1 Isa Fado Alayen culuwuna leji duwon, fuwurawanju nanjuro isane tiro tando tando Fado Alayedǝa fǝleduwuro badiyera. 2 Amma Isaye tayiro: «Awo ani sammaa ruwwa, gǝna? Jiremaro nayiro wulnjagakki, kau ani sammaa wurjane fijai, har tiloma kǝla kamanjuyen gapciwaworo walji,» yeno.

3 Isa kǝla Kau Jaitunnen napcǝna duwon, fuwurawanju runjan isane tiro: «Andiro wulsagane, sawi awo ani wakkajai? Koro sa kǝndenǝm-a sidu duniaye-aye cǝdiya, awi alama duwon ambo fǝlediyidǝ wo?» cane tia keworo. 4 Isaye tayiro: «Hangal gǝnanowo, bare wunduma nayia njawatkǝnni! 5 Am ngǝwu cunilan* 24.5 cunilan - Cu Almasiwu Alaye kǝlanjaro ngojane tayima ti wo cani. isane: “Wuma Almasiwudǝ wo!” cane am kada cawatki. 6 Kǝriwu na karǝnso-a kuruwuso-alan nukcǝnaro fanuwiya, bare hangalndo cijǝnni! Sai awo ani burwon wakkajaiya duwon, amma sa njerorambe kua yaye cǝdǝnni. 7 Lardu-a lardu gade-a lawaladai, koro kǝrmai-a kǝrmai gade-a ye kattenjan kǝriwu gǝrjai. Kǝna ye na naro ngayi, koro cidi ye na gadegaden loloji. 8 Awo ani samma badiduram boneye bas, alama kamu tia curo lejǝna gai.

9 «Daji nayia njadane basarnjane roro njeyesi, koro cuni nangaro† 24.9 cuni nangaro - Isaa kasadduwwa nangaro. jama duniaye samma wanjai. 10 Daji am ngǝwu ye wua ganja koljai. Laa aman amanjaye jawui, laa gade yea wajai. 11 Koro nawiya kattuwuye isane am kadaa jambajane cawatki. 12 Kǝla jirenambu tǝrganayen kǝrawo am ngǝwuye tǝgǝrdi. 13 Amma kam mǝrje har sa njerorambero‡ 24.13 sa njerorambe - Kǝnde Tada Kambedǝ. dǝganamadǝ njǝkkawo cuwandi. 14 Koro kawuɍi kǝji nodo bargaaye adǝ ye jama duniaye sammaro shedaro wuldiyi duwon, daji njeroramdǝ isi.

15 «Adǝ nangaro sa duwon awo waada jauro batti masiwa kudoma lawarnju Nawi Daniyel ruwujǝnadǝ na jauro darajaan daada ruwiya,† 24.15 Dan 9.27; 11.31; 12.11 (Kǝradumadǝ asujo!), 16 daji am lardu Yahudiyayen dasaanadǝ cija kauro cagaso leja! 17 Kam kǝla soronjuyen dǝganadǝ bare jǝpce kare ngoduro curo sorodǝyero ngaanni! 18 Koro kam kulolan dǝganadǝ ye bare kalwunju ngoduro waldǝnni! 19 Yim anin kamu curoa so, nganji cǝmbia sodǝ, kuttunja! 20 Bare kasondo nangǝɍilan§ 24.20 nangǝɍi - Curo lardu yaudiyayen sanju jauro samsu ye, kuttu ye. bi yim tustuyen wakkajǝnniro Alaa korowo! 21 Dalilnjudǝ sadǝn bone jauro kuttu mbeji, bone duwon sa dunia alaktǝnadǝn tai kuro kudero ngaltema jiɍinju tuwandǝnni fuwu yen fagat tuwandiwawo nangaro. 22 Koro ca Kǝmande bone adǝye kawunju fulujǝnnia, wunduma njǝkkawo cuwandiwawo. Amma am kǝrejǝnadǝ nangaro kawudǝa fuluji. 23 Sa adǝn kam laaye nayiro: “Akkonju Almasiwudǝ!” bi “Towonju ti!” cǝnia, bare tia yasarawwi! 24 Dalilnjudǝ almasiwuwa kattuwuyeso-a nawiya kattuwuyeso-a isane alama kura so, awo ajabba ajabba so cadǝne, yoyenoa, har am kǝrejǝnadǝmaa jambajane cawatki. 25 Akko kawu wakkajidǝro, adǝa nayiro wulnjagakkǝna. 26 Adǝ nangaro am laaye nayiro: “Towonju ti karaalan!” cania, bare lenuwwi. Bi “Akkonju ti curo ngimben!” cania, bare tayia yasarawwi. 27 Jiɍi same adinnamlan har fǝdero cuwalde wassidǝ gai, kǝnde Tada Kambedǝ ye ngai. 28 Na ɍiwa dǝganalan kowuwaso ye captai.

