79
Bandigáni peryát tará sar bátant
Asápay Zabur.
1 Oo Hodá! Kawmán tai mirás geptag,
tai pákén parasteshgáhesh palit kortag o
Urshalim, wayrán.
2 Tai hezmatkáráni jónesh báli morgáni warák kortag o
tai wapádáráni jánay gósht, rastaráni.
3 Esháni hónesh ápay paymá sajjahén Urshalimá rétkag,
kass namant ke mordagán kabr bekant.
4 Hamsáhegáni démá roswá butagén o
kash o kerray mardománi kalági.
5 Oo Hodáwand! Tán kadén zahra bay? Tán abad?
Tán kadén tai hasadd ásay paymá róka bit?
6 Wati gazabá hamá kawmáni sará begwár ke tará pajjáha nayárant o
hamá molkáni sará ke tai námá nagerant,
7 ke Ákubesh wártag o ér bortag o
áiay molkesh wayrán kortag.
8 Gwastagén nasláni gonáhán may sará maladdh,
tai rahmat zutt may sará byáyátant
ke sakk wár o bazzag én.
9 Oo may rakkénókén Hodá! Márá madat kan,
wati námay shán o shawkatay sawabá,
pa wati námaygi márá berakkén o
may gonáhán bebaksh.
10 Chiá darkawm begwashant:
“Esháni Hodá kojá ent?”
May chammáni démá kawm begendátant ke
taw wati hezmatkáráni retkagén hónáni bérá geray.
11 Bandigáni áh o peryát pa taw sar bátant,
gón wati báskay zórá
hamáyán berakkén ke koshag bayagá ant.
12 Oo Hodáwand! Cha may hamsáhegán hamá sobakkiáni bérá
hapt sari géshter beger ke tai sháná kortagantesh.
13 Gorhá má, tai kawm
ke tai charágáhay pas én,
tán abad tai shográ gerén,
nasláni nasl tará satá kanén.