1 Kheh te lehq, phawng daq chehd che chaw awg gha lia phoz tuag lehq, Yer suq haq jawd mawd Pid laq chehd lo pheh ve kae lehq, yawd haq vend bax tar lehq koz che, 2 “Chaw che phad yaog, ngag hehd ve chaw ceng haq kaod mar phuhz lehq, Jawd mawd nux Kehd sar haq awg khawnr maq gha ke vid tug te lehq, yawd awg ton Khreq lehd koz che jawd mawd te ghad yaog lehd koz tod che haq ngag hehd gha sir gha mawg che yaog,” lehd koz vid che yaog.

3 Kheh te lehq, jawd mawd Pid laq Yer suq haq na che, “Nawg awr lehr, Yud daq chaw teq pa ve jawd mawd yaog la,” lehd koz na lehq Yer suq koz che, “Yaog, nawg koz che heh yaog,” lehz Yer suq yawd haq kawq koz vid che yaog.

4 Kheh te lehq jawd mawd Pid laq koz vid che, “Chaw che ve phad teq chaweh te yaq kig haq ngag mad mawg,” lehz Ghig sa ve paw khod nux teq pa he lehq chaw awg gha lia haq koz vid che yaog.

5 Kheh liz, i hehd ghaq te maq heh ghaq hehnd kawq koz che, “Chaw che ve phad awr lehr, muhd mig yad haq kaod mar phuhz lag che Yud daq muhd mig kha peg te lar haz lehq chuhr huh Gar liq lehd muhd mig Yer ruq sar lehnr med huh kha gag gaeg che yaog,” lehd koz vid che yaog.

6 Tawd khuhd u ve haq jawd mawd Pid laq gha kad che te yand, “Yawd Gar liq lehd chaw yaog la,” lehd koz na ngawx che yaog. 7 Yer suq awr lehr, jawd mawd Her roq uq penr chehd che muhd mig khuhn chehd che haq jawd mawd Pid laq sir vehr lehq, jawd mawd Her roq chehd lo sir ve kae vid che yaog. Awg yand u ve khuhn jawd mawd Her roq liz Yer ruq sar lehnr med khuhn chehd chehd che yaog. 8 Jawd mawd Her roq awr lehr, Yer suq haq gha mawg che te yand ha lehg jad che yaog. Awg lawn ghod ver, yawd awg lawn haq gha kad jaw lehq yawd te mar che awg hez ted ceng cear haq gha mawag vawz gha hawg lehz yawd duhd law chehd cheaq te lehq, Yer suq haq mawg daq gad che muh chuhd vehr che yaog. 9 Kheh te lehq, yawd Yer suq haq tawd laex ceng na ngawx liz gha, Yer suq yawd haq tawd te khuhad liz mad kawq yaw khuhq vid che yaog. 10 Ghig sa ve paw khod nux he lehq liq buhq var u huh hox chehd che teq pa yawd haq vend bax hax ceh tar che yaog. 11 Jawd mawd Her roq he lehq yawd ved maq yad teq pa liz Yer suq haq maq sawnr ma caz te lehq koz gid ghig gid che yaog. U kheh te peg lehq, yawd haq jawd mawd ve beg ke daq jad che veq vid lehq, jawd mawd Pid laq chehd lo kawq sir kog pe che yaog. 12 U ve teq ni haq tanr lehq, jawd mawd Her roq he lehq jawd mawd Pid laq kawq cawd daq vehr che yaog. Awg lawn ghod ver, pong lag thad ix mag ma cawd daq te chehd che yaog.

13 Kheh te lehq jawd mawd Pid laq awr lehr, Ghig sa ve paw khod nux teq pa, awg hox chaw mawd teq pa he lehq chaw kheh ma ve haq kug phawng lehq koz vid che, 14 “Chaw che phad, muhd mig yad haq mar phuhz mar yaq che chaw lehd koz lehq nig hehd ngag chehd lo pheh vea lar che yaog. Ngag nig hehd kheh ma ve mehz khuhd suhr huh yawd haq na ngawx liz, nig hehd yawd haq koz lehq vend bax ca lar che heh, ngag yawd yaq kig teq chaweh liz mad mawg. 15 Jawd mawd Her roq liz yawd awg khuhn te yaq kig mad mawg lehq, yawd haq a nig chehd lo kawq pea che yaog. Ngawx lor, yawd suh kenr che vend bax teq chaweh liz maq te. 16 Kheh te cheaq te lehq, ngag yawd haq jawq lehq phehd vid tug yaog,” lehz i hehd haq koz vid che yaog.

18 Chaw awg mor nux tawd te khuhad lehax te kug tuhaz lehq koz che, “Che ve phad haq yug ve dawz vehr lehq, Bar rar baq haq vawr ngag hehd chehd lo phehd pea,” lehd koz che yaog. 19 Bar rar baq awr lehr, med u ve khuhn chaw phuhz te lehq, chaw haq dawz vehr cheaq te lehq, su yawd haq thawnr yehg khuhn pheh ke lar che yaog.

