1 Иудеяйән уԓәм апостоләт пӑ хӑнам йох хуԓсэԓ, мӑтты па рут йох ищи Турәм йасәӈ вана ўсэԓ.

2 Щӑԓта хун Петра Иерусалима йŏхтәс, иудейәт эԓты уԓты хӑнам йохԓаԓән ԓўв йэщаԓт нўрыса,

3 пŏтәртман: «Нӑӈ ӑт эвтәм мŏхет хŏща йӑхсән пӑ ԓыв пиԓԓаԓән ԓэсән».

4 Петра пӑ хŏты вер ус, щиты ԓывиԓаԓа пŏтәртты питсәԓԓы, йастыйәԓ:

5 «Иоппия вошән ма пойәкщәсәм пӑ щи пўԉаӈ вантәпса ватсәм: и мŏԓтты пўт иԓ эсԓәщәс, ищи мӑтты ун сŏх лопәс, ԋӑԓ щуӈәԓ сӑхат турәм хӑр эԓты иԓ эсәԓты ŏт, пӑ ма хŏщайэм иԓ эсԓәщәс.

6 Ма пўт ԓыпеԓа ӑӈкәрмәсәм пӑ, вантыман, ԋӑԓ йоши–кўрпи войәт, иԓән мўв пӑԓатән ущиԓыты войәт пӑ турәм хӑрән йӑхты тŏхԓәӈ войәт шийаԓәсәм.

7 Щӑԓта ма тўр сый хуԓтмәсәм, ма пеԓайэм пŏтәртәԓ: 'Петра, нŏх ԓойа, веԓа пӑ ԓэва'.

8 Ма пӑ йастәсәм: 'Ӑнта, Турәм Куща, нэмәԓты атәм мўй пӑ ӑнта сыстам ŏт нэмәԓт пŏрайән ма ўӈԓэма ӑт питыԓыйәс'.

9 Пӑ турәм хӑр эԓты кимет пўш тўр сый мӑнэма йŏхԓы йастәс: 'Турәм мўй сыстапсәԓы, щит ӑнта сыстама нӑӈ аԓ ԓўӈты'.

10 Щит хуԓәм пўш ус, пӑ па хŏԓ иса турәм хӑра нŏх эԓәтса.

11 Щӑԓта ин, щи пўԉаӈ Кесария эԓты, ма хŏщайэм китәм хуԓәм хŏйат, хотэм ԉэпа, хŏта ма усәм, ԓойсәт.

12 Йэмәӈ Ԓыԓ мӑнэма йастәс, ма ԓыв пиԓԓаԓән, йэша нэш ӑт нŏмәнԓыман, ат мӑтсәм. Ма пиԓэмән щи хут хӑнам йох па мӑтсәт, пӑ мўӈ тўм хŏйатэн хота йŏхәтсув.

13 Ԓўв мўӈева пŏтәртсәԓы, хŏты ԓўв йŏԓән хотәԓән [йэмәӈ] ангел ватсәԓы, пӑ ангел ԓўвеԓа йастәс: 'Хŏйатәт Иоппияйа кита пӑ Петрайа айәԓты Симон вохи;

14 Ԓўв нӑӈена йасӈәт йастәԓ, щи йасӈәт йурән нӑӈ нŏх пайәтԓайән пӑ нӑӈ хот тэԓэн па'.

15 Хун пӑ ма пŏтәртты питсәм, ԓыв эԓтыԓаԓа Йэмәӈ Ԓыԓ иԓ эсԓәщәс, оԓәӈән хŏты мўӈ эԓтэва эсԓәщәс.

16 Щи пŏрайән ма Турәм Куща йасәӈ нумәԓмәсәм, хŏты Ԓўв пŏтәртәс: 'Иоанн йиӈка ԓŏӈәԓтыйәс, нын пӑ Йэмәӈ Ԓыԓа ԓŏӈәԓтты питԓайты'.

17 Щиӈәԋща, Турәм ԓывиԓаԓа ищимәщ мойԓәпса мӑс ки, мўй хŏрпи мўӈева, Турәм Куща Иисус Христоса эвԓәм ŏтәта мӑс, ма пӑ хŏй, Турма йэртԓыты ат верәтсәм?»

18 Щит хуԓәтмеԓ йўпийән, ԓыв иԓ ромәпсәт пӑ Турәм ишәксэԓ, пŏтәртман: «Таӈха, па рут хŏйатәта па Турәм кӑрэк эԓты уԓәпса пеԓа керԓәты щир мӑс».

19 Щи кўтән Стефан йўпийән уԓәм ԋўхәтԓыты вер эԓты лакки мӑнәм ŏтәт, туп иудейәта йасәӈ тўвман, Финикия унты пӑ Кипр пӑ Антиохия унты мӑтсәт.

20 Ԓыв эԓтыԓаԓ тухԓәт Кипр хŏйатәт, тухԓәт пӑ Киринея хŏйатәт усәт, хŏй Антиохияйа йŏхәтман, Турәм Куща Иисус эԓты Йӑм Айкеԓ грек йохәта пŏтәртсәт.

21 Пӑ Турәм Куща йош ԓыв пиԓԓаԓән ус, пӑ йӑм арат ар хŏйат, эвәԓман, Турәм Куща пеԓа керԓәсәт.

22 Щит эԓты Иерусалимән ӑктәщиты хŏйатәт унты сый йŏхтәс, пӑ Варнава Антиохияйа мӑнты партса.

23 Ԓўв йŏхәтмаԓ пӑ Турәм йӑм кащаԓәмаԓ кемән, нŏх амтәс пӑ хŏԓ мŏхет Турәм Куща хŏща вещкат сӑмән катԓәсты партсәԓы;

24 Ԓўв йӑм сӑмпи ху ус пӑ Йэмәӈ Ԓыԓән пӑ эвәԓты щирән тэкәнман уса, щишән. Щиӈәԋща йӑм арат мир Турәм Куща пеԓа керԓәс.

25 Йухәт Варнава Савл кӑшты урәӈән Тарса мӑнәс пӑ, ԓўвеԓ уйәтмаԓ кемән, Антиохияйа тусԓы.

26 Тӑԓаӈ тӑԓ–ԓўӈ ԓын пойәкщәты хŏйатәт ӑктәщиты тӑхайән йӑм арат хŏйат утәԓтәсӈән, пӑ утәԓтыты йох Антиохияйән веԓщи щи христианәта айәԓты питсайәт.

27 Щи хӑтԓәтән Иерусалим эԓты Антиохияйа Турәм айкеԓ туты хŏйатәт йŏхәтсәт.

28 Пӑ ԓыв эԓтыԓаԓ и ху, нэмәԓән Агав, нŏх ԓоймаԓ кемән, Йэмәӈ Ԓыԓән аԉман, йастәс, мӑтты иса мўв ԓŏватән ун ԓэԓԓы щир питәԓ, Клавдия кесарь пŏрайән щи уԓәм щир.

29 Щиӈәԋща утәԓтәты йох, кашәӈ ԓўв тӑйтŏтәԓ эԓты Иудейән уԓты хӑнам йохԓаԓа, ԋотәпса китты пŏтсәт,

30 щиты щи версэԓ, ӑктәм ŏхԓаԓ Варнава па Савл мŏхты эвәԓты хŏйатәт ун икета китсәԓаԓ.