3
1 Kheh te lehq Yud daq chaw ted ceng awr lehr, su haq keh awg bon khawd-ehg kheh te cawg lex cheawg le. Awg gig med soer che ted ceng awr lehr, a thoq haq awg bon cawag le. 2 Awg ceng gha lia awg khuhn awg bon cawg mad che yaog. Awg kawd ted ceng awr lehr, Ghig sa yawd ved tawd khuhd teq pa Yud daq chaw teq pa haq pid che yaog. 3 I hehd ted pehg pehar kar tiq mad yeg liz, a thoq ted ceng koz tug cawar le. I hehd kar tiq mad yeg cheaq te lehq, Ghig sa ve kar tiq haq te lug che la. 4 Maq te lug tag. Chaw awg gha lia her ka var phehq liz, Ghig sa awr lehr awg cehg mag thed che yaog. Liq phu khuhn buhq lar che heh,
† 3:4 Chid 51:4Nawg awr lehr awg cehg mag cawd che yaog lehz,
nawg ved tawd khuhd sax khiz khanr che yaog.
Su nawg haq suhx jehg suhx taz thad liz, nawg ghad tug yaog,
lehd koz buhq lar che yaog.
5 Kheh ma khuhd, a nig ved ma thed ma cawd che ted ceng awr lehr, Ghig sa ve thed che cawd che* 3:5 Ghig sa ve thed che cawd che A nig te yaq che haq cir yanr ax che ted ceng awg khuhn, Ghig sa yawd khawd-ehg ma thed che cawd che haq pheq mawa lar che yaog. ted ceng haq te tuhaz vid ver, koz kig khawd-ehg kheh te cawag le. Ghig sa a nig haq nez nag lehq cir yanr ax che awr lehr, ma thed ma cawd che haq tea che ma hez hawg la. (Tawd che te khuhd awr lehr, chaw yad koz che heh ngag koz che yaog.) 6 Che kheh ma hez. Tawd che te khuhd cawd che ver, Ghig sa awr lehr mig gig yad haq khawd-ehg kheh te suhx jehg suhx taz gha tuawg le.
7 Ngag her ka che haq te lehq Ghig sa ve thed che cawd che ted ceng haq lex lehq awg mig awg phond cawag vid che ver, a thoq te ngag haq vend bax yad phehq che yaog lehz suhx jehg suhx taz chehd ser-a le. 8 Ma hez ver, a thoq te lehq daq che tuhaz tug a nig mad daq che haq te sar lehz ma koz hawg le. A nig che kheh koz che yaog lehz chaw ted pehg pehar khaex chehd che law. U kheh koz che chaw teq pa cir yanr che haq gha khanr che awr lehr cawd che yaog.
Thed che cawd che chaw mad cawg
9 Kheh te lehq, a nig Yud daq chaw teq pa su haq keh daq cheawg la. Ma hez. Awg lawn ghod ver, Yud daq chaw lehd ma koz, Her lar saq chaw lehd ma koz, chaw awg gha lia vend bax ve kand pax awg huhx chehd che† 3:9 vend bax ve kand pax awg huhx chehd che Rm 5:12, 11:32, Gal 3:22 yaog lehz, ngag te pawz koz lar peor. 10 Liq phu khuhn buhq lar che heh,
† 3:10-12 Chid 14:1, 53:1-3“Thed che cawd che chaw mad cawg,
te ghad-eg liz mad cawg che yaog.
11 Sir che chaw‡ 3:11 Sir che chaw Ghig sa haq sir che chaw haq koz che yaog. te ghad-eg liz mad cawg.
Ghig sa haq ca che chaw te ghad-eg liz mad cawg.
12 Chaw awg gha lia yaq kaw yaq vehr che yaog.
I hehd teq pa teq geha
awg bon mad cawg che chaw phehq vehr che yaog.
Daq che kanx haq te che chaw mad cawg, te ghad-eg liz mad cawg che yaog.
