50
Hodá wat may dádras ent
Asápay Zabur.
1 Hamá porwák, Hodáwandén Hodá
habara kant o zeminá gwánka jant,
cha ródarátká tán rónendá.
2 Hodá cha Sahyuná
ke zébáiay kamál ent, wati nurá drapshána kant.
3 May Hodá kayt o bétawára nabit,
ér barókén ásé démá enti o
trondén gwát o lurhé chágerdá.
4 Borzén ásmánán ham gwánka jant o zeminá ham,
tánke wati mardománi dadrasiá bekant.
5 “Hodádóstán mani gwará yakjáh kanét,
hamá ke gón korbánig kanagá, gón man ahdesh bastag.”
6 Ásmán áiay adl o rástiá jára janant,
chiá ke Hodá wat dádras ent. Ósht...
7 “Oo mani mardomán! Beshkonét ke habara kanán.
Oo Esráil! Tai helápá gwáhia dayán.
Man Hodá án, shomay Hodá.
8 Pa korbánigi naent ke tará hakkala dayán,
tai sóchagi korbánig modám mani chammáni démá ant.
9 Na cha tai lógá gwaské zurán o
na pasé cha tai gwáshá.* 50:9 Gwásh, bezán wárh.
10 Chiá ke jangalay sajjahén haywán manig ant,
hazárán kóháni dalwat† 50:10 Dalwat, bezán haywán..
11 Kóhestagáni sajjahén báli morgán jáha kárán o
har ché ke zeminá gardit manig ent.
12 Agan shodig atán tará sahigon nakortagat,
chiá ke jahán o harché áiá hast, manig ant.
13 Gókáni góshtá warán?
Pasáni hóná nóshán?
14 Wati shogrgozáriay korbánigá Hodáyá pésh kan o
wati kawlá gón borzén arshay Hodáyá purah kan.
15 Sakki o sóriáni róchá maná belóth,
man tará nejáta dayán o
taw maná shán o shawkata dayay.”
16 Bale Hodá gón badkárá chosha gwashit:
“Tará che hakk ent ke mani Sharyatay rahbandáni habará bekanay
yá mani ahd o paymánay bárawá chizzé begwashay?
17 Chiá ke cha adab o tálimá bézár ay o
mani habará poshtá dawra dayay.
18 Dozzé ke genday, démet róshena bit o
gón zenákárán hamráha bay.
19 Dapay lagámá pa badiá yalaha kanay o
zobáná pa prébá.
20 Modám wati brátay helápá habara kanay,
wati mátay chokkay sará bohtáma janay.
21 Taw é kár kortagant o man hecch nagwasht,
hayálet kort ke man tai payméné án.
Bale nun tará malámata kanán o
tai mayár o gonáhán tai chammáni démá éra kanán.
22 “Oo Hodá shamoshtagénán!
É habará neshán kanét,
agan na, shomárá chondh chondha kanán o kas shomárá rakkénta nakant.
23 Á kas ke shogrgozáriay korbánigá pésha kant
hamá maná shán o shawkata dant,
pa wat ráhé tayára kant o
man áiá hamá nejátá pésha dárán ke cha mani némagá ent.”