1 Sa ba to awg ni peg che* 16:1 Sa ba to awg ni peg che Khuhq ni muhd phiq 6 nar rir thad Sa ba to awg ni peg che yaog. te yand, Mar riq Mar gar dar laq, Yar koq ve awr ye Mar riq he lehq Sar lor mer teq pa awr lehr, Yer suq ve awg ton haq ca puhr vid tug san huhx vig che yaog. 2 Teq sinx awg khuhn lo awg kawd maq teq ni† 16:2 awg kawd maq teq ni A meha a nig ved sinx ni haq koz che yaog. nag mi sawx ted naq muhd ni tuhaz che te yand, i hehd tur phuh lo kae che yaog. 3 Kheh te lehq i hehd awr lehr, “Tur phuh awg khod med huh chuhd lar che huhx meh haq a nig haq a sug phuhz kha ax tuawg le,” lehz te ghad he lehq te ghad koz daq che yaog. 4 I hehd chid ngawx che te yand, huhx meh u ve phuhz kha lar che haq gha mawg che yaog. Huhx meh u ve awr lehr ir jad che yaog. 5 Tur phuh awg khuhn i hehd gehe che te yand, phux-u ghad te che a poq yehg maq veq lar che chaw hax var te ghad laq yaq awr pax awr huh mi chehd che haq gha mawg lehq i hehd kuhz jad che yaog.

6 Yawd i hehd haq koz vid che, “Ta kuhz. Laq kan thag huh thaq vehr che Nar sar rehq chaw Yer suq haq nig hehd ca tod che haq ngag sir che yaog. Yawd kawq teq tuag vehr che yaog. Yawd chuhr huh ma chehd. Yawd haq teh lar kig huh ca ngawx laoq. 7 Kheh ma khuhd nig hehd kae lehq, yawd ved awg laq ghuhd teq pa he lehq Per troq haq che kheh koz vid-oq. Nig hehd haq keh awg kawd Gar liq lehd muhd mig lo yawd kae tug yaog. Yawd nig hehd haq koz ax lar che heh,‡ 16:7 koz ax lar che heh 14:28 haq ngawx. u huh nig hehd yawd haq gha mawg tug yaog,” lehz i hehd haq koz vid che yaog.

8 Yad mid u ve teq pa awr lehr, tur phuh khuhn tuhaz lehq, kuhz ched lehq and jad che awg khuhn i hehd cex koeq che yaog. I hehd kuhz jad cheaq te lehq, te ghad-e haq liz ma koz vid.

9 Teq sinx awg khuhn awg kawd maq teq ni nag mi sawx ted naq Yer suq kawq teq tuag peg khaz nuhr yawd awg ton Mar riq Mar gar dar laq* 16:9 Mar riq Mar gar dar laq 15:40 haq ngawx. haq awg kawd maw vid che yaog. Yad mid u ve awr lehr, pong lag thad ned suhr kheh geh chehd che haq Yer suq ghaq kog vid jaw che yad mid te ghad phehq che yaog. 10 Yer suq geh chehd jaw che chaw teq pa duhd har gad har lehq huhg chehd che te yand, Mar riq kae lehq i hehd haq koz vid che yaog. 11 Yer suq teq chehd lehq Mar riq yawd haq gha mawg che awg lawn i hehd gha kad che te yand, maq yonr.

12 U ve awg khaz nuhr, i hehd awg khuhn chaw ni ghad† 16:12 chaw ni ghad Lk 24:13-35 haq ngawx. khaz khuhn kawq koeq tod-ag huh, yawd awg hoq awg han pa vehr che awg khuhn yawd awg ton ix mag haq maw vid che yaog. 13 Ix mag kawaq lehq, chehd lar haz che chaw teq pa haq koz vid che liz i hehd maq yonr.

14 U ve awg khaz nuhr, cuh yad teq chi te ghad awr mi cad chehd che te yand, yawd awg ton i hehd haq maw vid che yaog. I hehd maq yonr vix che he lehq ni ma liz heh che haq te lehq, yawd i hehd haq ded vid che yaog. Awg lawn ghod ver, yawd kawq teq tuag peg khaz nuhr, yawd haq gha mawg che chaw teq pa ve khuhd haq i hehd maq yonr cheaq te lehq yaog. 15 Kheh te lehq, yawd i hehd haq koz vid che, “Mig gig khod-aq awg kag gha lia lo kae lehq chaw awg gha lia haq ha lehg che bon khuhd ca mar vid-oq. 16 Yonr lehq baz tiz sar khanr yug che chaw awr lehr, thaer khuhq che haq gha tug yaog. Maq yonr che chaw awr lehr, cir yanr che haq gha khanr tug yaog. 17 Yonr che chaw teq pa awg khuhn awg hez che teq pa haq gha mawg tug yaog. Ngag ved awg meh haq cud lehq, ned teq pa haq i hehd ghaq kog tug yaog. I hehd tawd laex ceng khuhd te yaw vid tug yaog. 18 I hehd awr lehr, vig teq pa haq yug gha tug yaog. Awg tuhq ma haq dawg che liz, i hehd teq chaweh mad phehq. Chaw nag teq pa awg thag lo i hehd laq kuhr tar lehq chaw u ve teq pa na vid tug yaog,” lehz Yer suq koz vid che yaog.

19 Kheh te lehq, Jawd mawd Yer suq i hehd haq u kheh koz vid peg khaz nuhr, Ghig sa yawd haq muhd nuh maq lo chid taez lehq, Ghig sa ve laq yaq awr pax awr‡ 16:19 laq yaq awr pax awr Awg mig awg phond cawg che chehd kig haq koz gad che yaog. 14:62 huh yawd mi chehd che yaog. 20 Awg laq ghuhd teq pa liz tuhz kae lehq awg kag gha lia lo bon khuhd ca mar vid che yaog. Jawd mawd Ghig sa awr lehr i hehd geh kanx te lehq awg hez teq pa te tuhaz che awg khuhn, bon khuhd u ve haq yeg chehd lar vid gha che yaog.