1 Yawd bon lawg kig khuhn kawq gehe che te yand, u huh laq kuhr teq pax suh che chaw te ghad chehd chehd che yaog. 2 Yer suq haq vend bax tar gha tug, Sa ba to awg ni haq* 3:2 Sa ba to awg ni haq Sa ba to awg ni awg khuhn chaw nag haq ghu na vid che awr lehr vend bax te che yaog lehz Yud daq chaw teq pa sawnr lar che yaog. chaw nag u ve haq yawd ghu na vid tug lehq nar, i hehd† 3:2 i hehd Yud daq chaw teq pa ve bon hox bon nax teq pa haq koz che yaog. Lk 6:7 yawd haq kha nehax ngawx chehd che yaog. 3 Yawd awr lehr, laq kuhr teq pax suh che chaw haq, “Nawg tu lehq awg kaw jen ca hox laoq,” lehd koz vid che yaog. 4 Kheh te peg lehq yawd i hehd haq koz vid che, “Sa ba to awg ni haq daq tug te cawd hawg la, ma hez ver lug tug te cawd hawg la. Su ved a saq haq pong vid cawd hawg la, ma hez ver dawz vehr cawd hawg la,” lehd koz na ngawx che yaog.

Kheh ma khuhd, i hehd taq chuhax gawr lehd chehd chehd che yaog. 5 Yer suq nez nag lehq i hehd haq kha sehax caw ngawx che yaog. I hehd ni ma heh cheaq te lehq yawd duhd har lehq, chaw u ve haq, “Nawg ved laq kuhr cheo,” lehd koz vid che yaog. Awg yand u ve haq, yawd laq kuhr che lehq na vehr che yaog. 6 Kheh te lehq, Phar rir sehd teq pa tuhz veh lehq, Yer suq haq khawd-ehg kheh te ver gha dawz vehr tug, teq pear lehax Her roq ve chaw teq pa geh ca jehg daeq che yaog.

7 Yer suq yawd ved awg laq ghuhd teq pa geh Gar liq lehd ghig po nux phawd awr lo kawq kae lehq, Gar liq lehd muhd mig khuhn chehd che chaw awg mor nux yawd khaz nuhr ghaeq che yaog. Kheh te lehq, Yud daq muhd mig, 8 Yer ruq sar lehnr med, Id du mehd muhd mig, Yawd danr lawg kax ox pax awr he lehq Tud ruq med he lehq Sid donr med lo chehd che chaw teq pa liz, yawd te che kanx teq pa awg lawn gha kad cheaq te lehq, yawd chehd lo lag che yaog. 9 Chaw awg mor nux yawd haq maq gha biz daq tug, “Huh lawd kor nehax ted mag haq ghu lar-oq,” lehz awg laq ghuhd teq pa haq yawd koz vid che yaog. 10 Awg lawn ghod ver, chaw nag kha peh haq yawd ghu na vid cheaq te lehq, nag che guhg che chaw teq pa awg gha lia yawd haq gha vad tug, yawd chehd lo hax ceh nux biz daq gehag chehd che yaog. 11 Ned chaq chiz teq pa liz, yawd haq gha mawg che te yand, yawd mehz khuhd suhr huh boz cuhx lar lehq, “Nawg awr lehr Ghig sa ve Yad phu yaog,” lehd koz kug che yaog.

12 Yawd ved awg lawn su haq maq gha sir vid tug, Yer suq i hehd haq tawd hehnd chawa yaw vid che yaog.

13 Kheh te peg lehq, Yer suq keh thag lo taez che yaog. Yawd kug gad che chaw teq pa haq kug yug lehq, i hehd yawd geh kae che yaog. 14-15 I hehd awg khuhn, yawd geh chehd vid tug, ha lehg che bon khuhd ca mar vid tug, ned teq pa haq ghaq kog gha che kand pax pid tug, Yer suq yawd ved awg laq ghuhd te tug chaw teq chi ni ghad haq lez yug che yaog. Awg laq ghuhd teq chi ni ghad che teq pa awr lehr, cuh yad lehd Yer suq i hehd haq koz meh vid che yaog.

