9
Poloa Isaleli veafe havino hau humatene.
1 Kalaisiene aigamaena mainoafe tamagelafa nehue. Havige nohue. Alu Aotage Avamumoa nagupi mainegena nagualeti tamage nehue. 2 Yuta anaganimoya Yisasi kea ohaviyayafe mukia kanafina naipamoa kanaage nehuno nagata neaiye. 3 Nagoke nofi anaganimoya amakua aiyahae huya Yisasi ke havisayafe Anumayamotega ke huna havigesugeno “Hai vainateno natalenegena hani yapi nagaila nenateka ani veala amavalesane.” huna havigesua nagesa nehavue. 4 Nagai nofi anagala Isaleli veanea Anumaya Kotina nafaneyagaa mainageno Anumaya Kotia agaia tokiya hale yamaa amaveliteno alino hagelafi-matenea kea humateteno kahegi kea amamino agai agima alisaga hisaya aliyana amamino “Maa yama hulamategahue.” huno hulokiya vaimalenea kea hamapai-maine. 5 Ani nofipiti tokiyaage taginagomoya falote humainayanagino Kalaisia Anumaya Kotima tamaugafa aligatigahie huno hutenea kanoa ani taginagomoyafiti velafa maisiafe falote humaine. Kalaisia mukia yana kava yagaino Anumaya Koti maineanagita mukia kanafina agola agia alisaga hisune. Tamage.
Anumaya Kotia agaia veane maisaya yafe hapalimatene.
6 Anumaya Kotima hulokiya vaimalenea kemoa falote huno afa ya kana nehie huna nehuo? Aao na kea nohugi Isaleli veafe tamage nehue mukia ani veamoya Anumaya Kotina nafaneyagaa omainae. 7 Mukia Apalahamuna aginagomoya nafaneyagaa omaitafa huya omainagi nayona Anumaya Kotia Apalahamufena mage higeno autamafina kae-maleneane
“Kagaika nafanemoa Aisakima atesia nafaneyaga kagai kaginagomoya maitafa huya maigahae.” huno humaineane.
8 Ani kemo aepaa mage humaine mukia vealavemoya nehaya kavateti Apalahamuma atenea nafaneyaga Anumaya Koti nafaneyaga omainagi Anumaya Kotia hulokiya vai-malenea kelema amametiti humainaya veafe “Apalahamuna nafaneyagaa mainae.” huno humateneane. 9 Anima hulokiya vaimalenea kemoa mage huno humaine “Nagayama malenoa kanamoma efalote hisigenoa Selaa ne nafane ategahie.” huno humaineane. 10-12 Ani yamaagefeno-magi taginagomoa Aisakia ko huteno aama Lepekana alitenegeno aipa yama hiana kuyave nafanelata aipafina kanale yano havi yano huana ohunaa kanafinagino Anumaya Kotima humaineana agaia haiya yateti veala hapalilatenea kava huno Anumaya Kotia mage huno itaanimofena hapaiye “Yage nafanekamoa haenaga nafanekamo aliya kano maineno akave malegahie.” huno humaineane. Ani yamofena mage huno humaine Anumaya Kotia veala kanale kavama humainayafene huno ohapaligahianagino haisia kanomofe ke hinageno agaitega egahie. 13 Anumaya Koti autamafina mage huno humaineane “Yekopua nahau nayamopafi nahaiya kanogi Isoa onahaiya kano maine.” huno humaineane. 14 Naa hu-maineanagita naane huta hisune? “Anumaya Kotia fatago ohia kava humaine.” huta hisuno? Aao naa kea ohutafa huta ohugahune. 15 Mosesefena mage huno humaineane “Nago kanohema ‘Nahau hutena kalagi aitegahue.’ hunama hisua kanomona kalagila aitegahue.” huno humaineane. 16 Naa humaineafe Anumaya Kotia kalagi aisia yana veamoya “Namisie namisie.” huya nehuya veamoya “Nayamufa aina aliya alisuafe kalagila ainategahie.” huya hisaya yatetila kalagila aioamategahie. Anumaya Kotia “Ma kanomofe nenahaiyanagina kalagi aitegahue.” huno hisia kanomona hau huno kalagila aineate. 17 Anumaya Kotia Isipi sauve kanoa Felofe mage huno higeya kae-malenayane
“Alihetigatenoa yafe mukia veamoya tokiyania agesaya yafeene navagemoa mukia kumate ute ete hisia yafeene ‘Kagaya ala kano maiyo.’ huna ali hetigatenoe.” huno humaineane.
