1 Ra o Iesu i sa watung rop tar a kum wasiso ri torom a taro, i wanpat tiro o Kapernaum. 2 Ara mugumugu anun a kum tene inaim tagitong o Rom i kis tiro iai. Ara tagun anun a kum tultul i misait, milau mo sur in mat. A tultul ri, i labo umatan anun a mugumugu. 3 A mugumugu anun a kum tene inaim i longoro a wasiso un o Iesu, ra i tulu ru a ramano kum mugumugu anun a taro Juda sur det in saringi, sur in nan toromi, ma in ulangolango pas anun a tultul. 4 Ra det wanpat torom o Iesu, det saring dekdeki lena, “A musano ra, a wakak na musano, i wakak ra un tarom toromi, 5 uni i maris dat a taro Juda, ma i kul tar anundat a rumu na lotu.” 6 Ra o Iesu i wan tomo nam det.

Det sa milau a rumu, ra a mugumugu anun a kum tene inaim i tulu ru a ramano kum paspasano torom o Iesu nama wasiso lena, “Labino, gong a utikidis ui, uni ka tokodos sur un ruk una nung a rumu. 7 Ka nuki kai lena a tokodos sur an nan torom ui. Ikut, un watung tu wasiso kut, ra anung a tultul in langolango. 8 Uni iau a musano ra a ser tarom una warkurai anundet ra det labo tang, ma di pitar tar a warkurai kai tang sur an warkurai a taro na inaim. Ra an watungi tan taio lena, ‘Un nan,’ in nan kut. Ma torom taio kai lenri, ‘Un nan urin,’ in nan kut urin. Ma torom anung a tultul lena, ‘Un pam a utna ri,’ in pami kut.”

9 O Iesu i longoro anun a wasiso, ra i kisin doko, ma i tupukus torom a taro ra det muri, ra i watungi lena, “A watungi tamot lena, ka tama tar tu te Israel ra anun a nurnur i labo elar nama musano ri.” 10 Ma det ra di tulu tar det, det milet melet sur a rumu, ra det tama i lena a tultul ra, i sa langolango melet.

11 Ke suanoi kut, ra o Iesu i wan utong una tamon di watungi nam o Nain, ma anun a kum nat na ususer ma a labino kunur na taro kai det wan tomo nami. 12 Ra i wanpat milau una matansako ina tamon, a taro Nain det los pirso ara minat, a barman, i ara sot kut a nutun ara ula. A susut na taro tagitong una tamon ra det wan tomo nama ula. 13 Ra a Labino i tama a ino ra, i marisi ma i watungi lena, “Gong mo u tangis.” 14 I wan milau, ma i pam a lu ra di los a minat nami, ma a taro ra det los a minat det tur sikot. I watungi lena, “Barman, a watungi tam, un katutur.” 15 Ra a minat i katutur ma i wasiso. Numur o Iesu i pitar melet tari torom o nano.

16 A taro rop det kisin ma det ngara, ma det watung ulabo pas o God, ma det watungi lena, “A labino poropet i sa wanpat epotor tandat. O God i sa wanpat sur in warut dat, anun a taro.” 17 Ra a wasiso ri un o Iesu i wan sarara tong una papor Judia rop, ma a kum tamon milau kai.

18 A kum nat na ususer anun o Jon a Tene Baptaiso det inanosi una kum utna rop ri o Iesu i pami. O Jon i kabo pas aru tagun det, 19 ra i tulu ru der torom a Labino sur der in tingi lena, “Ui mo ra di wasiso mugu taru un ui lena, un nanpat, o met in kis langlang utmakai sur taio?”

20 Ra der wanpat torom o Iesu, der watungi lena, “O Jon, a Tene Baptaiso i tulu ru mir torom ui, sur mir in ting ui lena, ‘Ui mo ra di wasiso mugu taru un ui lena, un nanpat, o met in kis langlang utmakai sur taio?’ ”

21 Una du bung ut ra, o Iesu i ulangolango pas a susut gusun anundet a kum ngunungut ma a kum misait, ma i lakro ru a kum laulau na nion gusun det, ma i utamtama pas a susut na pulu. 22 Ma i balu der lena, “Mur in milet melet, ma mur in inanos o Jon una asau ri mur sa tama i, ma mur sa longoro tari: A kum pulu det sa tamtama, det ra a kikindet i mat det sa wan tokodos, a kum lepra det sa langolango, a kum kutkut det sa longoro, a kum minat det sa laun, ma di warawai nama Wakak na Wasiso torom a kum sibo na taro. 23 Osi ra i tama a kum utna ri a pami ma anun a nurnur ke puku, i sa dan.”

