1 Un ara Bung na Sabat, o Iesu i ruk sur in nangon una rumu anun ara mugumugu anun a kum Parisi, ra a taro det tama sursuri kut sur tu utna ra in pam raro i. 2 Ara musano ra i misait, a pinpinino i sursurung, i kis taru numugu tan o Iesu. 3 O Iesu i ting a kum tene ususer tagun a Warkurai ma a kum Parisi lena, “Pepetlai, i tokodos una Warkurai sur din ulangolango a taro una Bung na Sabat o awu?” 4 Ikut ka det balu i. O Iesu i pam pas a musano ra, i ulangolango pasi, ra i tulu ru i. 5 Ra o Iesu i ting det lena, “Osi tagun mot ra a nutunulik o anunu tu bulumakau in puku taru un tin nutung na danim una Bung na Sabat ra ken dat toto lakit pasi?” 6 Ma ka det balu lar pas anun a wasiso ri.

7 Ra o Iesu i kis una inangon ri, i tama a taro ra det wanpat, det pilok pasi ut a kum kiskis sa numugu. Ma i watung ara wasiso elelar tandet lena, 8 “Ra taio in ben pas ui una lukaro na nolin, gong u kis una kiskis sa numugu, sako in ben pas taio ra i labo tam. 9 Ma o naro ra i eben una lukaro in nanpat ra in watungi tam lena, ‘Un katutur saro o naro ri.’ Ra un nan nama maimai sur a kiskis kunago numur. 10 Ikut, ra din ben pas ui, un nan ma un kis una kiskis nago numur sakit. Ra o naro ra i eben in nanpat, in watungi tam lena, ‘Pasang, un tur ra un nan urin numugu.’ Ma din ulabo pas ui umatandet ra mot kis tomo una inangon. 11 Uni det rop ra det ulabo pas det, din unatino det. Ma osi ra i unatino pasi, din ulabo i.”

12 Numur o Iesu i watungi tan a Parisi ra i ben pasi sur a inangon lena, “Ra u waninar pas a inangon, gong u ben pas a kum paspasam, ma a kum tistisim, ma a kum kukum, ma a kum tene ululeng ra det kis milau nisam. Uni det ri det in ben pas ui ma det in balu i torom ui. 13 Ra u waninar pas a inangon, un ben pas kut a kum sibo na taro, det ra a pinindet i mat, det ra det kaukawar kut, ma a kum pulu. 14 Ra un pami lenri, un dan. Uni, kalako utna anundet sur det in balu i tam, o God in balu i tam una bung ra a kum tene tokodos det in laun melet.”

15 Ara tagun det ra det wangon tomo nam o Iesu i longoro a kum wasiso ri, i watungi tano lena, “Det ra det in nangon una lukaro una matanitu anun o God, det dan.” 16 Ra o Iesu i watungi tano lena, “Ara musano i waninar pas a tarai na lukaro, ma i inanos mugu tar a susut na taro sur det in nanpat. 17 Ma una bung na lukaro mo, i tulu ru anun a tultul torom det ra di sa inanos mugu tar det, nama wasiso lenri, ‘Mot in nan mo urin, uni a kum utna i sa waninar rop.’ 18 Ikut det rop det wasiso batbat det kut. A mugano i watungi kut tano lena, ‘A sa kul tar a du piso. An nan munung sur an tama i. A saring ui sur un madek ru iau mukut.’ 19 Ra ara kai i watungi lena, ‘A sa kul pas a noino karabau. An nan munung sur an lar tar det. A saring ui sur un madek ru iau mukut.’ 20 Ma ara kai i watungi lena, ‘Unikutri a nolin, ma kan pet lar pasi sur an nan.’

21 “A tultul i milet melet ra i inanos anun a labino una kum wasiso ra. A labino ra in balano i sungun doko, ra i watungi tan anun a tultul lena, ‘Un nan lakit sur a kum tartarai na kisapi ma a kum natnat na kisapi una tamon, ra un ben pas a kum sibo na taro, det ra a pinindet i mat, a kum pulu, ma det kai ra det kaukawar kut.’ 22 Numur a tultul i watungi lena, ‘Labino, a sa pam tar a kum utna rop ra u itula suri, ikut a ramano kum kolo liklik kura utmakai una rumu.’ 23 A labino i watungi tana tultul lena, ‘Un nan sur a kum tartarai na kisapi ma a kum natnat na kisapi sa ubual, ma un ungongos pas a taro sur det in ruk, sur anung a rumu in bukus wakak. 24 A watungi tamot, katutaio tagun det, ra di sa inanos mugu tar det, in nangon tagun anung a lukaro.’ ”

25 A labino kunur na taro det wan tomo nam o Iesu. I tupukus torom det ra i watungi lena, 26 “Ra taio i nem na mur iau, ma i nem doko o tamano, o nano, anun a ino, a kum nutnutunu, a kum tistisino ma anun a nilaun kai, ikut anuna marmaris torom iau ken labo taun anun a marmaris torom det ri, i ausur anung a nat na ususer. 27 Ma osi ra ke los pas anun in nanai kutus ma i mur iau, ken pet lari sur in nanpat anung a nat na ususer.

28 “Ra taio tagun mot i nemi sur in pam tu tarai na rumu, in kis munung ra in pam mugu pas a matana rumu rop, sur in tasmani ra anun a mani in elar sur in urop pasi, o awu. 29 Sako in utur kibin tari kut a rumu, ma ken urop lar pasi. Ra a taro rop ra det in tama i, det in urongon laulau uni, 30 ra det in watungi lena, ‘A musano ri i utur kibin tari kut a rumu, ikut ke urop lar pasi.’

31 “Ra tu king tomo nama noino arip na taro na inaim anunu in nan una inaim tomo nam ara king gisen kai ra anun aru noino arip na taro na inaim, i wakak sur in kis ma in nuknuk mugu pas lena, pepetlai, det to pas aru noino arip na taro o awu. 32 Ra awu, in tulu ru anun a kum tultul sur det in ukodos a wasiso tomo nama king sur a malmal, ra det bakbak utmakai. 33 Lenkutkai ra torom mot, ra taio tagun mot ken madek ru anun a kum utna rop, i ausur anung a nat na ususer.

34 “A sol i wakak, ikut ra a makasman ino i sa rop, din umakasman meleti mo pepetlai? 35 Ke to pasi sur din ubeki una kinobot ma ken uwakaki kai a piso, din woro ru i mukut. Osi ra arin talngano kura, i wakak sur in longoro nami.”