1 I sa milau a labino bung na lotu na beret ra kalako is uni, di watungi nama labino bung na lotu na Wanlakai. 2 Ra a kum lamlabino tene etabor torom o God, ma a kum tene ususer tagun a Warkurai, det nuknuk sur tu ngas na kisapi sur det in um doko o Iesu uni, uni det ngaran a taro.

3 Ra o Satan i ruk taru un o Judas, ara risano kai o Iskariot, i ara tagun a noino ma aru nat na ususer. 4 I wan torom a kum lamlabino tene etabor torom o God, ma a kum mugumugu anun a kum tene tamtamabat una rumu na etabor, ra i wasiso tomo nam det sur in pitar petlan tar o Iesu torom det. 5 Det gas, ma det watungi lena det in kuli nam tu mani. 6 O Judas i mulaot, ra i nuknuk sur tu wakak na du bung, ra kalako susut na taro, ra in pitar tar o Iesu ulamandet.

7 A labino bung na lotu na beret ra kalako is uni i wanpat, ra di ser um doko a kum sipsip uni sur din nani una labino bung na lotu na Wanlakai. 8 Ra o Iesu i tulu ru o Pita ma o Jon, ma i watungi tander lena, “Mur in nan ma mur in waninar andat a utna sur a labino bung na lotu na Wanlakai.” 9 Ra der tingi lena, “U nemi sur mir in waninari awai?” 10 I balu der lena, “Ra mur in nanpat sapat o Jerusalem, mur in etorom nam ara musano i los in labino koto na danim, ra mur in muri utiro una rumu ra in ruk uni. 11 Ma mur in watungi tan a taman a rumu lena, ‘A Tene Ususer i watungi lena: Awai i a kukur rumu ra met nam anung a kum nat na ususer, met in nan a utna na Wanlakai iai?’ 12 Ma in ese tar mur una labino kukur rumu sapat netes, ra di sa waninar tari. Mur in waninar a utna tiro iai.” 13 Ra der wan, ma der pastoromi ut a kum utna rop ra o Iesu i sa watung tari tander. Ra der waninar a utna na Wanlakai.

14 Ra a du bung i sa sot, o Iesu ma a kum aposel det kis una inangon. 15 Ra o Iesu i watungi tandet lena, “A nem doko i sur dat in nan a utna na Wanlakai, ra ka taramo i utmakai a ngunungut, 16 uni a watungi tamot lena, kan nan melet mo tu utna na Wanlakai tuk una bung ra o God in pam sot pas a kukurai ina Wanlakai una nun a matanitu.”

17 O Iesu i los pas a kap ma i watung wakak pas uni, ra i watungi tandet lena, “Mot in los pas a kap ri, ma mot rop mot in inum taguni. 18 Uni a watungi tamot lena, kan inum melet mo lako wain, tuk ra a matanitu anun o God in nanpat.”

19 Ra i los pas a beret, i watung wakak pas uni, i tibiki, ma i tabor det nami, ra i watungi lena, “Iri a pining, a pitari sur mot. Mot in pampami lenri, sur mot in ser nuk melet pas iau.” 20 Lenkutkai ra, numur tan a inangon, i los pas a kap ma i watungi lena, “A kap ri, a matok na kunubus tagun a gaping ra i tilingis sur mot, ra i dat tomo tar a taro nam o God. 21 Tama i! A laman o naro ra in pitar tar iau torom a kum ebar, kuri mir rarakon tomo una kabulu na inangon. 22 A lingmulus ut ra a Nutun a Musano in mat elar nam o God i sa kubus tari. Ikut in laulau sakit torom a musano ra in pitar tari torom a kum ebar.” 23 Ra det ting etetalai det lena, “Osi mo tagun dat in pam a utna ri?”