24 Ra aru nat na ususer anun o Jon der wan, o Iesu i watungi torom a kunur na taro un o Jon lena, “U ra bung ra mot wan una nubual kalako taro uni torom o Jon, asau ra mot tamtama suri? Kutiro in nere ra i erere una wuwu? Awu. 25 Asau ra mot wan sur mot in tama i? A musano ra i emar nama kum wakak na malu? Awu. Tama i, det ra det ser emar nama kum wakak na malu, ma det dan nama kum wakak na utna, det ser kis una kum rumu na king. 26 Asau ra mot wan sur mot in tama i? A poropet? Ma! A watungi tamot, o Jon i labo sakit ut taun a kum poropet. 27 Di sa tumtumus taru uni, una Buk Tabu lena,

29 Ra a taro rop det longoro i, ma a kum tene los takis kai, det mulaot una tokodos na kisapi anun o God, uni det sa los pas a baptais anun o Jon. 30 Ikut a kum Parisi ma a kum tene ususer tagun a Warkurai det rosumur gusun a kisapi ra o God i pitari torom det, uni ka det los a baptais anun o Jon.

31 Ma o Iesu i watungi lena, “An elaro a taro tagun uniri nama sau? Det elar nama sau? 32 Det elar nama kum nat liklik ra det kis una balano tamon ma det kakabo torom det etetalai lena,

36 Ara Parisi i ben pas o Iesu sur det in nangon tomo. O Iesu i ruk una rumu anun a Parisi ra, ma i kis sur der in nangon. 37 Ma ara ino tagitiro una tamon ra, a tene sakino, ra i tasman pasi lena o Iesu kura i wangon una rumu anun a Parisi, i ruk nama polo sangsangnain ra kura un in nokoto ra di pami nama wat. 38 Ma i tur taru numur tan o Iesu, nisan aru kikino. I tangis, ra a lurlur na matano i puku una ru kikin o Iesu, ma i us der nama iwu na lorino, i gom der, ma i lingis a polo sangsangnain un der.

39 A Parisi ra i ben pas o Iesu i tama a utna ri, i nuki lena, “Ra a musano ri a poropet mulus, in tasman a ino ri ra i pam aru kikino, ma in tasmani kai a magirano, lena i a sakino ino.” 40 O Iesu i watungi tano lena, “Saimon, a nem na watung ara utna tam.” Ma i balu i lena, “Tene Ususer, un watungi kut.”

41 O Iesu i watungi tano lena, “Aru musano der dinau pas a mani gusun ara musano, ara pasander i dinau pas a limo na mar na mani ma ara kai a limo na noino mani. 42 Ka der balu lar pas a dinau, uni katu mani tander. Ra a musano ra, i watungi tander lena, ‘Gong mukut mur balu anumur a dinau.’ Osi na pasander anun a marmaris in labo sakit torom o naro ra i pitar tar a mani tander?” 43 O Saimon i balu i lena, “Kutiro i ra i dinau pas a labino mani sakit gusuni.” O Iesu i watungi tan o Saimon lena, “I tokodos anum a minabalu.”

44 O Iesu i iger unago numur torom a ino, ma i watungi tan o Saimon lena, “Tama a ino ri. Ra a ruk una num a rumu ko pitar tar a danim sur din gos aru kiking nami. Ikut, a ino ri, i gos aru kiking nama lurlur na matano, ma i us der nama iwu na lorino. 45 Ko ukinalong anum a gasgas nama egom torom iau, ikut a ino ri ke mana ugom aru kiking turpasi ut ra a wanpat nin. 46 Ko talus in loring nam lako wel, ikut a ino ri i lingis tar a polo sangsangnain una ru kiking. 47 A watungi tam lena anun a labino marmaris torom iau i ese i lena o God i sa unus ru anun a susut na sakino petutna. Ikut osi ra o God i unus ru i kut anun a nat na sakino petutna, anun a marmaris kai in natino.”

48 Ra o Iesu i watungi tan a ino ra lena, “Di sa unus ru anum a kum sakino petutna.” 49 A taro ra det kis tomo una inangon, det wasiso torom det etalai lena, “Osi na ngas na musano ri i pet lar pasi sur in unus ru a kum sakino petutna?” 50 O Iesu i watungi tan a ino ra lena, “Una num a nurnur ut, di sa ulaun pas ui. Un nan nama malmal.”