2 Tesalonikri
Mbeɗe ndeke ɗi siɗike ká Pol ɗaa / ha̰ nzoɓ mbika lawri ká Tesalonik
Ɓay ká se tul feri ká ɗo ɓil mbeɗe ni key
Mbeɗe key na, few ha̰nɛri kal ká falɛ taa mbḭwke ku nda̰w rɔɔ Pol ɗaa ɓáy. Láa kḭ ɓáy kere ya ká se tul yḭ́i Ŋgɛrɛmbay na, ɗaa nzoɓ mbika lawri ká Tesalonik nduo kḭ rɔɓay. I giyaŋ yḭ́i Ŋgɛrɛmbay ɓáy káw ɓáy kumnun ɓari. Nzoɓ ha̰nɛri ɗo ɗi ku ká í se kpṵru í ɓaa mii, Ŋgɛrɛmbay na vi ro. Ká ɓil mbeɗe key na Pol ɓaa mii, pola rɔɔ ɓay haŋa Ŋgɛrɛmbay ka yḭ̀i a vi na, Nzoɓ Mgbɔrɔ ɓe káʼa túŋ Ŋgɛrɛwṵru ŋgereŋ, a ɗi sùo-ɛ ɓe kḭ ɓa Ŋgɛrɛwṵru na, a tḭ́i nda̰w rɔ! Ɓe kḭ a ɗáa ha̰ tḭ́i ká tul Ŋgɛrɛwṵru ká tusiri key na se ɓa pola pola kpṵru maa ɓáy zaɗɛ nda̰w rɔɔ Ŋgɛrɛmbay a yḭ́i a vi ɓáy. Ɓe ze, ɗo nun haŋa nzoɓ mbika lawri i geɗe tul mbika law ɓari ɓaŋguɔ í ɗaa peɗ ɓari nun-ri ka ɓa pola, a í pɔ́ŋ ɗáa fe kere ya.
Máa ɓayri ká ɗo ɓil-e
Ɔ́rɔ ɓie kúŋ sal ɓay ká tul nzoɓ feya̰ari: 1
Feri káʼa tḭ́i pola rɔɔ Ŋgɛrɛmbay a ví: 2
Ɗiw nzaa ɓay kere ɓáy ɗáa peɗ ɓa pola pola: 3
1
Soko ká Pol hii ha ri
1 Ɓi Pol, rɔɔ Silas ɓáy Timote nda̰w na, ɓuru ɗaa mbeɗe key na ha rì ɓaarì nzoɓ mbika lawri ká ì mbṵ tul kḭ ká Tesalonik, ɓaarì ká ì zuɔ ziŋ Bǎa naari Ŋgɛrɛwṵru ɓáy Ŋgɛrɛmbay Zezu *Krisi. 2 Ndaɗ ɓay haŋa law huoke ɓáy ɗɛkɛkɛ Ŋgɛrɛwṵru ɓáy Ŋgɛrɛmbay Zezu Krisi ka sáɗ zíŋ rì.
Kúŋ sal ɓay Ŋgɛrɛwṵru káʼa ɗoko ɓáy nam yḭ́i Ŋgɛrɛmbay
3 Yṵ ɓururi, ɓuru ɗaa taambɔl ha̰ Ŋgɛrɛwṵru. Ɓa fe ká ɗo nun haŋa ɓuru ɗaa ɓay tul-rì ɓaŋguɔ a ɗo ɓáy zaɗɛ, ɓay ḭi lɛ, ì ɗaa law-rì ɓo tul Ŋgɛrɛwṵru ɓa pola pola, a ini ká ɓaarì mbḭw mbḭw ì mgba ziŋ nzoɓ ha̰wri na se ɓa pola pola. 4 Sa̰wke mini ze, ɓuru kara ɓuru nda giri sùo ɓuru ɓay tul-rì ká sakra nzoɓ mbika law ha̰wri ká i mbṵ tul kḭ, a ɓúru ɓaa ha ri mii, ì mgba ŋgɔ-ŋgɔŋ í ɗaa law-rì ɓo tul Ŋgɛrɛwṵru ɓaŋguɔ ká ɓil fe ɗáa nun tuɔ síeri, ɓáy kɔ́kɔ sɛkɛ feri riw bele ká tḭi tul-rì na.
