1 Una kilalo ra, o Sisa Augustus, a mugumugu tagun a gapman Rom, i ubek a warkurai sur din tumus a risan a taro rop una kum tamon ra o Rom i warkurai sur det. 2 Iri a mugano dino ra di tumus a risandi una kum kilalo ra o Kwirinius i mugumugu tong o Siria. 3 Ma a taro rop det wan sur anundet a kum tamon mulus sur din tumus a risandet.

4 O Josep kai i wan tagitiro una tamon Nasaret una papor Galili utong o Betliem una papor Judia. O Betliem, a tamon ra di usus o Dewid iai, ma o Josep i wan utong, uni i tagun a kabotaro anun o Dewid. 5 I wan sur din tumus a risano, tomo nama risan o Maria ra di sa ubek bat tari sur anunu. Ra der wan o Maria i sa tianan. 6 Ra der kis tong o Betliem, i sot a du bung sur o Maria in usus uni, 7 ra i usus pas a mugano nutunu, a nat musano. Ma i pulusi* A magiran a taro Juda det utalilis a natmiso nama kum du malu. Det utalilisi sur a ru lamano ma a ru kikino in tokodos ma gong a pinino i kotokoto. nama kum malu anun a nat, ma i inep tari una boks na inangon ana kum wewegua, uni a rumu na usiro i sa bukus pas gusun detul.

8 A ramano kum tene tamtamabat a kum sipsip det tamtamabat anundet a kum sipsip una mirum sa ubual milau una tamon ra. 9 Ma a ensel anun a Labino i wanpat torom det, ma a minamar anun a Labino i sisio talilis det, ra det ngara doko. 10 Ikut a ensel i watungi tandet lena, “Gong mot ngara. Mot tama i, a wanpat torom mot nama wakak na wasiso ra in ugasgas a taro rop. 11 Uniri, una tamon anun o Dewid, di sa usus pas anumot a Tene Ulaun, i a Karisito, a Labino. 12 Ma mot in tama a ukinalong lenri: A nat di pulus tari nama kum malu na nat, ma di inep tari una boks na inangon ana kum wewegua.”

13 Uniutra a labino kunur na ensel tagisapat una langit det wanpat torom a ensel ra, ma det watung ulabo pas o God lena,

15 Ra a kum ensel det sa wan gusun det usapat netes una langit, a kum tene tamtamabat a kum sipsip det watungi lena, “Uniutri dat in nan utong o Betliem, dat in tama a utna ri i sa wanpat, ra a Labino i sa inanos tar dat nami.”

16 Ra det wan lakit, ra det sio pas o Maria ma o Josep ma a natmiso ra di inep tari una boks na inangon ana kum wewegua. 17 Ra det sa tama tar a nat, det watung puaso a wasiso ra a ensel i sa inanos tar det nami una nat ra. 18 Det rop ra det longoro a wasiso anun a kum tene tamtamabat a kum sipsip, det kisin doko uni. 19 Ra o Maria i longoro a kum wasiso ri, i pam ukai i un in balano ma i nuknuk doko uni. 20 A kum tene tamtamabat a kum sipsip det milet melet, det ulabo pas o God ma det rakon lekeleke pasi una kum utna det longoro i ma det sa tama tari, elar ut nama wasiso anun a ensel.

21 Ra i tiwal na bung anun a nat, ma i sa sot sur din tok talilis a pinino, di pasor tar a risano nam o Iesu, elar nama wasiso a ensel i sa watung tari ra o Maria ke tianan utmakai.

