2
A inawan pat anun a Tokodos na Nion una bung na Pentikos
1 Una bung na Pentikos, a kum tene nurnur rop det kis tomo un ara rumu. 2 Ra a wungu tagisapat una langit i elar nama wunguina labino wuwu, i wanpat kisin torom det, ma i ubukus pas a rumu ra det kis uni. 3 Ra det tama a kum utna i elar nama kum kunkunabor ina sungun, det wan sarara ma det kis netes un det taktakai. 4 Det rop det bukus nama Tokodos na Nion, ma det turpas a wasiso nama kum wur ngas na wasiso ra a Tokodos na Nion i pitar tari torom det.
5 Una kum bung ra, a susut na te Juda kai det kis tiro o Jerusalem. Det a kum tene lotu, tagun a kum tamon rop una rakrakon bual. 6 Det longoro a wungu ri, ra det kalabor pat tomo, ma i toboroboro a nuknukindet, uni det ut taktakai det longoro anundet a kum wasiso, ra a kum tene nurnur det wasiso nami. 7 Det rop det kisin ma det nuknuk doko una utna ri, ra det watungi lena, “Tama i, det rop ri ra det wasiso, a taro Galili kut! 8 Asau a kibino ra dat rop taktakai dat longoro det, det wasiso nam anundat a kum wasiso ut? 9 Dat a kum te Patia, a kum te Midia, a kum te Elam, ma dat tagitong una kum papapor Mesopotemia, Judia, Kapadosia, Pontus, Asia, 10 Pirigia ma o Pampilia, ma tagitong o Ijip. Dat tagitong una papor Libia ra i milau o Sairini, ma tagitong o Rom. 11 Dat a taro Juda ma ara taro tagun dat ra det ruk una lotu Juda. Ma dat tagitong o Krit ma o Arabia. Dat rop dat longoro det ra det wasiso una kum lamlabino pinapam anun o God nam anundat a kum wasiso.” 12 Ra det rop det kisin, ma i toboroboro a nuknukindet, ra det ting etetalai det lena, “Asau a kukurai na utna ri?” 13 Ikut ara taro det urongon un det, ma det watungi lena, “Det inum a wain ra det sipak nami.”
A warawai anun o Pita
14 O Pita i tur tomo nama noino ma ra aposel, ma i wasiso nam in labino walngano torom a taro lena, “Mot a taro Juda, ma mot rop ra mot kis nin o Jerusalem, an palos a utna ri torom mot, ma mot in longoro wakaki. 15 Mot watungi lena det sipak. Ikut awu, uni i lisu na pakano bung utmakai una kobot. 16 A utna ri mot tama i, a poropet Joel i sa wasiso mugu taru uni lena,
17 ‘O God i watungi lena:
Una kum tintinip na bung* A kum tintinip na bung i turpasi una bung ra o Iesu i kis nin upiso ma in tuk una bung ra in milet melet.
an pitar pirso a Niong torom a taro rop.
A kum nutnutumot, a kum musano ma a wardain, det in wasiso na poropet.
Anumot a kum barman det in tama a kum tamtama,
ma anumot a kum takano na musano det in ririon a kum ririon.
18 Una kum bung ra, an pitar a Niong torom det kai anung a kum tultul na musano ma anung a kum tultul na wardain,
ma det in wasiso na poropet.
19 Ma an ese tar a kum utna na ukisin sapat una bakut,
ma a kum ukinalong nin upiso una rakrakon bual,
a kum utna ra, a gap, a sungun, ma a labino mis.
20 In matanas in dumirum,
ma a kalang in merek elar nama gap,
ra numur a bung anun a Labino in nanpat,
a labino bung ra, a bung na minamar.
21 Ra det rop ra det wararing torom a Labino, in ulaun det.’ Joel 2:28-32
22 “A taro Israel, mot in longoro iau. An inanos mot un o Iesu, a te Nasaret. Mot ut mot tasmani lena, una dekdekin o God i pam a kum utna na ukisin, ma a kum dekdek na pinapam ma a kum ukinalong. I pami epotor torom mot, sur o God in ese i torom mot lena, i ut i tulu ru i. 23 Di pitar tar o Iesu torom mot, elar nami ra o God i sa tasman mugu tari, una nuknukina. Ra mot tomo nama kum sakino taro, mot sak wati un in nanai kutus. 24 Ikut, o God i ukatutur melet pasi, ma i los ru a minat gusuni, uni a minat ke pam ukai lar pasi. 25 O Dewid i sa watung tari un o Iesu lena,
‘A tasmani lena a Labino i kis bolbolos tomo nam iau.
