1 Natnating ot ning belot di akes a rakrakan hanua, a Warwara ka kes nigo. A Warwara i kes taum o e God, pa a Warwara i ot e God. 2 Natnating ot i kes taum o e God. 3 Ana Warwara ot, e God i akes a ututnala rop, bel ta utna ning e God i akesi bel i akesi taum ana Warwara. 4 A lalaun i kes onoi, pa a lalaun ning, i a talapor anuna taraila rop. 5 A talapor i atalapor ana mormorom, pa a mormorom bel i tolsot pasi.

6 E God i sune sen ning a barsan, a risana e Jon. 7 I hanot sur ir warwara talapor ana talapor, sur a taraila rop lar tortorot onoi. 8 I ot bel a talapor, i hanot ka sur ir warwara talapor ana talapor. 9 Anasa a talapor momol ning ir atalapor a taraila rop, ir hanot ute na rakrakan hanua.

10 A Warwara i kes ana rakrakan hanua. Pa ana Warwara e God i akes a rakrakan hanua, ika a taraila ana rakrakan hanua bel la oroi lalani. 11 I hanot sur anuna taraila, ika anuna taraila ot bel la malmaling pasi. 12 Ika, la rop ning la maling pasi, pa la tortorot ana risana, i malmaling pas la, sur la na natnat e God. 13 Bel di atong la mang a natnat e God ana agon ana mangis a tarai, o ana nemnem ana ta barsan mite lapiu. E God ot e tamanla.

14 A Warwara i hanot a barsan momol, pa i kes na arpotor ta mila. Mila ka oroi tar anuna matatar, a matatar ane Natnalik takai sot ka, ning i han kusun e Tamana, i bukus ana marmaris pa a momolna. 15 E Jon i warwara talapor onoi, pa i warwara ana tnan elngena mange, “I ot ne, ning a warwara nigo ono mang, ‘Esining ir mur tak, i leklek kol hok, anasa i ot i laun nigo tak.’ ” 16 I bukus ana marmaris, pa ana nuna tnan marmaris, i sira angisngis dala taum ana galis a wakak a utna. 17 Ta e Moses, e God i saran tar a warkurai tan dala, ika o e Iesu Karisito i saran tar a marmaris pa a momolna tetek dala. 18 Bel tik i oroi tar e God tuk onone. Ika e Natnalik ka, takai sot ka, i kes taum o e Tamana, i asangan e God tetek dala. Pa i ot e God.

19 A ningnigola ana tarai Juda la mitisa e Jerusalem, la sune sen a tena artabarla, pa dingla na tarai tagun a mangis a tarai Liwai,* A taraila ana mangis Liwai la sira titol ana rumai a artabar. tetek e Jon sur lar dekeni mang, “U esi?” 20 E Jon bel i warwara alari, i warwara talapor ot onoi mang, “Bel sur iau e Karisito.” 21 La deken ulaki mang, “U esi? U e Elaija?” Pa i keles la mange, “Belal, iau bel e Elaija.” La deken ulaki mange, “U a propet ning di atongi mang ir hanot?” I keles la mang, “Belal.” 22 Lamur la atai i mange, “U esi? Ur atai mila sur milar atai la ning la sune mila ute. Asa ning ur atongi hom?” 23 E Jon i keles la mange, “Iau a barsan ning a propet Aisaia i warwara nigo ono mang, ‘A elngena mainla i arkabah ting na hanua bel mang: Mulor atostos a ngas anuna Leklek.’ ” Ais 40:3

24 A Parisaiola ning di sune la tetek e Jon, 25 la dekeni mange, “U atongi mang, u bel e Karisito, pa bel otleng u e Elaija, pa bel u a propet, ning di atongi mang ir hanot. Ning i manglarning, sur asa u baptais a taraila?” 26 E Jon i keles la mange, “A baptais mulo ana malum, ika takai kane i tur na arpotor ta mulo ning bel mulo tasman lalani. 27 Esaning ir mur tak, i leklek tak. Pa bel a tolsot pasi sur ar paksen a inau ana anuna su. A natarna kol tana.”

28 A ututnala ne, la hanot tumo e Betani ana ris a malum Jodan ning e Jon i baptais a taraila ano.

29 Ning a pukakiar lamur, e Jon i oroi pas e Iesu i han amon teteki, pa i atongi mange, “Mulo oroi i, a Nat a Sipsip ane God, ning ir kepsen a laulau a ginina rakrakan hanua. 30 A barsan kane, ning a warwara nigo ono mange, ‘A barsan ning ir mur tak, i leklek kol hok, anasa i laun nigo tak.’ 31 Lanigo iau otleng bel a tasmani. Ika a baptais ana malum sur ar asangan a barsan ne tetek a tarai Israel.”

