4
དཀོན༌མཆོག༌གི༌ ཉེ༌མོའ༌ ཡོང༌ཅེས༌།
4:1 ནེ༌ 10
1 ཁྱོ༌ཞ༌གུན༌ནི༌ ཕྲོའ༌ ཛིང༌མོ༌ དང༌ ནོལ༌ཅེས༌ གུན༌ ཅིའི༌ ཞས༌ཏེ༌ ཡོང༌དུག༌? ཅི༌ ཏེ༌གུན༌ ཁྱོ༌ཞ༌གུན༌ནི༌ དོད༌པ༌གུན༌ནི༌ ཀ༌ནེ༌ ཡོང༌ང༌ མ༌ནོག༌ག༌, ཀ༌གུན༌ ཁྱོ༌ཞའེ༌ གྱབ༌གལ༌ལ༌ ནོལ༌ཨིན༌ ཡོད༌? 2 མེད༌ཁན༌གུན༌ ཁྱོ༌རང༌ང༌ གོས༌ པ༌སང༌, ཏེ༌བོ༌ ཐོབ༌ཅེས༌སི༌ ཕིའ༌ སད༌ད༌ནོག༌། ཞན༌མ༌གུན༌ལ༌ ཡོད༌ཁན༌བོའེ༌ཀ༌ ཁྱོ༌རང༌ང༌ དོད༌པ༌ སྲན༌ཏྲེ༌ ཡོད༌ཏེ༌ ཏེ༌བོ༌ མ༌ཐོབ༌ པ༌སང༌, ཁྱོ༌རང༌ངི༌ ཁོང༌གུན༌ ཉམ༌པོ༌ ཛིང༌མོ༌ ཏངས༌ཏེ༌ ནོལ༌ལ༌ནོག༌། ཁྱོ༌རང༌ངི༌ དོད༌པ༌ ཡོད༌ཁན༌གུན༌ ཁྱོ༌རང༌ང༌ མེད༌པ༌ ཨིན༌ནོག༌, ཅིའ༌ཟེར༌ན༌ ཁྱོ༌རང༌ངི༌ ཏེ༌བོའེ༌ཕིའ༌ དཀོན༌མཆོག༌ག༌ ཞུ༌ཝ༌ མ༌ཕུལ༌ལ༌ ཨིན༌ནོག༌། 3 ཡང༌ ཁྱོ༌རང༌ངི༌ ཞུ༌ ཟ༌ནེ༌, ཁྱོ༌རང༌ང༌ ཐོབ༌བ༌ མ༌ནོག༌ ཅིའ༌ཟེར༌ན༌ ཁྱོ༌རང༌ངི༌ ཏོན༌ ངན༌པ༌ ཉམ༌པོ༌ ཞུས༌ཏེ༌ ཨིན༌ནོག༌, ཀ༌བོ༌ ཁྱོ༌རང༌ངི༌ རང༌ང༌ སྐྱིད༌པོ༌ ཐོབ༌ཅེས༌སི༌ ནང༌ང༌ ཀོལ༌ལ༌ནོག༌།
4 ཏད༌པ༌ མེད༌ཁན༌ནི༌ མི༌གུན༌, ཇིག༌རྟེན༌ནི༌ ཨིན༌ཁན༌གུན༌ལ༌ ཡ༌ཤ༌ ཅོ༌ཅེས༌པོ༌ དཀོན༌མཆོག༌ག༌ ནཕ༌རད༌ ཅོས༌ཏེ༌ ཨིན༌ཁན༌བོ༌, ཁྱོ༌ཞ༌གུན༌ལ༌ གྱུས༌མེད༌ད༌? ཡང༌སྐྱར༌ ཟེར༌རད༌, ཇིག༌རྟེན༌ ཉམ༌པོ༌ ཛ༌འོ༌ ཅོ༌ཅེས༌ལ༌ ཐད༌ཁན༌གུན༌, དཀོན༌མཆོག༌གི༌ གྲ༌འོ༌ གྱུར༌ཏེ༌ ཨིན༌ནོག༌། 5 ཁྱོ༌ཞའེ༌ དམ༌པའེ༌ སུང༌རབས༌སི༌ ནང༌ང༌ "དཀོན༌མཆོག༌གི༌ ང༌དང༌གུན༌ནི༌ ནང༌ང༌ སེམས༌ཉིད༌པོ༌ སལ༌ལ༌ ཛད༌ པ༌སང༌, ཁོང༌ངི༌ ང༌དང༌གུན༌ ཁོང༌ ཅིག༌པོའེ༌ ཨིན༌ཅེས༌པོའ༌ མ༌སྲན༌ཏྲེ༌ ཐུགས༌དོད༌ ཛད༌ད༌ནོག༌" མོལ༌ཁན༌བོའ༌ ཏོན༌ཏག༌ མེད༌ཀྱག༌ སམ༌མ༌ རག༌ག༌? 