29 «Sadǝman ngawo bone yim aniyen kǝngal cǝlǝmbo walji, kumbal ye nurnju ciwawo, sillowuwaso ye samelan casuri, koro kǝnduwowa sameye ye jauro lolojai. 30 Daji alama Tada Kambedǝ samelan fǝlediyi. Daji jama duniaye samma karwunja kuttaji, koro Tada Kambe kǝnduwoa-a jauro darajaa-a kǝla fofou sameyen isi carui.† 24.30 Dan 7.13-14 31 Adǝgaima malaiyawanjua nuktu kura kangadiyen cunode talgǝmo duniaye dewu samman tai ci dajiram sameyesoro yade amnju kǝrejǝnadǝa capcai.

32 «Ya tarmuyen misal adǝa asunowo! Sa fǝktu badije kalu ɍijiya, nangǝɍi karǝnjǝnaro nonuwwa. 33 Ngaima awo ani samma wakkajai ruwiya, ti cinnalan del karǝnjǝnaro* 24.33 ti cinnalan - Tada Kambedǝye kǝndenju del karǝnjǝna. nonowo! 34 Jiremaro nayiro wulnjagakki, am jaman adǝye sanuiwawo, sai awo ani samma wakkajaiya duwon. 35 Same-a cidi-a baworo waljai, amma manani tǝmmaro baworo waljiwawo.

36 «Amma yim bi sa duwon awo ani wakkajaidǝa wunduma nojǝnni. Bawadǝro kajia, malaiyawa samelan dasaana ye nojanni, Tadadǝ ye nojǝnni. 37 Kǝnde Tada Kambedǝye alamanju jaman Nawi Nuhuye gai. 38 Awoa jaman adǝn kawu ingi tufanaye isidǝro, amso jawui ye, casai ye, larusa so, niya so cadi ye ngai duwon, har yim ise Nawi Nuhu curo maaradǝyero kǝrgawo. 39 Nanjama nangi duwon, ingi tufanaye ise tayi sammaa siyeyeno. Kǝnde Tada Kambedǝye ye adǝgairo walji. 40 Daji yim adǝn kongwa yindi kulolan duwon, fal ngojane fal koljai. 41 Koro kamu yindi ye nedu cadi duwon, fal ngojane fal koljai.

42 «Adǝ nangaro faadaro dǝgaiwo, dalilnjudǝ yim Kǝmando isidǝa nonuwwi nangaro. 43 Amma adǝa nonowo, ca kǝma fadoyedǝ sa barwu bune fannjuro isidǝa nojǝnaa, faadaro dǝgane tia kolje fannjuro ngayiwawo. 44 Adǝgaima nayi ye faadaro dǝgaiwo, dalilnjudǝ sa tǝmanuwwilan Tada Kambedǝ isi nangaro.

45 «Wundu gǝle wolodi amanna ye, hangalla yedǝ wo, ti duwon kǝmanja tia kǝreje wolodiya amanjuro nuwanja kǝmboye sa tǝraanan njoro galajǝnadǝ? 46 Kǝjinju wolodi kǝmanju waldiya, ngai cǝdi najiyidǝ! 47 Jiremaro nayiro wulnjagakki, kǝmadǝ kǝndanju sammaa mukko wolodi adǝyero cakki. 48 Amma ca wolodi adǝ ti kam batti duwon karwunjun: “Kǝmani duwan isiwawo,” cǝne 49 wolodiya amanjua babaktu badije mbalmaso-a kallo jawune casairo walyenoa, 50 daji wolodi adǝye kǝmanju yim tǝmajǝnni-a sa nojǝnni-alan ise 51 tia kirwolan jajarje curo mǝnafǝkkayero cakki. Nadǝn so ye tǝdi, sheɍi ye naldi.