32-33 Pa e Jon i warwara talapor mange, “Bel a tasmani esi e Karisito. Ika e God, ning i sune iau sur ar baptais ana malum, i atai iau mang, ‘Ur oroi a Talngan Tabu ir han purum pa ir kes ana ning a barsan. A barsan ning, ir baptais ana Talngan Tabu.’ Pa a oroi a Talngan Tabu i han purum misaot na langit, i arlar ana tabun pa i kes saot o e Iesu. 34 Ia ka oroi tar a utna ning i hanot, pa a warwara talapor onoi mang, i a Nat e God.”

35 Ning a pukakiar lamur, e Jon taum ana naur a kaklik tagun a kakak a asaerla anunai, ditol kaning ia ulak. 36 Ning i oroi e Iesu i bolos ditol, i atongi ono mange, “Oroi, a Nat a Sipsip ane God.”

37 Ning naur a kaklik a asaer dia longor a warwara ning, dia muri ot ma e Iesu. 38 Ning e Iesu i talingir, i oroi diau ning dia muri, pa i deken diau mange, “Asa ning mu mang suri?” Dia kelesi mange, “Rabi” (a kamkamna mang Tena Asaer), “u kes taha?” 39 E Iesu i keles diau mange, “Mur han ute sur mur oroi.” Pa dia muri, pa dia oroi a pukna ning e Iesu i kes ano. Ning ditol hanot, ka diat a mais a kamis pas, pa ditol kes a rah kidol ning tingia.

40 Ning a halindiau ning dia longor a warwara ane Jon pa dia mur e Iesu, a risana e Endru, a tas e Saimon Pita. 41 A ningnigo na utna ning e Endru i toli, i seren pas e tasnalik e Saimon, pa i atai i mange, “Mila ka pastetek pas a Mesaia!” (a kamkamna mang e Karisito† A Karisito esaning di pek a wel ono. A tarai Israel la sira pek a wel o esaning la aslangi. Ana warwara Hibru di atongi mang a Mesaia, pa ana warwara Grik di atongi mang a Karisito. E Iesu a Karisito, esaning e God i aslang pasi sur ir alaun a tarai. A propetla tagun nating la warwara na propet ono mang ir hanot, pa a tarai Juda la harnanai suri.).

42 E Endru i ben e Saimon tetek e Iesu. Ning e Iesu i oroi i, i atai i mange, “U e Saimon, a nat e Jon,‡ E Jon e tamana e Pita, bel e Jon a Tena Baptais. dir atong a risam mang e Kepas.” (Ana warwara Grik di atongi mang e Pita, a kamkamna a hat.)

43 Ning a pukakiar ulak, e Iesu i mang sur ir han utumo e Galili. I pastetek pas e Pilip, pa i atai i mange, “Ur mur iau.” 44 E Pilip i mitimo e Betsaida, a hanua ane Endru pa e Pita. 45 E Pilip i pastetek pas e Natanael, pa i atai i mange, “Mila ka pastetek pas a Karisito ning e Moses i warwara nigo tar ono ana Buk a warkurai, pa propetla otleng la ka warwara nigo tar ono ana nunla na tumtumus, i e Iesu a te Nasaret, a nat e Josep.” 46 Ika e Natanael i kelesi mange, “Nasaret! Mangmangasa, ta wakak a utna ot ir hanot mitingia?” E Pilip i kelesi mange, “Ur han ute pa dar han sur ur oroi.”

47 Ning e Iesu i oroi pas e Natanael i hanot teteki, i atongi ono mange, “A te Israel momol, bel i tasman a asasongo.” 48 E Natanael i deken e Iesu mange, “U tasman mangmangasa iau?” I kelesi mange, “Ning belot e Pilip i ben u ute, ia ka oroi nigon tar u, ning u kes ting nahai a rakai a fig.” 49 E Natanael i atai i mange, “Tena asasaer, u a Nat e God, u a King anuna tarai Israel.” 50 E Iesu i atai i mange, “Mangmangasa, u tortorot hok, anasa a atai u mang u kes tar nahai a rakai a fig? Lamur ur oroi a tatatnan utna kol ir hanot, ir itna ana utna ne.” 51 Lamur e Iesu i atai i mange, “A atong momoli ta mulo, mulor oroi a langit ir sapang, pa a angelola ane God lar hanan kas pa lar hanan purum tetek a Nat a Barsan.”