56
Hodáay sará tawkala kanán
Pa sázger o washáwázáni sálárá. “Bétawár o durdastén kapótay” tarzay sará. Dáuday shayr, hamá wahdá ke Pilistián Dáud Gatay shahrá dazgir kort.
1 Oo Hodá! Mani sará rahm kan,
ke dozhmen sakk mani randá ant,
sajjahén róchá, mani sará orosha kanant.
2 Sajjahén róchá, dozhmen maná lagatmála kanant,
chiá ke bázéné pa kebr mani sará orosha kant.
3 Wahdé maná torsit
tai sará tawkala kanán.
4 Hodáay sará, ke áiay habará satá kanán,
Hodáay sará tawkala kanán o natorsán,
hákién ensán maná ché korta kant?
5 Sajjahén róchá, mani habarán tába dayant o
sajjahén honaresh pa mani ázár dayagá ent.
6 Pandala sázant o kamina kanant,
mani gámána chárant o
mani koshagay randá ant.
7 Gón é sajjahén badián rakketa kanant?
Oo Hodá! Wati hezhmay tahá kawmán sarshakun kan.
8 Taw mani darpadariay hesábána dáray,
mani arsán wati arsdáná bekan,
é tai ketáb o daptarán nebeshtah naant?
9 Gorhá á wahdá ke tará gwánka janán
dozhmen pada kenzant.
Eshiá zánán ke Hodá gón man ent.
10 Hamá Hodá ke áiay habará satá kanán,
haw, hamá Hodáwand ke áiay habará satá kanán,
11 Hamá Hodáay sará tawkala kanán o natorsán.
Ensán maná ché korta kant?
12 Oo Hodá! Báyad ent gón taw wati kortagén kawlán purah bekanán,
pa taw shogrgozáriay korbánigán pésha kanán.
13 Chiá ke taw, oo Hodá, maná cha marká rakkénay o
mani pádán cha lakoshagá dáray,
ke zenday rozhná tai bárgáhá gám bejanán.