1 Kheh te lehq, ghig po nux ox pax awr, Gar dar raq muhd mig* 5:1 Gar dar raq muhd mig Bid saz a naz chaw teq pa ve muhd mig phehq che yaog. lo i hehd gaeg che yaog. 2 Yer suq huh lawd kor awg khuhn tuhaz huh, ned chaq chiz geh che chaw te ghad awr lehr, teq pear lehax chaw tur phuh huh tuhaz lehq yawd haq ca mawg daq che yaog. 3 Chaw u ve awr lehr, chaw tur phuh teq pa cawg kig huh lehax chehd chehd che yaog. Chaw te ghad-eg liz yawd haq pheh teh lar maq gha. Son caz yug lehq pheh teh lar liz maq gha. 4 Awg lawn ghod ver, laex pawz su yawd haq son kawng son caz yug pheh teh lar liz, yawd son caz haq ghawg chez lehq, son kawng haq uhx theh che yaog. Chaw te ghad-eg liz yawd haq mend vid tug te maq gha. 5 Tur phuh teq pa huh lehd ma koz, keh dig thag huh lehd ma koz, muhd kaw muhd phiq khar thad liz yawd kug chehd che yaog. Yawd awg ton haq liz, huhx meh sir yug lehq gi thur-e chehd che yaog.

6 Yer suq vid-aq lo lag tod che haq chaw u ve gha mawg che te yand, yawd chehd lo cex lag lehq yawd haq a kor pi che yaog. 7 Yawd awg khuhd hehnd chawa kug lehq koz che, “Muh jad che Ghig sa ve Yad phu Yer suq-og, nawg ngag haq khawd-ehg kheh caz daq lehq le. Nawg ngag haq maq gha du deh tug, Ghig sa mehz khuhd suhr huh ngag nawg haq lawg khawx che yaog,” lehd koz vid che yaog. 8 Awg lawn ghod ver, “Ned chaq chiz-og, yawd awg khuhn tuhz kae-o,” lehz Yer suq yawd haq koz vid cheaq te lehq yaog.

9 “Nawg a thoq meh cheawg le,” lehz Yer suq yawd haq na ngawx che te yand, “Ngag hehd mad jad cheaq te lehq, ngag ved awg meh awr lehr Ler junr† 5:9 Ler junr Rod maq chaw teq pa maq phawd awr yehd che awg khad awr lehr, teq ler junr ver maq yad 6 hinx cawg che yaog. Chaw che phad khuhn ned chehd mad jad che haq mar lar che yaog. yaog,” lehz yawd Yer suq haq kawq koz vid che yaog. 10 Muhd mig u ve awg khuhn i hehd haq maq gha ghaq tuhz tug, yawd Yer suq haq hax ceh nux lawg khawx che yaog.

11 Keh u ve awg baq haq, vaq mor nux kaz cad chehd che yaog. 12 Kheh te lehq, ned teq pa yawd haq lawg khawx che, “Vaq u ve teq pa awg khuhn ngag hehd gha gehe tug, ngag hehd haq kae peha laoq,” lehd koz vid che yaog. 13 Awg yand u ve haq, Yer suq i hehd haq kae cuh vid che yaog. Ned chaq chiz teq pa tuhz veh lehq vaq u ve teq pa awg khuhn gehe che yaog. Vaq awg mor nux awr lehr, mig har kig lo hax ceh nux cex yaeq lehq, ghig po khuhn lo gehe lehq a kaz ka suh vehr che yaog. Vaq u ve teq pa, a lag kheh niq hinx kheh cawg che yaog.