5 Fe niri key na kiɛ ta-taŋ mii, fe ká Ŋgɛrɛwṵru mbi nzi-ɛ ká ɗi na ɗo ɓáy zaɗɛ, ɓay ḭi lɛ, fekeri ká ì sṵu law-rì ká ɗi na, ɗaa ha rì víke ɓa nzoɓri ká ì maa haŋa ni ka re mbay ká tul-rì. Ɓe ze ɓa fe ká ì kɔ sɛkɛ fe ɓayke. 6 Ɓa tusuɛ, Ŋgɛrɛwṵru na a ɗáa fe ɓáy zaɗɛ: nzoɓri ká i ha rì kɔ sɛkɛ fe na, a yḭ́iŋra sɛkɛ feke ɗaa ri. 7 A ɓaarì ká ì kɔ sɛkɛ fe na, kaʼa haŋa law-rì nda siri fṵɔ, ɓuru kara nda̰w, ɓáy nam ká Ŋgɛrɛmbay Zezu a yḭ́i saa nulue ɓáy leɗ nzaapeɗ ɓeri ká i ɓa nzoɓ hṵrusuo na. 8 Kaʼa yḭ́i ká ɓil rḭm huu ká sɛ bilam bilam ɓay haŋa nzoɓri ká i tuu Ŋgɛrɛwṵru ya, ká i ɗaa vu mbom ɓo tul káa Ɓay Kere ká se tul Ŋgɛrɛmbay naari Zezu ya na, ha ri kɔ sɛkɛ fe maa ɓáy zaɗ fe ɗáa ɓari. 9 Fe sɛkɛ káʼa tḭ́i tul-ri na, a ɓá ɓíɛ káʼa ɔ́-ɔkɔ ya ɓaŋguɔ. I ɗoko ɗi ɗi ziŋ Ŋgɛrɛmbay nda̰w, ziŋ hṵrusuo riŋ ɗika ɓe nda̰w 10 ɓáy nam káʼa yḭ́i a vi ɓay haŋa ɓari riw bele ká i ɗaa law-ri ɓo tul-e a í ɓa taa ɓe na, i pisi ni a í gɔl riŋ mbay ɓe. Ɓaarì sùo-rì kḭ kara, ì ɗoko sakra nzoɓkeri ku na nda̰w, ɓay ḭi lɛ, káa ɓay ká ɓuru kaa ha rì na, ì ɗaa law-rì ɓo ɗi.
11 Sa̰wke mini ze, ɓuru ɗaa nzaa ɓay kere ɓaŋguɔ ɓay tul-rì. Ɓuru vbi Ŋgɛrɛwṵru naari ɓay haŋa ni ka ha rì ma-maa ɓáy simseɗ káʼa ɗíke rì ɓay haŋa rì se na. Ɓuru vbi ni mii, ɓáy faa hṵrusuo-ɛ na, ka ha rì maa ɗáa fe kereri riw bele ká law-rì hii, ha̰ peɗri ká ì ɗaa ɓáy faa mbika law-rì na ka ɗo ɓáy zaɗɛ nzɛɗɛm. 12 Ɓe nda̰w rɔɔ, ɓáy faa fe ɗáa ɓaarì na, ì ɗáake mbay ɓo tul Ŋgɛrɛmbay naari Zezu, a ɓe laa lɛ, a ɗáa mbay ɓo tul ɓaarì ká ì zuɔ ziŋ ni na. Fe niri key na, ɓa lere peɗ law kere Ŋgɛrɛwṵru naari ɓáy Ŋgɛrɛmbay Zezu *Krisi.