6 ཨིན༌ནའང༌ ཏེ༌ཙོགས༌སི༌ དོད༌པ༌ ངན༌པའེ༌ གྱབ༌གལ༌ ཅོ༌ཐུབ༌ཅེས༌ལ༌ ཁོང༌ངི༌ ང༌དང༌གུན༌ལ༌ ཐུག༌རྗེ༌ མང༌ང༌ སལ༌ཏེ༌ ཨིན༌ནོག༌, ཀ༌ཟུག༌གི༌ དམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ དུག༌།
"དཀོན༌མཆོག༌གི༌ ཕོ༌སོ༌ ཅོ༌ཁན༌གུན༌ལ༌ གྱབ༌གལ༌ ཅོའ༌ ཛད༌ད༌ནོག༌,
ཨིན༌ནའང༌ པས༌མོ༌ ཡོད༌ཁན༌གུན༌ལ༌ ཐུག༌རྗེ༌ སལ༌ལ༌ ཛད༌ད༌ནོག༌།"* 4:6 ཏམ༌སྤེ༌ སྤེ༌ཆའེ༌ 3:34
7 དཀོན༌མཆོག༌གི༌ སྐུན༌དུན༌ལ༌ རང༌དང༌རང༌ ཁོང༌ངི༌ ཝང༌ངི༌ ཡོག༌ག༌ བོར༌ཤིག༌, ཡང༌ རྡུད༌གུན༌ནི༌ གོ༌བའེ༌ གྱབ༌གལ༌ལ༌ ནོལ༌ཤིག༌, ཏེ༌ནེ༌ ཁོ༌ ཁྱོ༌ཞའེ༌ ཀ༌ནེ༌ ཤོར༌ཏེ༌ ཆེན༌། 8 གལ༌ཏེས༌ ཁྱོ༌ཞའ༌ དཀོན༌མཆོག༌གི༌ ཉེ༌མོའ༌ ཡོང༌ན༌, ཏེ༌ནེ༌ དཀོན༌མཆོག༌ ཁྱོ༌ཞ༌གུན༌ནི༌ ཉེ༌མོའ༌ སྐྱོད༌ཨིན༌། ཁྱོ༌ཞའ༌ སྡིག༌ཅན༌གུན༌ནི༌ རང༌ངི༌ ལག༌པ༌ ཁྲུས༌ཤིག༌, ཡང༌ ཇིག༌རྟེན༌ དང༌ དཀོན༌མཆོག༌ ཉིས༌ཀོའེ༌ གྱབ༌ནེ༌ གྲུལ༌ཁན༌གུན༌, ཁྱོ༌ཞའེ༌ སེམས༌ རྩང༌མ༌ ཅོ༌ཤིག༌། 9 སེམས༌ སྐྱོ༌མོ༌ ཅོས༌ཏེ༌, རྡུག༌པོ༌ ཅོ༌ཨིན༌ ངུ༌ཤིག༌། ཧབ༌གོད༌དི༌ ཚབས༌ལ༌ རྡུག༌པོ༌ ཡང༌ སྐྱིད༌པོའེ༌ ཚབས༌ལ༌ སྐྱོ༌མོ༌ ཅོ༌ཤིག༌། 10 རང༌དང༌རང༌ གཙོ༌བོའེ༌ སྐུན༌དུན༌ལ༌ པས༌མོ༌ ཅོས༌, ཏེ༌ནེ༌ ཁོང༌ངི༌ ཁྱོ༌རང༌ང༌ རྩི༌ཝ༌ ཀྲག༌པོ༌ སལ༌ལ༌ ཛད༌ཨིན༌།
ཞན༌མ༌གུན༌ལ༌ ཁྲིམས༌ཅད༌ ཏང༌ཅེས༌སི༌ གྱབ༌གལ༌ལ༌ སྤང༌ པུདས༌།
4:11 ནེ༌ 12