13 † 3:13a Chid 5:9I hehd ve kuhq khuh awr lehr,
phaw lar che tur phuh§ 3:13 phaw lar che tur phuh Ni ma awg khuhn chaq chiz jad che haq koz gad che yaog. heh te che yaog.
I hehd ve ha lez awr lehr, her ka che yaog.
† 3:13b Chid 140:3I hehd ve med gig
awg khuhn phawd awr huh vig haeg awg tuhq ma cawg che yaog.
14 † 3:14 Chid 10:7I hehd ve mawq kaw awg khuhn khen che khuhd he lehq
ni ma nag che khuhd kha peh vad-ag cawg che yaog.
15 † 3:15-17 Isy 59:7-8Su ved awg suhr yug sez tug i hehd ve khi kud gehg jad che yaog.
16 I hehd kha kae kig lo, su awg pun
lug tug sez tug he lehq duhd har gad har tug lehax cawg che yaog.
17 Duhd sa gad sa che yaq kaw haq i hehd maq sir.
18 † 3:18 Chid 36:1I hehd awg khuhn lo,
Ghig sa haq kuhz che* 3:18 Ghig sa haq kuhz che Tar ir yawz yan che haq koz che yaog. Khiz 20:11 ni ma mad cawg,”
lehd koz buhq lar che yaog.
19 Awg lid tawd khuhd awg khuhn kha koz lar che tawd teq pa awr lehr, awg lid tawd khuhd awg huhx lo chehd che chaw teq pa haq koz vid che yaog lehz a nig sir che yaog. Kheh te cheaq te lehq, chaw awg gha lia tawd te khuhad liz kawq yaw tug mad cawg lehq, mig gig yad awg gha lia Ghig sa mehz khuhd suhr huh suhx jehg suhx taz che haq gha khanr kenr che yaog. 20 Awg lawn ghod ver, awg lid tawd khuhd haq na yug cheaq te lehq, Ghig sa mehz khuhd suhr chaw te ghad-eg liz thed che cawd che chaw phehaq tug ma hez. Awg lawn ghod ver, awg lid tawd khuhd haq te lehq vend bax cawg che haq gha sir che yaog.
Yonr che haq te lehq thed che cawd che chaw phehaq che
21 A meha awr lehr, awg lid tawd khuhd haq ma caz daq che† 3:21 awg lid tawd khuhd haq ma caz daq che Yer suq haq yonr cheaq te lehq gha che awg bon haq koz che yaog. awg khuhn, Ghig sa lo lag che thed che cawd che awg ceng haq gha mawg peg che yaog. Awg lawn che ve haq awg lid tawd khuhd liq teq pa he lehq cuh kar var teq pa ve liq teq pa awg khuhn sax khiz khanr lar peor. 22 Yer suq Khreq haq kha yonr che chaw awg gha lia awr lehr, yonr cheaq te lehq Ghig sa ve thed che cawd che ted ceng haq gha che yaog. Pen daq kig mad cawg. 23 Awg lawn ghod ver, chaw awg gha lia vend bax te lehq daq jad che Ghig sa ve a lor haq te maq gha che yaog. 24 Awg phuhd ma pid lehq, yawd ved awg bon haq te lehq thed che cawd che chaw phehaq che yaog. Thed che cawd che chaw phehq vehr che awr lehr, Yer suq Khreq thaer khuhq ax che haq te lehq yaog. 25 Yer suq ve awg suhr haq te lehq kha yonr che chaw teq pa haq vend bax phehd kha tug, Yer suq awr lehr tand tug phehq che yaog lehz, Ghig sa yawd haq teh lar che yaog. Che ve awr lehr, Ghig sa thed che cawd che ted ceng haq te mar ax che yaog. Awg lawn ghod ver, Ghig sa yawd ved yeg khanr vix che awg khuhn, pong lag thad chaw yad te yaq che vend bax teq pa haq maq cir yanr ser che yaog. 26 Yawd che kheh te che awr lehr, a meha ve awg yand awg khuhn yawd awr lehr, thed che cawd che yaog lehz su haq pheq maw vid che yaog. Kheh te cheaq te lehq, yawd suhx jehg suhx taz che awr lehr, thed cawd lehq Yer suq haq kha yonr che chaw teq pa haq thed che cawd che chaw phehaq vid sehr phad liz yawd phehq che yaog.
