zozuwe
- Ɓaebele 4.14–7.28: Klisto alekyi Ɓanganga ɓaanɛnɛ ɓa Ŋwaphongo
1
Ŋwaphongo awɔ na nzela ya Ŋwana wɛ
1 Waakalakala Ŋwaphongo awɔlɛkyɛ ɓankɔkɔ ɓa ɓanga mbala nzikye na ná ndengye nzikye na nzela ya ɓaimosi, 2 o nkɔlɔ ya suka iye, alowɔsi na nzela ya Ŋwana wɛ owatɛyɛ yo ndomi ya maphɔɔ masɔ, nde na nzela yɛ mɛ, akyela munse munsɔ. 3 Yo, ooli ingyɛngyɛ sa nkyɛmɔ yɛ, na ɓonɛnɛ pha ɓoekondo phɛ. Emba aphisi maphɔɔ masɔ na mwiya ŋwa Iloɓa sɛ. Waunva yo ikunyola masumu ma ɓato ɓasɔ, akyɛ zala o ɓoloo pha Ɓonɛnɛ pha Ŋwaphongo, o ikolo.
Ŋwana wa Ŋwaphongo alekyi ɓanze
4 Abutwa na mwiya ileka ɓanze, yango mɛna azwa nkombo ya ngambo eelaa koleka maaka ɓɛ.
5 Phɔ nzaa onte ya ɓaanzelu owaunva wɔlɛ Ŋwaphongo nɔnɔ mbala yɔnɔyɔ oɓokye:
«Iwɛ oli mpenza ŋwana wa nga,
lɔlɔ, nga nabutoo ɔngɔ.»
Naa oɓokye:
«Nga, namoɓa ango
emba yo amoɓa ŋwana wa nga.»
6 Kasi wakula kamba yo ŋwana owa ɓola o mokyisi, awɔ yokye:
«Ɓaanze ɓa Ŋwaphongo ɓasɔ ɓamokusamele.»
7 Emba oka ɓanze, kawɔ ɓoɓo:
«Kabuya ɓanze ɓɛ́ɛ biwɛɛlɛ,
na ɓato ɓɛ́ɛ ɓa etoma itumbu sa mwenya.»
8 Kasi oka Ŋwana wɛ awɔ:
«Mumbanga ŋwa ɓokonzi pha wɛ, O Ŋwaphongo, ŋwamoɓa phɔ ya bipha na bipha.
Emba motuu ŋwa ɓosembo eli motuu ŋwa ɓokonzi pha wɛ.
9 Wazinga ɓosembo, waina ɓoɓe,
yango mɛna, Ŋwaphongo, Ŋwaphongo wa wɛ aeyinga mauta maa nkyisa,
koleka ɓɛbi na wɛ.»
10 Aamba kula wɔ ɓoɓo:
Eli iwɛ, Nkolo, owakyela munse o etatele,
emba ikolo elii bitoma ba maɓɔkɔ ma wɛ.
11 Isɔ miina yamowa, kasi iwɛ, wamoikala.
Na isɔ yamokotwa ndokolo etobu.
12 Emba ɓokokyele ɓɛ́ɛ na munkoto, wamoizinga,
ndokolo etobu, ɓamo ɓa endinya,
kasi iwɛ, oli nde ɓomɔ, mambula ma wɛ etemaakome o suka.
13 Emba nzaa onte ya ɓanze owaunva yo wɔlɛ nɔnɔ mbala yɔnɔyɔ oɓokye:
«Zala o ɓoloo pha nga,
tee nɔnɔ owamobuya nga ɓanguna ɓa wɛ, etɛyisa ya makolo ma wɛ.»
14 Te ɓali ɓɛ́ɛ ɓasɔ malɔɓɔ maakyele bitoma naa maatome yo phɔ ya ɓolaa pha ɓato ɓasengyesi izwa ilaka sa lobiko?