16 Yer suq kug yug lar che chaw teq chi ni ghad u ve teq pa awr lehr, Yer suq awg meh awg suhx Per troq lehd koz meh vid che Sid monr, 17 Yer ber dehd ve awg yad par Yar koq, Yar koq ve awg nax var Yod hanr, (ix mag haq awg meh awg suhx Bawd ner gehq meh vid che, cuhx kig awr lehr, muhd tawnr yad lehd koz gad che yaog), 18 Anr drehr, Phid liq, Bar thawd lar mehd, Mar thehr, Thod maq, Ar lar phehd ve awg yad par Yar koq, Thar dehd, muhd mig haq haq che awg mor haq caz daq che chaw Sid monr he lehq 19 Yer suq haq chid aq vid che phad Yud daq Id sar kar rir oq‡ 3:19 Id sar kar rir oq “Kid rid oq med yad” lehd koz gad che yaog. Ys 15:25 teq pa yaog.

20 Awg yand u ve haq, yawd yehg khuhn gehe che yaog. Chaw awg mor nux te pawz kawq phoz lag cheaq te lehq, i hehd awr liz cad ma tand che yaog. 21 Awg lawn u ve haq yawd ved awg ceng awg khad teq pa gha kad che te yand, Yawd ghud vehr che yaog lehz i hehd koz lehq kae lehq yawd haq ca sir khuhq veha che yaog.

22 Yer ruq sar lehnr med lo yaq che liq buhq var teq pa koz che, Yawd awr lehr Ber sar bud laq§ 3:22 Ber sar bud laq Ned jawd mawd Sar tanr haq koz che yaog. geh chehd che chaw phehq che yaog. Ned jawd mawd haq ghad va lehq ned teq pa haq yawd ghaq kog che yaog lehz i hehd koz che yaog.

23 Yawd i hehd haq kug lehq, tawd par hax te mar lehq koz che, “Sar tanr awr lehr Sar tanr haq khawd-ehg kheh te ghaq kog gha tuawg le. 24 Muhd mig te pez, yawd khad yawad ma cawd maq hawr daq ver, muhd mig u ve yeg maq gha. 25 Yehg ka liz, yawd khad yawad ma cawd maq hawr daq ver, yehg ka u ve yeg chehd maq gha. 26 Sar tanr yawd awg ton haq yawd kawq phuhz lehq phaz daq che ver, yawd liz yeg chehd maq gha. Yawd lug vehr sez vehr tug yaog.

27 Awg ghad hehnd che chaw haq awg kawd maq pheh teh lar ver, a sug lehd ma koz yawd ved yehg awg khuhn gehe lehq yawd ved med nged jeg kor haq hinx yug maq gha. Awg ghad hehnd che chaw haq pheh teh lar peg nuhr heh, yawd ved yehg khuhn lo gehe lehq med nged jeg kor haq hinx yug gha tug yaog.

28 Ngag nig hehd haq awg cehg mag koz ax laq, chaw yad teq pa te che vend bax awg gha lia he lehq Ghig sa haq maq sawnr ma caz kha koz kha yaw che awg gha lia haq phehd vid tug yaog. 29 Kheh ma khuhd, Daq che kehg che Awg ha phu haq maq sawnr ma caz koz che chaw a sug te ghad haq lehd ma koz, khar thad liz vend bax ma phehd vid hawg. Yawd co co taer taer vend bax cawg chehd che chaw phehq che yaog,” lehz Yer suq koz vid che yaog. 30 Yawd ned chaq chiz cawg che lehz i hehd koz cheaq te lehq, Yer suq che kheh koz che yaog.

31 Awg yand u ve haq, Yer suq ve awr ye he lehq awg nax var teq pa lag che yaog. I hehd awg bag phawd awr hox lar lehq Yer suq haq ca kug pe che yaog. 32 Chaw awg mor nux yawd haq kha caw yuhd mi chehd che yaog. I hehd yawd haq koz vid che, “Nawr ye he lehq nawg nax var teq pa nawg haq ca lehq awg bag phawd awr huh chehd chehd che yaog,” lehd koz vid che yaog.

33 Yer suq kawq koz che, “Ngar ye he lehq ngag nax var teq pa a suawg le,” lehz na ngawx che yaog. 34 Kha caw yuhd mi chehd che chaw teq pa haq yawd caw ngawx lehq koz che, “Chuhr huh chehd che chaw awr lehr, ngar ye he lehq ngag nax var teq pa yaog. 35 Ghig sa ve a lor haq kha te che chaw awr lehr, ngag nax var ngag nax ma he lehq ngag ved awr ye phehq che yaog,” lehz Yer suq koz vid che yaog.