Mogogou Ta̱
Yesu Kelesuha̱ Jonko͡u Hegi
Tawale Ta̱
Jon, e̱me to̱ tibi Patmosko͡u dalamo͡u, Yesu Kelesuha̱ e̱moko͡u habage tama̱ degegale ke̱ hehegiei. Yobe, Yesuko͡u damale̱yodele i o sasa̱i̱ kedia̱me ho o kedia̱ makomo͡u haguei kaha̱ degeimo͡u, hagi̱ hiyedo kaha̱ die damale̱yodei ke̱ to͡u fogouye domo͡u. Yesuha̱ Jonko͡u hehegieibe, yo͟͡u boholo͡u ma̱ haguale hafe̱i̱ degeiba tama̱ degegale ke̱ hehegiei. Dimoko͡u ne kegeno͡u hehegili kuhe̱.
Kuguo kuoko͡u be ta̱ makai su̱do dalagua. Damale̱yodele i o sasa̱i̱, afudo deleiguei kedia̱no͡u si ta̱ makai kedia̱ sibige̱be olo͡u fe̱i̱ ko͡u tawale i sa̱ degei. Godiko͡u damale̱yodele ili mei o kedia̱ge sibige̱ ta tawale ili mei.
Habage tama̱ degele, Yesuha̱ Jonko͡u hehegiei ke̱me ko͡u gue:
Uwage sawisiei kelegebe, Yesuha̱ ho o olo͡u fe̱i̱ woma mei degeiba dugulo ile. Ho o kedia̱me Tama̱ha̱ e̱ mogo dia̱.
Tama̱ha̱ e̱ soso͡u:
Tama̱ha̱ e̱ hu̱ tabe Bei Kagasio͡u – 12:9.
Kolu̱kuabe, to̱ a̱i̱ hiyedo koko͡u ge fele̱i̱ – 13:1.
E̱me Tama̱ha̱ dabai degedi o.
Si̱ So Gofo͟͡udo ke̱me mihi̱ dulemo͡u ge fele̱i̱ – 13:11.
E̱ hu̱ tabe Ogo͡u gai Egei Tobo͡u di Hiye O – 16:13.
E̱ne Tama̱ha̱ dabai degedi o.
Yesuko͡u damale̱yodele ili mei o sasa̱i̱ – 11:18.
Godiha̱ e̱ soso͡u:
Godibe e̱ duwodi bolo̱do koto͡u duwo – 12:5
Yesuha̱ e̱ hu̱ tabe Wai Sipsip Wili – 5:6.
E̱ hu̱ tabe Wai Hos Fo̱ Degei Kaha̱ Tageto͡u Duwodi O – 19:1.
E̱ diho̱be douye wobolo͡u dala saga̱i̱ kegei – 19:12.
Duo Bolofe̱i̱ – 14:13.
E̱sol o su̱do – 5:11.
E̱sol o tabe Maikel – 12:7.
Odo olo͡u fe̱i̱ 24 kege – 4:4.
Fi̱bo͡u bi bolo̱u̱ bolo̱u̱ kege – 4:6.
Godiha̱ o sasa̱i̱ – 14:12.
Dia̱me Wai Sipsip Wili kaha̱ sasa̱i̱yode tobolo͡u idi – 19:7.
Yesuha̱ ho o olo͡u fe̱i̱ woma mei degeiba, damale̱yodele ili o sasa̱i̱ kedia̱me dio͟͡u kegeno͡u dalali, Godiha̱ bi bolo̱do dia̱moko͡u ne̱i̱ba, fi̱ tofousogo tofousogo tofolo͡u ile. Hagi̱ olo͡u fe̱i̱ mei degele. Godiha̱ sa sibige̱bo͡u agudiobo͡u de gehe̱ milolo͡u kaha̱ degemo͡u.
Yesuha̱ ta̱ makai olo͡u fe̱i̱ ke̱ Jonko͡u hehegiema mei degeimo͡u, e̱ kuguoko͡u kuhe nala̱i̱. Jon e̱me Yesuha̱ge e̱ mogodoyode tobo͡u di o. Jonbe odo degeimo͡u e̱ kuguo ko͟͡u kuhe nala̱i̱.
Jonha̱ge kuguo olo͡u fe̱i̱be houyosi kege nala̱gai dala:
Ta̱ Uwo Bolofe̱i̱ Jonha̱ Nala̱i̱
Egei Sasafe̱i̱ Jonha̱ Nala̱ma Ne̱i̱
Egei Sasama Jonha̱ Nala̱ma Ne̱i̱
Egei Koma̱ Jonha̱ Nala̱ma Ne̱i̱
Mogogou Ta̱ Yesu Kelesuha̱ Jonko͡u Hegi (Ke̱me kuguo ko͟͡u.)
Kuguo Mogogou Ta̱ Hegi ko͟͡umaha̱ ta̱ sibige̱ tano͡u tano͡u olo͡u fe̱i̱be kuhe̱:
Ta̱ Hiye 1–3
Yesu Kelesuha̱ Jonko͡u, na̱ egele ta̱ ko͟͡u nala̱ma, damale̱yodele i o sasa̱i̱, sosi olo͡u fe̱i̱ dioyosi kege koko͡u kefegulo idi kedia̱moko͡u ne̱yede tobou.