18 Anumaya Kotia haisia veamogamina hauna humateno kalagila aimatenegi agaia kema ohavisaya yafe nagoa veamogamina amaku amakesa alino aililematene. 19 Nagoamogatama nagaifena mage hutama nahavigegahae “Naa nehianagi naa higeno veamogamifena ‘Havi kava nehae.’ huno nehie? Agaiama haisia agu agesa havisia yana ta ani yafena ‘Ohugane.’ huno hutegahie?” hutama hugahae. 20 Hugahagi kagaya mopale kanomoga hanaa augafa kano maineka Anumaya Kotifena aka huka kea vaitegane? Mopaleti aye kakalifeno talo humalenaya yopamoa talo hutenea kanomofena “Naa higeka nagaila maa huka talo hunatenane?” huno hugahio? 21 Aao, naa augafa kea ohugahie. Mopaleti aye kakalifeno talo humalenesia kanomoa talo humalenesia yana agaia yane. Nagola mopamo alaga alino nagola kanale susufanea talo huteno ani alagaleti havi aliyate susufanenema talo hisiana agaia yane. 22 Anumaya Kotia ania humaine. Tagaya agaia talo humalenea susufane kana huta mainone. Nago susufane kana veamoya kefo yama humainayafe tusi hai vaimateno himamualeti “Amakata aisia yana amamigahue.” huno humaineanagi mailava huno amakava-maineno kaiyekea hu noamate. 23-24 Amakava-maineafe tagaya Yuta veamoyaene Yuta vea omainaya veamoyaene agaialega visunafe ke hulatenea susufane kana veamogatihena, tusiya huno kalagila ailatenea veamogatina “Haenagama tokiya hale yania tamamisugetama aligahae.” huno hulatene. Nayona tokiya hale yamaa alisunafene huno talo hulatene. 25 Ani yafena Hoseaa, Anumaya Koti aune kanomoa Anumaya Koti humainea kea mage huno kae-maleneane
“Yuta veapi omainaya veafena ‘Nagaini nofi anaga mainae.’ huna hugahue. Nagua oamaminesua anagafena ‘Nahau nayamopafi nenahaiya anaga mainae.’ huna hugahue. 26 Anumaya Kotia ‘Nagai anaga omainae.’ huno humainea kumatega Anumaya Kotia amakaifena mage huno hugahie ‘Tamakaya nahaimu hanea Anumaya Kotinina nafaneyagania mainae.’ huno hugahie.” huno humaineane.
27 Aisaiyaa Isaleli veafe mage huno kae-maleneane
“Isaleli veamoya nafaneamima ateya atagufeyama hage li kahaepa kana huya kasagoya veane maigahayanagi osi anaga kanoa amaku amamena aligatigahue. 28 Anumayamoa ma mopale mainaya veala kaiyekea humateteno ‘Naa yama aligahae.’ huno humainea kemona ani kavala fatago huno aupa kanoa humateteno ali hano hugahie.” huno humaineane.
29 Aisaiyaa hagoteno mage huno humaineane
“Mukia tokiyaa hanea Anumayamoa osia anaga kanoatihe kalagi aioamateleasina mukiamogatina Sotomu mainaya veanene Komola mainaya veanene faliya fanane humainaya kava huteasine.” huno humaineane.
Isaleli veamoya amametiti ohayafe fatago veala omainae.
30 Naa hu-maineanagita naane huta hisune? Yuta veapi omainaya veala fatago veane maisayafe kasageke vokela ohunaya veamoya afaa Yisasia hulatenea yafe haviya amakupi maleya amametiti humainaya yateti Anumaya Kotia ani veamogamifena “Fatago veane mainae.” huno humatene huta hisuno? 31 Humateneanagi Isaleli veamoya tusiya huya kahegi kemona akave malesaya yafe kasageke vokela hayanagi ani kemona akave malelama ohunaya yafe fatago veanea omainae huta hisuno? 32 E, ani ke hisune. Naa higeya fatago veala omainae? “Tagaiti kasageke hisuna aliyateti fatago veane maigahune.” huya hayanagi “Yisasia hulatenea yafema havita lagupi maleta tametiti humainonafe ‘Fatago veane mainae.’ huno hulategahie.” huya ohunayanagiya fatago veanea omainae. Yisasia yafa kana humaineanagi agaifena haviya amakupina omalenaya yafe ani haletona yafate ayalega amaiya aye-kayopeliya asaga hulavi-mainae. 33 Anumayamo autamafina mage huya kae-malenayane
“Agegeho nagola aye hataga huliya asaga hulavisaya yafana Saiyoni malogeno hane. Asaga hulavigahayanagi agaifema haviya amakupi malenaya veamoya amakayea ohugahae.” huya kae-malenayane.