22-24 Numur tana usus anun o Iesu, o Maria ma o Josep der kis ru a kum bungbung na utalapor. Ra i sa rop der wan usapat o Jerusalem, sur der in pitar a etabor, elar nama Warkurai anun o Moses. Der in etabor nama “arin natabun o arin barman na balus,” WP 12:8

25 Ara musano i kis sapat o Jerusalem a risano o Simion, a tene tokodos ma a tene urur kai torom o God. I ser kis langlang sur o God in ulaun a taro Israel, ma a Tokodos na Nion i kis uni. 26 A Tokodos na Nion i sa upuaso tari toromi lena ken mat lakit, tuk ut in tama tar a Karisito anun a Labino. 27 A Tokodos na Nion i mugu i sur in ruk un in noworo na rumu na etabor. Ra i tama pas o nader suano der wanpat nama nat, o Iesu, sur der in pitar tari torom a Labino, elar nami ra di sa tumus tari una kum Warkurai. 28 O Simion i los pas o Iesu nama ru lamano, ra i watung wakak torom o God lenri,

33 O Tamano ma o nano der kisin doko una kum wasiso ra o Simion i watungi un o Iesu. 34 O Simion i watung udan detul, ra i watungi tano Maria, o nan o Iesu, lena, “Tama i, a nat ri, o God i pilok pasi sur a susut na te Israel det in iru uni, ma a susut kai det in laun uni, ma sur a ukinalong ra, a susut na taro det in rosumur gusuni. 35 Ra det in rosumur gusuni, in upuaso a kum nuknuk tagun a balandet. Ma ui, a tupunuk ra un taramo i in elar nam in totok na inaim ra in so anum a nilaun.”

36-37 Ara ino bulung, a poropet, a risano o Ana, a nutun o Panuel, tagun a kabotaro Aser. I sa takano laulau, i sa tiwal na noino ma wat na kilalo anunu ma i ula mukut. Der nolin pas kut a wonom mawit na kilalo, ra numur anun a musano i mat. A ino ri ke wan taru gusun a rumu na etabor, i lotlotu una kum mirum ma a waspi, i ser wewel ma i ser wararing. 38 Una du bung utra, i wanpat torom detul, i watung wakak pas torom o God, ra i wasiso puaso una nat torom det rop ra det ser kis langlang sur God in ulangolango pas a taro Jerusalem.

39 O Josep ma o Maria der sa pam sot pas a kum utna rop elar nama Warkurai anun a Labino, ra numur detul milet melet utong o Galili, sur anundetul a tamon o Nasaret. 40 Ra a nat i labo pat nanan, ma i dekdek nanan, ma i bukus nama mananos, ma a marmaris anun o God i kis uni.

41 Una kum kilalo rop o taman o Iesu ma o nano der ser wan usapat o Jerusalem una labino bung na lotu na Wanlakai. 42 Ra i sa noino ma aru kilalo anun o Iesu, detul wan usapat o Jerusalem sur a labino bung na lotu na Wanlakai, elar ut nami ra det ser pami. 43 Ra a labino bung na lotu na Wanlakai i sa rop, det milet melet, ma o Iesu i kis sikot kut sapat o Jerusalem, ikut o tamano ma o nano ka der tasmani. 44 Der nuki lena det wan tomo nama taro. Ra det sa wan ara bung una nundet a milmilet, der turpasi sur der in sisio sur o Iesu nisan a kum kukun detul, ma a kum paspasan detul.

45 Ra der lagano sisio taru suri, der milet melet usapat o Jerusalem, ra der sisio mo suri sapat. 46 Ra der sa sisio pas a tulu bung, der tama torom pasi una rumu na etabor. I kis tomo nama kum tene ususer tagun a Warkurai, i longoro det, ma i tingting det kai. 47 Det rop ra det longoro i, det kisin una nun a mananos, ma anun a kum minabalu torom det. 48 Ra der tama pasi, der kisin, ma o nano i watungi tano lena, “Nutunglik, ilai ra u pami lenri un mir? Mir nam o tamam mir sa sisio doko pas sur ui, ma mir ngara doko sur ui.” 49 Ra i watungi tander lena, “Asau ra mur sisio sur iau suri? Ka mur tasmani lena i tokodos sur an kis una rumu anun o Tita?” 50 Ikut ka der talapor una nun a wasiso.

51 Numur detul milet melet utong o Nasaret, ra i ser tarom tander, ma o nano i nuk ukai a kum utna rop ri. 52 O Iesu i labo pat nanan una pinino ma una nun a mananos, ma o God ma a taro kai det gas doko nami.