Waraga ya Yühanna ma
Tumma tanno Yasu
Tafaꞌda tumma
Sorne ya tafïïnï Yühanna, iꞌi yungngo arigiri ma tanangnga tïndhïgï nja tafünügü kadu ma kaniisa koꞌdo na kadu kadalinggo eege kudumma ma tamma tanno eene ka Yasu Almasiihi no. Iꞌi arigiri aꞌda Almasiihi ara tiiꞌbi kadu na anu ka tumma tanno Masala no, ara ka anangnga talïngnge a kadu tanno ütü ka tamma ka Masala no. Iꞌi arigiri nawaraga co nakaniisa tanno ïïdümmü kafünü keera no ma tuuꞌbu eege ka nanggeedi aꞌda kütü ka tamma kafada ka fïïnï ma talaana tanno toroko no nja ungngo ma tamꞌbaga (Tumma na Yasu 2—3). Yühanna ikiri eema yiini ka tijöögö ma Masala ka kööyö nja tanno amana tïdhïndhï iini (Tumma na Yasu 4). Yühanna iji ꞌbuugu ma dhünggü ya agiididene, Almasiihi ya aꞌduga sorne ka nïïsö ma Masala ya kudumma iini iꞌi yungngo ama tafaꞌda iꞌi. Tiji ꞌbuugu no kaala angnga aꞌda Masala nja Almasiihi eege kungngo kafa ka eema tiya ka ꞌbüdhülü ya (Tumma na Yasu 4—5).
Yühanna iji ꞌbuugu ma tahükümü tanno ara töꞌdö ka kadu tanno anu ka Masala no, tiji ꞌbuugu ma nahitimi ka ïïdümmü kafünü eera (Tumma na Yasu 6.1—8.5), tijöögö ma ïïdö ka ïïdümmü kafünü eera (Tumma na Yasu 8.6—11.19), nja tijöögö ma naadho ka ïïdümmü kafünü eera (Tumma na Yasu 16.1–21). Almasiihi ara tiiꞌbi tatoroko ara tümmü kadu na anu ka timinꞌda tanno iini ïnꞌdïlï kungngo (Tumma na Yasu 17—20). Masala mara tagaꞌda ꞌbüdhülü ya, mara ka talinggo ꞌbüdhülü ya issi ya, a kadu na ümmü iꞌi kada dhorro no kara taneene kada unggodho taꞌbilli. Taalo ꞌbïïdï ma ïïye ma tadhügürü alla tinꞌdi alla inde (Tumma na Yasu 21—22).
1
1 Tumma na Yasu Almasiihi ka ööꞌdö iini ndama Masala, aala a kasaga tanno oono minna ara talinggo adene areere. Magürünü tadhangga yoono aꞌda aco adirina a tasaga tiya oono Yühanna. 2 A Yühanna tadiri eema yiini ka tadïnö kide ya nyeꞌdꞌde ma Masala nja tumma tanno Yasu Almasiihi. 3 Aꞌdiila nja ömöꞌdï tiya ïïrï tumma ma taneꞌbi no, aꞌdiila nja kadu na toodo kide kamma kide, kanangnga tumma na kirinja kide no ka nanggeedi, kudumma uuru ka ndakete.
Tööjülü nakaniisa na ïïdümmü kafünü eera no
4 Aꞌa na Yühanna nunggu aꞌa tumma no co nakaniisa tanno ïïdümmü kafünü eera no ka anya ma Asiya no.
A türü nja taꞌdiila tanno Masala a tananja aaga ndama Masala ndama tiya inggide ya nja tiya aganna kide ya nja tiya ara töꞌdö ya, 1.4 Töꞌdö kürö 3.14 ndama nagoronggore tanno ïïdümmü kafünü eera no kidha ma kööyö tiya iini, 5 ndama Yasu Almasiihi ya adho ka fïïnï ya, ya adïnö ka tumma ma Masala, ya afïkïꞌdö ka inde ka dhidha ya, a tauugaara ma naguugaara ma ꞌbüdhülü. Iꞌi asaasa angnga oolona angnga ka tatoroko tanno aja ana erïïdö tiya iini. 6 Anangnga angnga kada tauugaara nja kaꞌboge ma talinggo ada a Masala nja Pupa tiya iini, tïdhïndhï nja türü kungngo iini turi taꞌbilli. Amiin.