Kan neder,
uni kuri i una sot na lamang, i udekdek iau.
26 In balang i gas doko, ra a wasiso nama gasgas,
a nurnur lena un ulaun melet a pining.
27 Uni kon madek tar iau un in nutung na minat,
ma kon madek tar anum a Tene Tokodos sur in mereseng.
28 U sa ese tar iau una kum kisapi sur an los a nilaun.
An kis tomo nam ui, ma un ubukus iau nama gasgas.’ Sng 16:8-11
29 “A kum tistising, an wasiso talapor torom mot un o Dewid, a tubundat tagun numugu. I sa mat ma di sa por ru i, ma anun a kulam na minat kuri ut nisan dat tuk uniri. 30 Ikut o Dewid a poropet, ra i tasmani lena, o God i sa liliman dekdek taru toromi lena, i ut in ukis tar taio tagun a kabotaro anunu sur in kelesi una nun a kiskis na king. 31 O Dewid i sa tasman mugu tar a utna ra in nanpat, ma i watung a wasiso ri una nilaun melet anun o Karisito, lena ka din madek ru i un in nutung na minat ma a pinino ken mereseng. 32 O Iesu ut ra, o God i ukatutur pasi gusun a minat, ma met rop met tama i, ra met wasiso talapor uni. 33 Di ulabo pasi ma di ukis tari una sot na laman o God, ma o God o Tamano i pitar a Tokodos na Nion toromi, elar nam i ra i liliman tari nami. Ra uniri o Iesu i sa pitar pirso a utna ri, ra mot tama i, ma mot longoro i. 34 O Dewid ke wan usapat una langit, ikut i watungi lenri,
‘A Labino i watungi torom anung a Labino† “A Labino” i wasiso un o God, ma “anung a Labino” i wasiso un o Iesu. lena,
“Un kis una papor sot na lamang,
35 tuk ra an winim pas anum a kum ebar
sur det in kis utuntudu ina num a warkurai.” ’ Buk Song 110:1
36 “Mot a taro Israel rop mot in tasman wakaki: O Iesu ra mot sak wat tari un in nanai kutus, o God i sa ukis tari sur i a Labino ma a Karisito.”
37 Det longoro a wasiso ri, ra i so a balandet, ma det ting o Pita ma a kum aposel lena, “A kum tistisimet, asau met in pami?” 38 O Pita i balu det lena, “Mot rop taktakai mot in nukpukus, ma din baptaiso mot nama risan o Iesu Karisito, sur din unus ru anumot a kum sakino petutna, ra din tabor mot nama Tokodos na Nion. 39 Uni a etabor ri ra o God i sa liliman taru uni, in nan torom mot, ma torom a kum nutnutumot, ma det utkai ra det kis bakbak. In nan torom det rop, ra a Labino anundat a God in kabo pas det toromi.” 40 Ma i utumarong det nama susut na wasiso kai, ma i udekdek det lena, “Mot in tumarong, ma mot in nan gisen gusun a sakino petutna anun a taro tagun uniri, sur gong mot los a warkurai na minabalu.” 41 Det ra det mur a wasiso anun o Pita, di baptaiso det. Det elar nama tulu arip det, ra di luk tomo det nama kum tene nurnur. 42 Ma det pitar tar anundet a nilaun una etowo anun a kum aposel, una kinkinis tomo nama marmaris, ma una inangon tomo, ma una niaring.
A kinkinis tomo anun a kum tene nurnur
43 A kum aposel det pam a susut na utna na ukisin, ma a susut na ukinalong kai, ra a taro rop det urur un o God. 44 A kum tene nurnur rop det kis tomo, ma a kum utna rop ra anundet taktakai, anundet rop kut. 45 Ra det siuru anundet a kum du piso ma anundet a kum utna, ma a mani taguni, det isuaro i torom osi ra i sibo. 46 Det ser kis tomo una rumu na etabor una kum bungbung rop. Ra det ser wangon tomo una nundet a kum rumu nama gasgas ma a lingmulus ubalandet. 47 Ra det watung ulabo pas o God, ma a taro rop det gas nam det. Ma una kum bungbung rop, a Labino i ulaun a susut na taro, ra di luk tomo det nama kum tene nurnur.