14 Vaq huhx var teq pa cex koeq lehq, awg lawn u ve haq med khaz teq pa awg khuhn ca koz vid che yaog. Kheh te lehq, khawd-ehg kheh phehaq che awg lawn haq gha sir tug, chaw ted pehg ca ngawx-ag che yaog. 15 I hehd Yer suq chehd lo gaeg che te yand, ned chaq chiz Ler junr geh che chaw te ghad beg ke veq deh lehq mi chehd che haq i hehd gha mawg che yaog. Yawd ved ni ma awg kawd maq thad huh heh te lehq kawq daq vehr che haq liz i hehd gha mawg lehq kuhz jad che yaog. 16 Gha mawg chehd che chaw teq pa awr lehr, ned geh che chaw awg lawn he lehq vaq teq pa khawd-ehg kheh phehaq che awg lawn, ca ngawx-ag che chaw teq pa haq koz mar vid che yaog.

17 Kheh te lehq, i hehd ve muhd mig teq tawn awg khuhn tuhez vid tug, i hehd Yer suq haq lawg khawx che yaog. 18 Yer suq huh lawd kor awg khuhn gehe che te yand, ned chaq chiz geh jaw che chaw che te ghad awr lehr, yawd geh chehd tug lawg khawx che yaog. 19 Yer suq yawd haq ma chehd cuh vid. Kheh ma khuhd yawd haq koz vid che, “Nawg yehg lo koeq lehq, Jawd mawd Ghig sa nawg haq khawd-ehg ma ga lar lehq har kax lar che awg lawn, nawg ved awg ceng awg khad teq pa haq ca koz mar vid-oq,” lehd koz vid che yaog.

20 Kheh te lehq yawd tuhz veh lehq, Yer suq yawd haq khawd-ehg taw maq ga lar peg che awg lawn, Der kar pawd liq‡ 5:20 Der kar pawd liq Mt 4:25 haq ngawx. muhd mig awg khuhn yawd hax ceh nux ca koz mar vid cheaq te lehq, chaw awg gha lia and jad che yaog.

21 Yer suq huh lawd kor cind lehq ghig po nux ox pax awr lo kawq khanr kae che yaog. Yawd ghig po pad huh chehd chehd huh, chaw awg mor nux yawd chehd lo phoz lag che yaog. 22 Awg yand u ve haq, Yar id ruq meh che bon lawg kig huh ve awg hox te che te ghad lag lehq Yer suq haq mawg lehq, yawd ved khi pad huh boz cuhx vehr che yaog. 23 Yawd Yer suq haq koz vid che, “Ngag ved yad mid nehax suh vehr tez che yaog. Yawd na vehr lehq a saq gha teq tug, nawg lag lehq yawd awg thag huh laq kuhr a cehax ca tar vid laoq,” lehd koz, hax ceh nux lawg khawx che yaog. 24 Kheh te lehq, yawd Yar id ruq geh kae che yaog.

Chaw awg mor nux yawd khaz nuhr ghaq kae lehq, yawd haq biz daq caq daq te chehd che yaog. 25 Teq chi nid khuhq kheh taw awg suhr yaq§ 5:25 awg suhr yaq Che kheh te che yad mid awr lehr, mad daq kehg che yad mid phehq che yaog. Ak 15:25 don chehd che yad mid te ghad cawg che yaog. 26 Naz chuhd ghu vix var laex ghad ve laq kuhr awg khuhn yawd laex ceng gha khanr jad peg che yaog. Yawd kha cawg che awg gha lia haq yehd vehr peg liz, yawd a cehax liz maq na che awg khod-aq, a nar u ve sang te sang kawq jad vehr che yaog. 27 Yawd Yer suq awg lawn gha kad jaw che yaog. Kheh te lehq, chaw awg mor nux awg khuhn yawd Yer suq kuhr tehx nuhr phawd awr huh lag lehq, yawd ved beg ke haq ca vad che yaog. 28 Awg lawn ghod ver, “Yawd ved beg ke haq lehax ngag gha vad ver, ngag na vehr tug yaog,” lehz yawd koz che yaog.

29 Awg yand u ve haq, yawd awg suhr yaq chehd che teq pear lehax cheh vehr lehq, yawd na vehr che haq yawd awg ton sir che yaog. 30 Yer suq yawd ved awg ton awg khuhn kand pax tuhz veh che haq teq pear lehax gha sir cheaq te lehq, chaw awg mor nux haq yawd phuhz ngawx lehq, “Ngag ved beg ke haq a sug vad cheawg le,” lehd koz na ngawx che yaog.