24 Det engaras sur osi tagun det din watungi lena i labo taun det. 25 Ra o Iesu i watungi tandet lena, “A kum king anun a taro ra ausur a taro Juda, det kuro laulau det, ma anundet a kum mugumugu det nemi sur din watung det lena det a kum wakak na tene warut. 26 Ikut torom mot ken lenra. Osi ra i labo taun mot in elar kut nami ra i natino, ma osi ra i mugumugu in elar kut nami ra i ser tartaromlu. 27 Osi ra i labo? O naro ra i kis una inangon, o, o naro ra i tartaromlu i? I ut ra i kis una inangon, niko? Ikut iau, a kis epotor tamot elar nami ra i ser tartaromlu.

28 “Mot, mot tur tomo nam iau una kum mamaut ra i wanpat torom iau. 29 Ma an pitar tar a kinkinis na king tamot elar nam o Tita i sa pitar tari tang, 30 sur mot in nangon ma mot in inum una nung a kabulu una nung a matanitu. Ma mot in kis una kum kiskis na king, ra mot in warkurai a noino ma aru kabotaro Israel.”

31 O Iesu i watungi lena, “Saimon, Saimon, tama i, o Satan i sa sasaring pas sur in lar mot, elar nama tene minarut ra i tangtang susuaro a wit mulus gusun a pinino. 32 Ikut a sa wararing taru sur ui, Saimon, sur gong anum a nurnur i puku. Ra u sa nukpukus melet, un udekdek a kum tistisim.” 33 O Pita i watungi tano lena, “Labino, a sa waninar taru, sur an nan tomo nam ui una karabus, ma una minat.” 34 Ma o Iesu i balu i lena, “Pita, a watungi tam, uniri a kereke ken kurkurirakuk utmakai, ra un ipul a tulu dino lena, ko tasman iau.”

35 Numur o Iesu i ting anun a kum nat na ususer lena, “Ra a tulu ru mot, ma katu paus na umubek mani anumot, o tu rat, o tu su, pepetlai, mot sibo ut sur tu utna?” Ra det balu i lena, “Awu.” 36 Ra o Iesu i watungi tandet lena, “Ikut uniri, osi ra anunu tu paus na umubek mani, i wakak sur in losi ut, ma a rat kai. Ma osi ra ka tin totok na inaim, i wakak sur in siuru ru anun a saket sur in kul pas tino. 37 A watungi tamot, din pam sot pas a tumtumus ri un iau, ‘Di watung tomo det nama kum tene sakino.’ Aisaia 53:12

39 O Iesu i pirso gusun a tamon, ra i wan usapat una Tangai na Oliw, elar ut nami ra i ser pami. Ra a kum nat na ususer det muri. 40 Ra det wanpat una nubual ra, i watungi tandet lena, “Mot in wararing, sur gong mot puku una ululam.” 41 I wan gisen lilik taru kut gusun det, i kis butkeke, ma i wararing lena, 42 “Tita, ra u nemi, un los ru a kap na mamaut ri gusun iau. Ikut gong u mur anung a nemnem, un muri ut anum a nemnem.” [ 43 Ra ara ensel tagisapat una langit i wanpat toromi, ma i udekdek tari. 44 I taramo a dekdek na tupunuk, ra i dekdek doko nama niaring. Ma a misongot na pinino i elar nama tutu na gap i puku pirso utiro upiso.] * Una ramano kum du buk una wasiso Grik, aru dino 43 ma 44 ka der kis.

45 I urop a niaring ra i tur, i milet melet torom a kum nat na ususer, ra i tama det ra det sa inep dumun, uni a pinindet i tungulu nama tupunuk. 46 Ra i watungi tandet lena, “Ilai ra mot inep dumun kut? Mot in katutur, ma mot in wararing, sur gong mot puku una ululam.”

47 Ra o Iesu i wasiso utmakai, a labino kunur na taro det wanpat. Ra o Judas, ara tagun a noino ma aru nat na ususer, i mugu pas det. I wan torom o Iesu sur in gom a pangpagor na wano. 48 Ra o Iesu i tingi lena, “Judas, pepetlai, un pitar tari mo a Nutun a Musano torom a kum ebar, nama egom?”

