THESSALONIA
Mi-ngaidiang Paul Inkhat Changna Chemajia
Chonglamsaat
Mansakhet Thessalonia mi ngai diangnga chemajia hi Tirton Paul imajia eii (1:1). Hiwahi Paul in imajia Bible suungnga larik inkhat hongka-eii mansakhet chemajia lei-echa halli hiwahi Christa inneisuo kum 51 pheiwei khanna imajia eii. Ama'n hiwa amajiapha Corinthia-ah aleiom. Hiwa chemajia hi Paul in woinihuuina Pathian chuon sina ah ikeithei Thessalonica ah kaom koisuok sik-ah eii (Chuon 17:1-10). Chuontho larik khan hintia aril khachu koisuok hi Jihudi lekkhat li Greek katamkhat in ibool eii.
Paul in koisuok keithei suonuk Thessalonica ah kasoot ah leiom matormak khawajarra ama'n hiwa chemajia hi nuk-ah khanna kaom kangamna ngai malung masoknasik ama'n imasuo eii. Hiwa chemajia hin chongmun katamtak khat-um Christian ringkhuo jarra mipui minchuna katamtak incheel. Paul in Christa woini huuina ajuonasik jarra lekkhat enna iril ang. Thessalonia koisuok ah kaom kangamna ngai'n hiwa chongmuntak hin malungkaluut lei-ete. Paul in Christa woini huuina ajuosik hi Pathian malung kamintai ringkhuo ah ringnasik masokna inkhat angnga aleineiman (5:6-8).
Asuungnga kaom Chong
1. Paul in hiwa chemajia hi koisuok don li inmanisik Pathian minpaak ah aphut (1:1-10)
2. Halli ama'n ama chuon jarra khat-um Timothy in iheichoi chong ngai jarra arilcheen (2:1–3:13)
3. Anuoiya Christian ringkhuo warra ringnasik ah Jisu woini huuina ajuonasik jarra minchuna anei (4:1–5:15)
4. Paul in woikhat koisuok kha minpaak-ah halli koisuok rakip in chemajia hi teelnasik ah inmanidiang nina aneiya aminhek (5:16-28)
1
1 Paul le Silas khat-um Timothy in,
Pa Pathian khat-um Pumi Jisu Christa ta ka-eii Thessalonia koisuok mi ngaidiang:
Riangwai khat-um malungkadai kha ningta erase. Chuon 17:1
Thessalonia ngai Ngamna Khat-um Inringkhuo
2 Keini'n Pathian kinnina rakip-ah nangni kinnangaidon, halli pha rakip ah nangni ngai rakipsik Pathian kinminpaak. 3 Ajarchu eini Pathian khat-um Nipa maikuungnga nangni inngamna kha chuonna ningtho, nangni minriangna khan chuon ranak-ah ningtho, halli Nipumi Jisu Christa diang ningngamna kacheet kha keini'n kinngaidon. 4 Ulenai ngai, nangni Pathian in naminriangnga ama sik-ah nangni inakadang kha keini'n kinjet. 5 Ajarchu keini'n nangnidiang Chong Kahoi kinheichoi kha, chongbit emak, takkha ranakle inruoiya Ratha Inthiang khat-um khawa akadik puikatung malungthuulna kha-um eii. Keini'n nangnile niom suomlai khan nangni thanasik, angtho thoa kin-omme tikha nangni'n ningjet.
6 Nangni'n Poongna akatamtak ningdei innum, Ratha Inthiangnga inphut roknachong akajuo kha ningmujei: nangni'n keini khat-um Pumi omchan kha ningjuijei. Chuon 17:5-9
7 Khawa jarra nangni'n Macedonia khat-um Achaia ah kaom akangamna rakipdiang minkhina inkhat kha ning-ejei. 8 Ajarchu nangni diangnga inphut ah Pumi jarra chong kha Macedonia le Achaia rampumpui inthangbit emak, takkha Pathian ningngamna jar kha-um amun rakip atungjei. Khawa jarra khawa kheella eini'n rilsik arei iteii ommakjei. 9 Nangnidiang kinhonglai ningnaleidon, halli akatuun le akaringchak Pathian sepa thonasik ah, kutbool pathian ngai ningmathaanna jar, 10 halli akajuosik Pathian lunghongna ah inphut nakasanpa, Pathian in kathiya inphut iminring Asapa Jisu kha marwaanna inphut akajuosik ningngaak kha mi rakip in inriljei.