Ta̱ Hiye 4–11
Wai Sipsip Wili kaha̱ kuguo hebenito͡u dala ke̱ haguo̱u̱ba, sa sibige̱ o sasa̱i̱ olo͡u fe̱i̱ hagi̱ gehe̱ gehe̱ dugulo ile.
Ta̱ Hiye 12–20
Yesuha̱ Tama̱bo͡u e̱ soso͡u bo͡u olo͡u fe̱i̱ makoma mei degei.
Ta̱ Hiye 21–22
Godiha̱ bi olo͡u fe̱i̱do haba gehe̱no͡u milo͡u gale.
Yesu Kelesuha̱ Jonko͡u, na̱ egele ta̱ ko͟͡u nala̱ma, damale̱yodei o sasa̱i̱, sosi olo͡u fe̱i̱ dioyosi kege koko͡u kefegulo idi kedia̱moko͡u ne̱
1
(Ta̱ Hiye 1–3)
1 Ta̱, afu mogogou delei ko͟͡ume Godiha̱ Yesu Kelesuko͡u hegi, Godiha̱ dabai degedi o sasa̱i̱ kedia̱moko͡u tama̱ degeladi ke̱ hehegieyadomo͡u. Damale̱do, Godiha̱ Yesuko͡u hegimo͡u, e̱ e̱sol o ta tobo͡u mo͡u haguei, e̱ dabai degedi o Jon a̱moko͡u hehegieyadomo͡u. 2 A̱me Jon. A̱ bi olo͡u fe̱i̱ Godiha̱ hehegieimo͡u, ma̱ diho̱ye ko͡u dugulu ke̱ ni̱moko͡u tobolo͡u. A̱ Godibo͡u Yesu Kelesubo͡u dilie ta̱ ke̱ damale̱do ni̱moko͡u tobolo͡u kuhe̱.
3 Ta̱ ko͟͡ume Godiha̱ ta̱, habage degeiba dugulo ta̱. O sasa̱i̱ koyo na̱ kuguo ko͟͡u huso͟͡uba, o ilo kelege dulo seseibabe, ni̱ olo͡u fe̱i̱ hoho̱bo͡u ma, yobe bi habage tama̱ degele ke̱me hafe̱i̱ degeli kaha̱ degeimo͡u.
Jonha̱ kuguo ko͟͡u Yesuko͡u damale̱yodei o sasa̱i̱, sosi olo͡u fe̱i̱ dioyosi kege koko͡u kefegulo idi kedia̱moko͡u nala̱ma ne̱i̱
4 A̱me Jon. A̱ Yesuko͡u damale̱yodei o sasa̱i̱, sa Esia duo kodu sosi olo͡u fe̱i̱ dioyosi kege koko͡u kefegulo idi ni̱moko͡u nala̱ma neli̱. Godi e̱me afu yo͟͡u kege delei, ifine yo͟͡u kegeno͡u dala, habage e̱ haguale. A̱ge e̱ ni̱moko͡u habagugueiba, ni̱ bologua̱do dalaguale. Haba Duo Bolofe̱i̱, e̱ nele̱ olo͡u fe̱i̱ dioyosi kege, Godiha̱ duwodi kaha̱ midiho̱ko͡u tafaladi, e̱ne ni̱moko͡u habagugueiba, ni̱ bologua̱do dalaguale ke̱ tagali. 5 Yesu Kelesuha̱ ni̱ dogo͡u guba, bologua̱do dalaguale ke̱ne a̱ tagali. E̱me Godiha̱ ta̱ damale̱dono͡u tobo͡u di o. E̱me tolo ilemo͡u hagua̱i̱ o dagado. Sa sibige̱ hiye o olo͡u fe̱i̱ne e̱no͡u wolo͡u daladi.
Yesu Kelesu e̱ge dibe tagadido kaha̱ e̱ tolomo͡u, e̱ kafeiye di midiho̱ kasaga̱i̱ olo͡u fe̱i̱ igile mugu. 6 Yesu Kelesu e̱ degeiye, dibe mogo͡u du dalaguadi o degei. Damale̱do, Godibe sugu̱to͡u dalamo͡u, o sasa̱i̱ hayedu dalaguamo͡u, dibe duo kele dala. Yesuha̱ e̱ Aye Godibe di Hiye O, di wolo͡u daladi. Yesuha̱ hu̱bo͡u e̱ nele̱bo͡u debe hiyedo folodo. Di e̱moko͡u tofousogo kegeno͡u hoho̱bo͡u me. Damale̱do.
7 Duguma, Yesu Kelesuha̱ hagualebe, mabiye tigama migiba, sa sibige̱ o sasa̱i̱ olo͡u fe̱i̱ dio͟͡u die diho̱ye dugulo ile. O malaye e̱ figiko͡u gulo i kedia̱ne dugulo ile. Sa sa obiyei olo͡u fe̱i̱ duguoba, e̱moko͡u fima̱ba gosolo ile. Habage kege degele. Damale̱do.