49 Det ra det wan tomo nam o Iesu det tasman asau ra in nanpat, ra det tingi lena, “Labino, pepetlai, met in waim nama numet a kum totok na inaim?” 50 Ma ara tagun det i tau kutus ru in nosot na talngan a tultul anun a mugumugu na tene etabor torom o God.

51 Ra o Iesu i turbati lena, “Gong!” Ra i pam in talngan a tultul, ma in talngano i wakak melet. 52 O Iesu i wasiso torom a kum lamlabino tene etabor torom o God, ma a kum mugumugu anun a kum tene tamtamabat tagun a rumu na etabor, ma a kum mugumugu anun a taro ra det wanpat suri. I watungi lena, “Pepetlai, kutiro iau a tene inaim ma a tene wolong, sur i mo ri mot wanpat nama kum totok na inaim ma a kum nalnal sur iau? 53 Una kum bungbung rop dat ser kis tomo una rumu na etabor ma ka mot pam ukai iau. Ikut uniri anumot a du bung, ra a dekdek ina dumirum i mugu mot.”

54 Det pam ukai pas o Iesu, ra det ben gisen ru i. Det beni utiro una rumu anun a mugumugu na tene etabor torom o God. Ra o Pita i mur nanan o Iesu, ikut i bakbak ut gusuni. 55 Ra det sa tagol tar a sungun nago utamon, ma det kis tomo, o Pita kai det ut. 56 Ara toraro, a tultul, i tama pasi ra i kis taru una talapor ina sungun, ra i nas dekdeki, ma i watungi lena, “A musano ri, i ser wan tomo utkai nam o Iesu.” 57 Ikut o Pita i ipul lena, “Le, ka tasman o Iesu.” 58 Numur lilik kut, ara bulung i tama pas o Pita ra i watungi lena, “Ui kai tagun det.” Ra o Pita i balu i lena, “Le, iau awu.”

59 Numur lilik melet, ara bulung i ngongos lena, “A lingmulus ut, a musano ri i ser wan tomo utkai nam o Iesu, uni i a te Galili.” 60 O Pita i balu i lena, “Le, ka tasman asau ra u wasiso uni.” Ra i wasiso utmakai, uniutra a kereke i kurkurirakuk mut. 61 A Labino i tupukus, i tamtama tokodos torom o Pita, ra o Pita i nuk pas a wasiso anun a Labino ra i sa watung tari tano lena, “Uniri, a kereke ken kurkurirakuk utmakai, ra un ipul a tulu dino lena, ko tasman iau.” 62 Ra i pirso gusun a nubual ra, i tangis dokodoko i.

63 Det ra det tamtamabat o Iesu, det urongon laulau uni, ma det mirasi. 64 Det pulus bat pas arin matano, ma det watungi tano lena, “Ui a poropet, un inanos met, osi ra i takalo ui!” 65 Ma det mang sakosako i nama susut na wasiso utkai.

66 Ra i waspi, a kum mugumugu anun a taro, a kum lamlabino tene etabor torom o God, ma a kum tene ususer tagun a Warkurai det wan tomo. Ma di ben pas o Iesu torom det una nundet a kiwung, ma det watungi tano lena, 67 “Ra ui a Karisito, un inanos met.” Ra o Iesu i balu det lena, “Ra an inanos mot, ka mot in nurnur una nung a wasiso. 68 Ma ra an ting mot nam tu iting, ka mot in balu i. 69 Ikut, tur pasi uniri, a Nutun a Musano in kis una papor sot na laman o God, i ra i dekdek sakit.” 70 Ra det rop det ting o Iesu lena, “Ui a Nutun o God niko?” Ma i balu det lena, “Mot sa watung sot pasi, iau ut ri.” 71 Ra det watungi lena, “Dat nem melet lako wasiso na etakun sur asau? Uni dat sa longoro tar anun a wasiso ri.”