20 Jawd mawd Pid laq awr lehr, Yer suq haq phehd vid gad cheaq te lehq, i hehd haq te pawz kawq koz vid che yaog. 21 Kheh liz, i hehd teq pa kug lehq koz che, “Laq kan thag huh thaq vehor, yawd haq laq kan thag huh thaq vehor,” lehd koz che yaog.

22 Jawd mawd Pid laq sehr pawz te pawz kawq koz vid che, “A thoq maq haq te lehq le. Yawd haeg che a thoq ted ceng haq te cheawg le. Yawd awg khuhn suh lawq lawq ve toq ted cear liz ngag mad mawg. Kheh te cheaq te lehq, ngag yawd haq jawq lehq phehd vid tug yaog,” lehz i hehd haq koz vid che yaog.

23 Kheh te lehq, i hehd awg khuhd pehz hehnd mehz te kug lehq koz che, yawd haq laq kan thag huh thaq vehr lor lehd koz hax ceh kug cheaq te lehq, i hehd phawd awr ghad vehr che yaog. 24 Kheh te lehq jawd mawd Pid laq awr lehr, i hehd koz che heh te koz chez vid che yaog. 25 Kheh te lehq, yawd Bar rar baq muhd mig haq phuhz lehq su haq dawz vehr che phad haq phehd vid lehq, Yer suq haq i hehd te gad che heh te vid tug chid aq vid che yaog.

26 Yer suq haq maq yad teq pa sir ve tuhez tod-ag huh, kehaq lo chehd lehq med khuhn lag tod che Kud rer ner med yad Sid monr meh che te ghad haq i hehd yug lehq laq kan taz vid lehq Yer suq khaz nuhr ghaq kae vid che yaog.

27 Chaw awg mor nux yawd khaz nuhr ghaq tod lehq yad mid teq pa liz yawd haq har kax che khuhn ghaq paz huhg kehd huhg tod che yaog. 28 Yer suq i hehd haq kuhr phuhz ngawx lar lehq koz vid che, “Yer ruq sar lehnr ve yad mid teq paog, ngag haq har kax che khuhn tad huhg lor. Nig hehd a sug yawd khad awg ton haq he lehq nig hehd ve yad nehax dug nehax awg pun har kax che khuhn huhg lor. 29 Awg lawn ghod ver, teq ni ver che kheh koz tug yaog. ‘Chaw meh ma teq pa awr lehr, awg bon ir che yaog. Yad maq hu jaw che ux peg he lehq yad nehax maq nux jaw che cux pehz teq pa awr lehr, awg bon ir che yaog,’ lehd koz che awg ni awg hax gag tug yaog. 30  † 23:30 Hs 10:8Kheh te lehq, i hehd teq pa awr lehr, keh teq pa haq che kheh koz vid tug yaog. ‘Ngag hehd haq a cehax paz ter ax laoq.’ Keh nehax teq pa haq liz, ‘Ngag hehd haq a cehax hoz beh ax laoq,’ lehd koz vid tug yaog. 31 I hehd awr lehr, daq che thed che chaw haq liz kheh taw maq te gha cheawg lehr, mad daq ma thed che chaw teq pa haq ver, khawd-ehg taw maq teag lawg le,” lehd koz che yaog.* 23:31 Her lar saq liq awg khuhn che kheh koz buhq lar che yaog. “I hehd teq pa awr lehr, a suhz awg cehd maq haq che kheh taw te ver, a suhz awg vi ghod haq ver khawd-ehg taw maq teag lawg le,” lehd koz che yaog.

32 Kheh te lehq yawd geh teq geha dawz vehr tug liz, chaw haeg ni ghad sir vea che yaog. 33 A kor ghuhd lehd koz che chehd kig lo gaeg lehq, i hehd yawd haq laq kan thag huh thaq ke lar che yaog. Chaw haeg u ve ni ghad liz, yawd ved laq yaq awr te ghad he lehq laq vehr awr te ghad laq kan thag huh thaq ke lar che yaog. 34 Kheh te lehq Yer suq koz che, “A pa-og, i hehd ve vend bax haq phehd vid-oq. Awg lawn ghod ver, i hehd khawd-ehg kheh te chehd che haq i hehd maq sir che yaog.”

U kheh te peg khaz nuhr, i hehd teq pa Yer suq ve veq kad pehg daq yug tug nar bar kehx yug che yaog. 35 Chaw kha peh vad-ag phoz hox lar lehq ngawx chehd che yaog. Yud daq chaw ve awg hox teq pa awr lehr, yawd haq koz gid ghig gid lehq koz che, “Su haq ver yawd pong vid gha che yaog. Yawd awr lehr, Khreq lehd koz che Ghig sa lez yug lar che chaw te ghad-awg lehd koz ver, yawd awg ton haq yawd kawq te pong ngawx vid,” lehd koz che yaog.

36 Maq yad teq pa liz yawd haq koz gid ghig gid lehq, a pehx med ghig ce maq te che taw vid lehq koz che, 37 “Nawg awr lehr, Yud daq chaw teq pa ve jawd mawd-awg lehd koz ver, nawg awg ton haq gha pong vid tug teo,” lehd koz vid che yaog.

