1 Ra o Pestus i sa wanpat tiro o Sisaria una papor ra in warkurai iai, i kis pas kut a tulu bung, ra numur i wan usapat o Jerusalem. 2 A kum lamlabino tene etabor torom o God ma a kum mugumugu anun a taro Juda sapat o Jerusalem, det inanosi nama etakun un o Pol. 3 Ra det saring o Pestus sur in tarom torom det, ma det watungi lena, “Un maris met, ma un tulu ru o Pol urin o Jerusalem.” Uni det sa epak pas sur det in um doko i kut epotor una nun a inawan. 4 Ikut o Pestus i balu det lena, “O Pol kurong ut i kis tong o Sisaria, ma iau kai milau sur an milet melet utong. 5 I wakak sur lako kum mugumugu tagun mot, det in nan tomo nam iau utong, ma ra tu utna a musano ra in raro uni, det in takuni nami tong.”

6 Ra o Pestus i sa kis tomo pas nam det a tiwal na bung, o a noino bung, i milet melet utong o Sisaria. Una bung numur, i turpasi sur in pam a warkurai, ra i itula sur din ben o Pol toromi. 7 Ra o Pol i sa wanpat, a taro Juda tagisapat o Jerusalem det tur talilis pasi, ma det takuni nama susut na maut na etakun, ikut ka det watung tu utna sur in ulingmulus anundet a kum etakun uni. 8 Ra o Pol i wasiso batbat i ut lena, “Ka pam tu niraro una kum Warkurai anun a taro Juda, o una rumu na etabor, o torom a Sisa, a king anun a gapman Rom.”

9 O Pestus i nemi sur in ugasgas a taro Juda, ra i ting o Pol lena, “Pepetlai, un mulaot kut sur un nan usapat o Jerusalem, ma un tur una warkurai una kum etakun ri un ui sapat?” 10 Ra o Pol i balu i lena, “Uniri a tur una warkurai anun a Sisa, i tokodos ut sur din warkurai iau nin. Ka pam tu niraro torom a taro Juda, ui kai u sa tasman tari. 11 Ra a sa pam tar a sakino ra i tokodos sur an iru uni, i wakak kut sur an iru. Ikut ra a kum utna ri det takun iau nami ke lingmulus, ke tokodos sur din pitar tar iau tandet. A sasaring sur a Sisa ut in longoro a warkurai anung.” 12 Ra o Pestus i sa wasiso pas nam anuna kum tene mananos, i inanos o Pol lena, “Uniri u sasaring sur un nan torom a Sisa, ra an tulu ru ui utong o Rom torom a Sisa.”

13 Ra i sa rop a kabano bung, a King Agripa der nama bunu ano, o Benaisi, der wanpat tong o Sisaria, ra der wasiso na ugasgas pas o Pestus una nun a kinkinis na mugumugu. 14 Ra der kis a susut na bung tiro iai, o Pestus i inanos a king nama wasiso un o Pol lena, “O Peliks i sa mana gusun anun a pinapam, ikut i madek tar ara musano una karabus, ra kuri utmakai i una karabus. 15 Ra a kis sapat o Jerusalem, a kum lamlabino tene etabor torom o God ma a kum mugumugu anun a taro Juda det inanos iau nama kum etakun uni, ra det saring iau sur an warkurai i sur din um doko i. 16 A inanos det lena, ‘Ausur a ngasino anun a taro Rom, sur din pitar tar tu musano sur din warkurai i sur in mat, ra kabaut i tur tomo nam det ra det takuni, sur in wasiso bat i ut gusun a kum etakun.’

17 “Ra det wanpat tomo nin, ka balbalon nama warkurai. Ara bung kut numur, a kis una kiskis na warkurai, ra a itula sur din ben pas a musano ra. 18 A taro na etakun det tur sur det in wasiso, ikut ausur det takuni nam tu sakino utna, elar nama sau ra a nuki. 19 Det takuni kut una kum utna tagun anundet a ngas na lotu, ma una ara musano, a risano o Iesu ra i mat, ra o Pol i watungi lena i sa laun melet. 20 Ka talapor ma ka tasmani ra an iting pepetlai una kum utna ri. Ra a tingi sur in nan usapat o Jerusalem ma din warkurai i una kum etakun ra, sapat. 21 Ikut, o Pol i sasaring sur a Sisa in warkurai i, ra a itula sur in kis munung nin una karabus, tuk una bung ra an tulu ru i utong o Rom torom a Sisa.” 22 Ma o Agripa i watungi tan o Pestus lena, “Iau kai, a nem na longoro a musano ri.” Ra o Pestus i watungi lena, “Markan un longoro i.”

23 Una bung numur, o Agripa ma o Benaisi der wanpat. Di mar der nama ngas na ememar anun a kum lamlabino. Det ruk tomo nama kum mugumugu anun a taro na inaim, ma a kum mugumugu tagun a tamon ra. Numur o Pestus i itula sur o Pol, ma di ben pasi. 24 Ma o Pestus i watungi lena, “King Agripa, ma mot kai a taro ra dat kis tomo nin, mot tama a musano ri. A taro Juda rop tagisapat o Jerusalem ma nin kai det saring iau sur an warkurai i, ra det kukukuk lena ka det nemi sur in laun melet mo. 25 Ikut ka pastorom tu utna ra din um doko i uni. Ikut i sasaring sur a Sisa in warkurai i, ra a nuki lena an tulu i utong o Rom torom a Sisa. 26 Ka tasman mulus tu utna ra an tumus ukai i uni, torom a Sisa. Uniri a ben pati torom mot rop, ma torom ui, King Agripa, sur dat in ting tari sur an tasman asau ra an tumusi. 27 Uni a nuki lena ke tokodos sur an tulu tu karabus torom a Sisa, ma ka di tumus ukai asau ra di takuni nami.”