8 Hiye O Godiha̱ tobolo͡u, a̱me amulo̱ aliko͡u bo͡u habageko͡u bo͡u de dala. Damale̱do, Godi e̱me afu yo͟͡u kege delei, ifine yo͟͡u kegeno͡u dala, habage e̱ haguale. Godiha̱ e̱ nele̱be hiyedo folodo.
Jonha̱ Yesu Kelesu dugu
9 A̱me ni̱ eye̱ Jon. Dibe Yesu sesele yolu kaha̱, hagi̱ hiyedo dugulo ili, ke̱no͡u si Godiha̱ di wolo͡u dalamo͡u, di nele̱ dege dalagua. A̱ Godibo͡u Yesubo͡u dilie ta̱ hehegiligibe, a̱me damale̱yodeiyodei kaha̱, damale̱yodili mei o kedia̱ a̱ hele mugumo͡u hagua, to̱ tibi sa Patmosko͡u dala kuhe̱. 10 Hiye Oha̱ sawisiei ta kelege, Duo Bolofe̱i̱ha̱ ma̱ duledu nele̱do degeimo͡u, a̱ diho̱ boholo͡u ma̱mo͡u, ma̱ tobeko͡u ge ta̱ uwo hiyedo kibi haguisai saga̱i̱ degeimo͡u du. 11 Ta̱ uwo ke̱me ko͡u gue tobo͡u mo͡u du, midiho̱ kagei kagei na̱ dugulu ke̱me olo͡u fe̱i̱ kuguoko͡u nala̱gama, damale̱yodei o sasa̱i̱, sa Efesusbo͡u, sa Smernabo͡u, sa Pergamumbo͡u, sa Taiatairabo͡u, sa Sardisbo͡u, sa Filadelfiabo͡u, sa Laodisiabo͡u kele sosi dioyosi kege koko͡u kefegulo idi kedia̱moko͡u ne̱yedeimo͡u du.
12 Kege tobo͡u mo͡u dulomo͡u, a̱ o ke̱ dugulamo͡u, boholo͡u mo͡u dugube, kama̱i̱ dioyosi kege, sele igi golye milo͡u gai ke̱ duwoguamo͡u dugu. 13 Kama̱i̱ dioyosi kege kaha̱ duo kodube o ta O Kedia̱ Dihi* 1:13 Daniel 7:13 saga̱i̱ kaha̱ tafalamo͡u dugu. E̱me yukuei sasado, sele igi gol fiyati baga milou kaha̱ e̱ bilie̱ko͡u sile̱ma̱ ka̱i̱ dugu. 14 E̱ widio towe olo͡u fe̱i̱be fo̱ degei, wai sipsip towebo͡u, mabi fo̱ degeibo͡u ke̱ saga̱i̱. E̱ diho̱be douye wobolo͡u dala saga̱i̱ dugu. 15 E̱ abogo͟͡ube sele igi kopa, obe douluko͡u sili ke̱ saga̱i̱ dugu. E̱ ta̱ uwobe to̱ si uwo saga̱i̱ du. 16 E̱ dobogo͟͡u deleko͡u be kuidiho̱ olo͡u fe̱i̱ dioyosi kege tou dugu. E̱ mogoudube aweki gofo͟͡udo, me̱ bolo̱u̱ kege ke̱ bofa̱ tafalamo͡u dugu. E̱ midiho̱be aso̱ gofo͟͡udo ke̱ saga̱i̱ dugu.
17 A̱ o ke̱ duguomo͡u, e̱ abogo͟͡u hafe̱i̱ dege tolo fiyoumo͡u, e̱ dobogo͟͡u dele ke̱ a̱moko͡u dogoguomo͡u ko͡u gue tobo͡u mo͡u du, gue̱ degeda. A̱me widio o, haba a̱no͡u be habageko͡u do dala. 18 A̱me yo͟͡u kegeno͡u daladi. A̱me tolo ilemo͡u hagua̱, gehe̱ degemo͡u tofousogo tofousogo dala kuhe̱. Todi kibo͡u, Tofigiei Kedia̱ Sa a so͟͡udi kibo͡u debe a̱no͡u tou dala. 19 A̱ na̱moko͡u bi ifi dalabo͡u, habage tama̱ degele ke̱bo͡u de hehegili, ko͟͡ume na̱ olo͡u fe̱i̱ nala̱. 20 Kuidiho̱ dioyosi kege, na̱ ma̱ dobogo͟͡u deleye tou dugu ke̱me kuidiho̱do mei. Kaha̱ sibige̱be e̱sol o dioyosi kege. E̱sol o kedia̱ge damale̱yodei o sasa̱i̱, sosi dioyosi kege koko͡u kefegulo idi ke̱ wo͡u ma dalaguadi. Haba kama̱i̱ dioyosi kege, sele igi golye milo͡u gai ke̱me kama̱i̱do mei. Kaha̱ sibige̱be damale̱yodei o sasa̱i̱, sosi olo͡u fe̱i̱ dioyosi kege koko͡u kefegulo idi kedia̱.