7 Aaga assa kini inni unggunu atöꞌdö ndama tülüügü, 1.7 Danial 7.13
a kadu nyeꞌdꞌde kara tiji iꞌi
nja kadu tanno üfü iꞌi no, 1.7 Sakariya 12.10
a kadu ka ꞌbüdhülü nyeꞌdꞌde tafara kudumma iini.
Kara tatiminꞌda. Amiin.
8 Masala Uugaara miki, “Aꞌa na dhidha na ta eere, oogo ma ꞌbïtïngngö, maganeene, oogo mungngo mara töꞌdö, mana türü ma eema nyeꞌdꞌde.”
Tata tümꞌbü ma tumma tanno Yasu
9 Aꞌa na örre tiya ada Yühanna, angnga ta unggodho ka dhügürü nja tauugaara nja tidhi oona kuꞌbu naaja ka Yasu. Naganna aꞌa ka jasiira ma Batümüs kudumma tumma ma Masala nja tumma tanno Yasu. 10 Ïkïrï Koronggore ka ꞌdïngngö kede ka oona ka uuru ma Uugaara, ïkïrï aꞌa ka föönyö ömöꞌdï kalneege koꞌdꞌdo afa fara ma tïnïïdö. 11 Iki, “Kiri eema yüüdü ka ijöögö ka sorne ya kuꞌbu nunggu co a nakaniisa tanno ïïdümmü kafünü eera no ka Afosus nja Samirna nja Pregamus nja Tiyatira nja Saardis nja Filadlifya nja Ladükïya.”
12 Nïkïrï aꞌa ka tassa keere ma tïïrï ömöꞌdï ya eema nja aꞌa ya, nasala nakoyo ma nagalamba ma dahaba ïïdümmü kafünü eera. 13 Nasala aꞌa ömöꞌdï ka ꞌdïngnge ka söödö ma nakoyo ma nagalamba afeene nja ꞌBiiꞌbala ma Tadüꞌdꞌdü, tenꞌdi ma ungngo iini ka oona ma dhonggoro malla maco uune, a jönnö ma dahaba mimiꞌdidene kini ka orro. 14 Awu ma üüdü yiini aꞌbassa afa musa, afeene nja ndugaara, ïïye niini taꞌdangngaꞌda afa ïssï. 15 Uune niini kalimaana afa tanyaanya na lukulukadene ka motooꞌdo no, tumma niini kafeene nja fara ma ꞌbïïdï tiya ïïsö kuꞌbu dhabbu ya. 16 Ümmü midigi mïïdümmü mafünü eera ka nïïsö ma kuri nja kuluꞌba ma dhonggoro mo, mana kuri ka naꞌdugugini ateera meene micci akürö ndama miini ka nïïnö, alimaana ka dhugudha afa ndanaaya ma uuru ka teene.
17 Kede ka tasala iꞌi ya naꞌdïnggö kini ka uune afa ömöꞌdï ya eyi ya, 1.17 Danial 8.16–19; 10.7–12 ïkïrï ka tümmünü nïïsö ma kuri niini eede ka oona iki, “Fa tariꞌba, aꞌa na dhidha na ta eere, 1.17 Asaiya 44.6 18 aꞌa nefe ka ꞌdï ya naga eyi aꞌa nungngo nefe ka ꞌdï taꞌbilli turi taꞌbilli, aꞌa nana türü nadagiiꞌbi inde nangafata ma inde ungngo eede nja ꞌbuugu ma inde.
19 “Nggeege arigiri eema yüüdü ka ijöögö ya so, eema ya ꞌbïtïngngö nja tiya ara töꞌdö keere afeꞌde ya. 20 A nïïmö ya küdhü ma midigi tammo ïïdümmü mafünü keera mo müüdü kijöögö kede ka nïïsö ma kuri mo, nja nakoyo ma nagalamba ma dahaba nüüdü na ïïdümmü kafünü eera no, midigi tammo ïïdümmü mafünü keera mo eege ka kadhangga ma nakaniisa tanno ïïdümmü kafünü keera no, nja nakoyo ma nagalamba ma dahaba na ïïdümmü kafünü eera no eege ka nakaniisa tanno ïïdümmü kafünü keera no.”