31 Yawd ved awg laq ghuhd teq pa awr lehr, “Chaw awg mor nux nawg haq biz daq caq daq te chehd che haq nawg mawg chehd liz, ‘Ngag haq a sug vad cheawg le,’ lehd koz na ngawx cheawg la,” lehz Yer suq haq kawq koz vid che yaog.

32 Yawd haq vad lar che chaw haq gha mawg tug Yer suq kha sehax caw ngawx chehd che yaog. 33 Yad mid u ve awr lehr, yawd awg khuhn khawd-ehg kheh phehaq che awg lawn haq sir cheaq te lehq, yawd kuhz ched chehd che yaog. Yawd Yer suq chehd lo lag lehq yawd mehz khuhd suhr huh boz cuhx lar lehq, awg lawn awg gha lia yawd haq thed-e ghad koz vid che yaog. 34 Yer suq yawd haq koz vid che, “Yad mid-og, nawg yonr che ted ceng awr lehr, nawg haq na tug tea vehr che yaog. Duhd sa che awg khuhn koeq lor. Nawg haq chehd sa tug kha sehax tea vehor,” lehd koz vid che yaog.

35 Yawd u kheh koz chehd-ag huh, bon lawg kig huh ve awg hox te ghad ve yehg lo lag che chaw teq pa koz che, “Nawg ved yad mid suh vehor. A thoq te Sar lar haq kawq soq saq vid cheawg le.”

36 Tawd khuhd u ve haq Yer suq maq na he lar lehq bon lawg kig huh ve awg hox te ghad haq, “Ta duhd har. Yonr che lehax teo,” lehd koz vid che yaog. 37 Per troq, Yar koq he lehq Yar koq awg nax var Yod hanr, i hehd seh ghad ma hez ver, awg kag awr ve chaw te ghad-eg haq liz yawd khaz nuhr mad ghaq lag cuh vid. 38 Yawd bon lawg kig huh ve awg hox te ghad ve yehg huh gaeg che te yand, su diz diz huhd huhd te lehq, hax ceh nux huhg lehq paz huhg chehd che haq yawd gha mawg che yaog. 39 Yer suq yehg khuhn gehe lehq, “Nig hehd a thoq te diz diz huhd huhd te lehq huhg chehd cheawg le. Chaw yad nehax che suh che ma hez. Yawd yuhq mir ka chehd che yaog,” lehz i hehd haq koz vid che yaog. 40 Awg yand u ve haq, i hehd Yer suq haq phoz ghig che yaog. Yer suq i hehd awg gha lia haq ghaq tuhz pe lehq, chaw yad nehax ve awr pa awr ye he lehq yawd geh lag che chaw teq pa haq sir ve lehq, chaw yad nehax teh lar kig huh gehe che yaog. 41 Awg yand u ve haq, Yer suq yad mid nehax ve laq kuhr haq yug lehq koz che, “Tar lid tar kug miz.”* 5:41 Tar lid tar kug miz Che awr lehr Ar rar miq khuhd phehq che yaog. Tawd u ve cuhx ki awr lehr, “Yad mid-og, ngag nawg haq koz ax laq, tu laoq,” lehd koz che yaog.

42 Awg yand u ve haq, yad mid nehax u ve teq pear lehax tuag lehq, yaq kaw tod veh che yaog. Awg lawn ghod ver, yawd a saq teq chi nid khuhq gag vehr che yaog. Chaw u ve teq pa duhd ma tuhz lehq and jad che yaog. 43 Awg lawn u ve haq su te ghad-eg liz maq gha sir vid tug, Yer suq i hehd haq kha sehax tawd pid peg lehq, “Yad mid nehax haq cad tug car vid-oq,” lehz i hehd haq koz vid che yaog.