1 Kheh te cheaq te lehq, a nig yonr che awg khuhn thed che cawd che chaw phehq vehr che haq te lehq, a nig awr lehr a nig ved Jawd mawd Yer suq Khreq haq cud lehq, Ghig sa haq kawq cawd daq hawr daq che yaog. 2 Jawd mawd Yer suq Khreq haq te lehq awg bon che awg khuhn a nig gha gehag lehq* 5:2 a nig gha gehag lehq Khreq yad gha phehaq che haq koz che yaog. gha chehd chehd che yaog. Ghig sa ve awg mig awg phond haq a nig duhd law lehq, ha lehg chid muh chehd che yaog. 3 Kheh te lehq, tuq che khanr che† 5:3 tuq che khanr che Yonr che haq lawnd ngawx che awg ceng te che yaog. Yk 1:2-3 haq a nig gha khanr che te yand, lex lehq ha lehg chid muh chehd che yaog. Awg lawn ghod ver, tuq che khanr che haq te lehq a nig yeg khanr vix-ag che yaog. 4 Yeg khanr vix che haq te lehq Ghig sa a lor cawd che a saq teq khad haq caw-ag che yaog. Ghig sa a lor cawd che a saq teq khad cawg cheaq te lehq, a nig duhd law kig cawg che haq sir che yaog. 5 Duhd law kig che ve haq te lehq ni ma lug tug ma hez. Awg lawn ghod ver, a nig haq pehar lar che Daq che kehg che Awg ha phu awr lehr, a nig ved ni ma awg khuhn Ghig sa ve haq pehnd che ted ceng nger kea peor.

6 A nig awg ghad nud jad chehd ser che te yand, awg yand cawd che‡ 5:6 awg yand cawd che Ghig sa chaw yad haq thaer khuhq vid tug koz lar che awg yand haq koz che yaog. Mk 1:15, Gal 4:4 awg khuhn, chaw haeg teq pa awg pun Khreq khanr suh vehr che yaog. 7 Thed che cawd che chaw awg pun khanr suh tug chaw ca har jad che yaog. Te pawz pawz ax ver chaw daq awg pun khanr suh pir che chaw te ghad ghad cawg tug yaog lehg. 8 Kheh ma khuhd, a nig vend bax yad phehq chehd che te yand huh, Khreq a nig awg pun khanr suh lehq, Ghig sa yawd a nig haq khawd-ehg taw maq haq che kha sehax mawa che yaog. 9 Khreq ve awg suhr haq te lehq, a meha a nig thed che cawd che chaw phehq vehr che yaog. Kheh te cheaq te lehq, che haq keh lex lehq yawd haq te lehq Ghig sa nez nag che haq liz, a nig gha pong tug yaog. 10 Awg lawn ghod ver, a nig yawd ved cand par phehq chehd che§ 5:10 yawd ved cand par phehq chehd che Chaw yad vend bax te che haq te lehq, Ghig sa ve cand par phehq vehr che yaog. te yand, yawd ved Yad phu suh che haq te lehq, a nig Ghig sa haq kawq cawd daq hawr daq vehr che yaog. Che haq keh lex lehq, a nig kheh te yawd haq cawd daq hawr daq vehr che ver, Yad phu teq chehd che haq te lehq Ghig sa ve cir yanr che khuhn a nig haq pong ax tug yaog. 11 Che kheha lehax ma hez ser. A nig ved Jawd mawd Yer suq Khreq haq te lehq Ghig sa haq ha lehg chid muh chehd che yaog. Yawd haq te lehq a nig Ghig sa haq kawq cawd daq hawr daq vehr che yaog.