27 Kheh te lehq, ni ma ir kig khar lo cawar le. Ni ma ir kig mad kawq cawg.‡ 3:27 Ni ma ir kig mad kawq cawg Thaer khuhq che haq gha tug yonr che khuhn kanx te che haq koz che yaog. Ef 2:8 A thoq ted ceng haq te lehq mad kawq cawag le. Kanx te che haq te lehq la. Ma hez, yonr che haq te lehq yaog. 28 Awg lawn ghod ver, awg lid tawd khuhd ve kanx haq ma caz daq lehq, yonr che haq lehax te lehq chaw te ghad awr lehr thed che cawd che chaw phehaq che yaog lehz a nig sawnr lar che yaog. 29 Ghig sa awr lehr, Yud daq chaw teq pa ve Ghig sa lehax phehq cheawg la. Yawd awr lehr, bid saz a naz chaw teq pa ve Ghig sa liz phehq che ma hez hawg la. Yaog, bid saz a naz chaw teq pa ve Ghig sa liz phehq che yaog. 30 Awg lawn ghod ver, Ghig sa te ghad lehax cawg che§ 3:30 Ghig sa te ghad lehax cawg che Bon 6:4, Gal 3:20 yaog. Awg gig med soer che chaw teq pa yonr che haq te lehq, Ghig sa i hehd haq thed che cawd che chaw lehz sawnr lar tug yaog. Awg gig med maq soer che chaw teq pa liz, yonr che haq te lehq yawd i hehd haq thed che cawd che chaw lehz sawnr lar tug yaog. 31 Kheh te lehq, yonr che haq te lehq a nig awg lid tawd khuhd haq te lug che la. Maq te lug. Awg lid tawd khuhd haq lex lehq yeg chehd vid tug a nig te che yaog.* 3:31 yeg chehd vid tug a nig te che yaog Yonr che awg khuhn kanx te ver, awg lid tawd khuhd haq peh lawq vid che ted ceng yaog. Rm 4 haq ngawx.
†3:4 3:4 Chid 51:4
*3:5 3:5 Ghig sa ve thed che cawd che A nig te yaq che haq cir yanr ax che ted ceng awg khuhn, Ghig sa yawd khawd-ehg ma thed che cawd che haq pheq mawa lar che yaog.
†3:9 3:9 vend bax ve kand pax awg huhx chehd che Rm 5:12, 11:32, Gal 3:22
†3:10 3:10-12 Chid 14:1, 53:1-3
‡3:11 3:11 Sir che chaw Ghig sa haq sir che chaw haq koz che yaog.
†3:13 3:13a Chid 5:9
§3:13 3:13 phaw lar che tur phuh Ni ma awg khuhn chaq chiz jad che haq koz gad che yaog.
†3:13 3:13b Chid 140:3
†3:14 3:14 Chid 10:7
†3:15 3:15-17 Isy 59:7-8
†3:18 3:18 Chid 36:1
*3:18 3:18 Ghig sa haq kuhz che Tar ir yawz yan che haq koz che yaog. Khiz 20:11
†3:21 3:21 awg lid tawd khuhd haq ma caz daq che Yer suq haq yonr cheaq te lehq gha che awg bon haq koz che yaog.
‡3:27 3:27 Ni ma ir kig mad kawq cawg Thaer khuhq che haq gha tug yonr che khuhn kanx te che haq koz che yaog. Ef 2:8
§3:30 3:30 Ghig sa te ghad lehax cawg che Bon 6:4, Gal 3:20
*3:31 3:31 yeg chehd vid tug a nig te che yaog Yonr che awg khuhn kanx te ver, awg lid tawd khuhd haq peh lawq vid che ted ceng yaog. Rm 4 haq ngawx.