11 ཅེས༌པའེ༌ སྤུན༌གུན༌, ཅིག༌ དང༌ ཅིག༌གི༌ གྱབ༌གལ༌ལ༌ སྤེ༌ར༌ ངན༌པ༌ མ༌ཏང༌ཤིག༌། གལ༌ཏེས༌ ཁྱོ༌ཞ༌གུན༌ནི༌ ཅིག༌ དང༌ ཅིག༌གི༌ གྱབ༌གལ༌ལ༌ སྤེ༌ར༌ ཡ༌, ཁྲིམས༌ཅད༌ ཏང༌ན༌, ཁྱོ༌ཞ༌གུན༌ནི༌ ཞན༌མ༌ ཅེས༌པ༌ ཅོ༌ཅེས༌སི༌ ཁྲིམས༌པོའེ༌ གྱབ༌གལ༌ལ༌ སྤེ༌ར༌ དང༌ ཁྲིམས༌ཅད༌ ཏངས༌ཏེ༌ ཨིན༌ནོག༌། ཁྱོ༌ཞ༌གུན༌ནི༌ ཁྲིམས༌ཅད༌ ཏང༌ན༌, ཁྱོ༌ཞ༌རང༌གུན༌ ཁྲིམས༌པོན༌ གྱུར༌ཏེ༌ ཁྱོ༌ཞ༌གུན༌ནི༌ ཁྲིམས༌པོའེ༌ ཁའ༌ མ༌ཉན༌ན༌ ཨིན༌ནོག༌། 12 དཀོན༌མཆོག༌ ཅིག༌པོ༌ ནི༌, ཁྲིམས༌ སལ༌ཁན༌ དང༌ ཁྲིམས༌པོན༌ ཞུགས༌ཏེ༌ ཨིན༌ནོག༌། ཁོང༌ ཅིག༌པོའ༌ སྐྱོབ༌ཅེས༌ ཡ༌ མི༌གུན༌ ཉལ༌ཝའེ༌ ནང༌ང༌ ཕང༌ང༌ ཛད༌ཅེས༌སི༌ ཝང༌ ཡོད༌ཏེ༌ ཨིན༌ནོག༌། ཏེ༌ནེ༌ ཞན༌མའ༌ ཁྲིམས༌ཅད༌ ཏང༌ཁན༌ ཁྱོ༌ཞའ༌ སུ༌ ཨིན༌?
ཕོ༌སོའི༌ གྱབ༌གལ༌ལ༌ སྤང༌ པུདས༌།
4:13 ནེ༌ 17
13 "མ༌ གྱོགས༌པ༌, ང༌ཞ༌གུན༌ གྱལ༌ས༌ སོང༌ཏེ༌ ཏུས༌བན༌ཤིག༌ དུགས༌ཏེ༌ ཚོང༌ ཅོས༌ཏེ༌ པེ༌ནེ༌ མང༌པོ༌ ཅོ༌ཨིན༌" ཟེར༌ཁན༌གུན༌ནི༌ ཉོན༌ཤིག༌། 14 ཁྱོ༌ཞའེ༌ མི༌ཚེའེ༌ ནང༌ང༌ ཐོ༌རེ༌ ཅི༌ བྱུང༌ཨིན༌, ཁྱོ༌ཞའ༌ ཅི༌ གྱུས༌ཡོད༌? ངའེ༌ ཁྱོ༌ཞ༌གུན༌ནི༌ མི༌ཚེ༌བོ༌ ཅི༌ ཉམ༌པོ༌ ལྡུར༌? འི༌བོ༌ ནི༌ ང༌ཏོག༌གི༌ མ༌མུན༌ ཙོགས༌ ཨིན༌ནོག༌ ཀ༌བོ༌ ཏུས༌ ཉུ༌ངུན༌ཞིག༌ མ༌ནེ༌ ལུས༌ས༌ མ༌ནོག༌། 15 ཁྱོ༌ཞ༌གུན༌ནི༌ ཟེར༌གོས༌, "གལ༌ཏེས༌ གཙོ༌བོའེ༌ ཐུག༌གོངས༌ ཡོད༌ན༌, ང༌དང༌གུན༌ནི༌ མི༌ཚེའེ༌ ནང༌ང༌ འི༌བོ༌ ཡ༌ ཏེ༌བོ༌ ཅོ༌ཨིན༌།" 16 ཏེ༌ མན༌ན༌, ཁྱོ༌ཞ༌གུན༌ནི༌ རང༌དང༌རང༌ངི༌ ཐབས༌ལྡིངས༌གུན༌ནི༌ ནང༌ང༌ ཕོ༌སོ༌ ཅོས༌ཏེ༌ ཨིན༌ནོག༌, ཡང༌ ཏེ༌ཙོགས༌སི༌ ཕོ༌སོ༌གུན༌ ངན༌པ༌ ཨིན༌ནོག༌།
17 གལ༌ཏེས༌ སུ༌ཞིག༌ག༌ ཁོ༌རང༌ངི༌ ཅོ༌གོ༌ཤེས༌སི༌ ལས༌ ཟང༌པོ༌གུན༌ གྱུས༌ཡོད༌ཏེའང༌ མ༌ཅོ༌ན༌, ཁོའེ༌ སྡིག༌པ༌ ཅོས༌ཏེ༌ ཨིན༌ནོག༌།