12 Kheh te cheaq te lehq, chaw te ghad haq te lehq* 5:12 chaw te ghad haq te lehq Ar danr haq te lehq lehd koz gad che yaog. mig gig khod-aq lo vend bax gehag lehq, vend bax haq te lehq suh che ted ceng cawag che† 5:12 suh che ted ceng cawag che Awg ton suh che lehax ma hez. Co ha suh lehq co co taer taer Ghig sa haq gha phaz daq che haq koz che yaog. yaog. Kheh te lehq, chaw awg gha lia vend bax te vehr che haq te lehq, chaw awg gha lia awg khod-aq suh che ted ceng cawag che yaog. 13 Awg lid tawd khuhd maq teh ser thad loar, mig gig khod-aq lo vend bax cawg lar che yaog. Kheh ma khuhd, awg lid tawd khuhd mad cawg ser che awg yand awg khuhn, vend bax maq tar ser. 14 Kheh ma khuhd, Ar danr haq tanr lehq Mod ser ve awg coaq kha gag, suh che ted ceng uq penr chehd che yaog. Chaw u ve teq pa te yaq che awr lehr, Ar danr te yaq che haq maq sur daq liz, suh che ted ceng i hehd haq uq penr chehd che yaog. Ar danr u ve te ghad awr lehr, awg khaz nuhr lag tug chaw te ghad‡ 5:14 awg khaz nuhr lag tug chaw te ghad Yer suq haq koz che yaog. ve awg hez phehq che yaog.

15 Kheh ma khuhd, te yaq che u ve awr lehr kheha pehar che awg bon haq maq sur daq. Awg lawn ghod ver, chaw te ghad te yaq cheaq te lehq, chaw mad awr gha suh che ver, Ghig sa ve awg bon he lehq Yer suq Khreq lehd koz che chaw te ghad ve awg bon haq te lehq kheha pehar che awg bon awr lehr, chaw kha peh vad-ag awg pun lex lehq kawq mad-ag che yaog. 16 Kheh te lehq, chaw te ghad te yaq che haq te lehq phehaq che ted ceng awr lehr, kheha pehar che awg bon§ 5:16 kheha pehar che awg bon Thaer khuhq che awg bon haq koz che yaog. haq maq sur daq. Awg lawn ghod ver, te pawaz lehax te yaq che khaz nuhr suhx jehg che ted ceng awr lehr, cir yanr che haq gha khanr che yaog. Kheh ma khuhd, te yaq mad jad che khaz nuhr kheha pehar che awg bon awr lehr, thed che cawd che chaw phehaq vid che yaog. 17 Awg lawn ghod ver, chaw te ghad te yaq lehq, te yaq che phad u ve te ghad haq te lehq suh che ted ceng uq penr ver, mad jad che awg bon he lehq thed che cawd che laq sawnr haq gha che chaw teq pa awr lehr, Yer suq Khreq te ghad haq te lehq teq che awg khuhn lex lehq gha uq penr tug yaog.

18 Kheh te cheaq te lehq, chaw te ghad te pawz lehax te yaq che haq te lehq chaw awg gha lia cir yanr che haq gha khanr che yaog. Che heh te lehq, chaw te ghad te pawz lehax thed che cawd che haq te cheaq te lehq, chaw awg gha lia thed che cawd che chaw phehaq lehq co ha gha teq che yaog.* 5:18 co ha gha teq che yaog Yer suq haq yonr che chaw haq lehax koz gad che yaog. 19 Awg lawn ghod ver, chaw te ghad maq na yug che haq te lehq, chaw kha peh vad-ag vend bax yad phehq vehr che yaog. Che heh te lehq, chaw te ghad na yug che† 5:19 chaw te ghad na yug che Yer suq haq koz che yaog. Phi 2:8, Isy 53:11 haq te lehq, chaw kha peh vad-ag thed che cawd che chaw phehaq tug yaog. 20 Yaq che jiz che teq pa mad-ag tug, awg lid tawd khuhd gehag che‡ 5:20 awg lid tawd khuhd gehag che Awg lid tawd khuhd haq te lehq, a nig vend bax cawg che haq sir vehr che yaog. 4:15 yaog. Kheh ma khuhd vend bax mad-ag che ted kag huh awg bon lex lehq kawq mad-ag che yaog. 21 Che ve awr lehr, suh che haq cud lehq vend bax uq penr che heh, a nig ved Jawd mawd Yer suq Khreq haq te lehq a nig co co taer taer teq gha tug, awg bon ted ceng liz thed che cawd che haq cud lehq uq penr tug awg pun yaog.