38 Yawd thang huh liz “Chaw che phad awr lehr, Yud daq chaw teq pa ve jawd mawd yaog,” lehd koz buhq nehx lar che yaog.

39 Kheh te lehq, laq kan haq thaq ke lar che chaw haeg te ghad koz che, “Nawg Khreq ma hez lehq la. Nawg awg ton haq liz, ngag hehd haq liz te pong ax laoq,” lehz Yer suq haq maq sawnr ma caz te koz gid che yaog.

40 Te ghad kawq koz che, “Nawg heh te lehq, su suhx taz lar che haq yawd liz gha khanr chehd cheaq te lehq nawg Ghig sa haq ma kuhz lehq la. 41 Awd nag che kheh te gha khanr cheawg lehr cawd vehr che yaog. Awg lawn ghod ver, awd nag te yaq cheaq te lehq, khanr kenr khanr cawd che heh gha khanr che yaog. Kheh te lar, chaw che phad vawr, teq chaweh liz maq te yaq hawg,” lehd koz lehq ded vid che yaog. 42 Kheh te peg lehq, yawd Yer suq haq lawg khawx lehq koz che, “Yer suq-og, nawg ved muhd mig khuhn gehe che te yand, ngag haq liz a cehax duhd nuhad laoq,” lehd koz vid che yaog.

43 Yer suq yawd haq kawq koz vid che, “Ngag nawg haq awg cehg mag koz ax laq, yaq ni nawg ngag geh teq geha Par rar tid suq† 23:43 Par rar tid suq Daq kehg thed cawd che co ha ghad jehg kig. khuhn gha chehd tug yaog,” lehz yawd haq koz vid che yaog.

44-45 Awg yand u ve awr lehr, a lag teq khawr lehnd te lehq muhd phiq phawd awr sehr nar lir kha gag, muh ni awg ghiz liz mehx vehr lehq, mig giaq lo awg naz tud awg naz hoq phehq vehr che yaog. Yer ruq sar lehnr bon yehg nux khuhn kor lar che pha u ve liz, awg kaw jen khod vehr che yaog. 46 Kheh te lehq, Yer suq awg khuhd pehz hehnd mehz te kug lehq koz che, † 23:46 Chid 31:5“A pa-og, ngag ved co ha nawg ved laq kuhr khuhn chid aq ax che yaog,” lehd koz che yaog. Yawd che kheh koz lar haz lehq sax chez vehr che yaog.

47 Awg ceng che teq pa haq maq por te ghad gha mawg lehq koz che, “Chaw che phad awr lehr, awg cehg mag thed che cawd che chaw te ghad yag lo,” lehz yawd koz lehq Ghig sa haq chid muh che yaog.

48 Kheh te lehq, lag phoz ngawx chehd che chaw teq pa awr lehr, i hehd awg ceng u ve teq pa haq gha mawg che te yand duhd har gad har che khuhn a sug yawd ni ma pi tha hiz lar haz lehq kawq veh che yaog. 49 Yawd haq kha sir che chaw awg gha lia he lehq Gar liq lehd muhd mig loar te lehq yawd khaz nuhr ghaq tod che yad mid ma teq pa liz a cehax vid-ag lo hox lar ngawx chehd che yaog.

50-51 Awg yand u ve haq, Yud daq muhd mig khuhn cawg che Ar riz mar thehr med lo lag che Yod sehq meh che chaw te ghad cawg che yaog. Yawd awr lehr, daq che thed che cawd che chaw te lehq, Ghig sa ve muhd mig haq duhd law chehd che chaw te ghad yaog. Yawd awr lehr, Yud daq chaw teq pa khuhn chehd che awg hox jehg daq var awg mor khuhn chehd liz, i hehd jehg chez lehq te lar che haq ni ma ma cawd che yaog. 52 Yawd jawd mawd Pid laq chehd lo kae lehq, Yer suq ve awg ton haq ca lawg yueg che yaog. 53 Yer suq ve awg ton haq yug yaq lehq, pha phua daq maq awg phuhd khaz jad che yug thiz peg lehq, te ghad-eg liz maq tur jaw ser che huhx meh thuhz lar che tur phuh khuhn ke teh lar che yaog. 54 Awg ni u ve awr lehr, ngad ni haq cawd lehq Sa ba to awg ni haq ver, jehd tug te law che awg ni teq ni gaeg che yaog.

55 Gar liq lehd muhd mig loar te lehq Yer suq khaz nuhr ghaq tod che yad mid teq pa liz ghaq kae lehq, tur phuh he lehq yawd awg ton haq loar khawd-ehg te tar vehr che haq i hehd gha mawg che yaog. 56 Kheh te lehq, i hehd teq pa koeq lehq sa huhx teq pa he lehq nag huhx teq pa haq te lar che yaog.

Awg lid tawd khuhd cawg lar che heh, Sa ba to awg ni teq ni haq i hehd ghad jehd che yaog.