1 Ra ara tagun mot, anunu tu maut torom tu pasano una nurnur, sur asau ra in losi torom det ra ka det nurnur, sur det in warkurai i, ma ausur torom a taro anun o God? 2 Pepetlai, ka mot tasmani lena a taro anun o God det in warkurai a rakrakon bual? Ma ra mot in warkurai a rakrakon bual, ilai ra ka mot pet lar pasi sur mot in ukodos a kum natnat na mamaut? 3 Pepetlai, ka mot tasmani lena numur dat in warkurai a kum ensel? Ra in lenra, ilai ra ka dat pet lar pasi sur dat in ukodos a kum utna tagun a nilaun uniri? 4 Ra anumot lako kum mamaut tagun a nilaun uniri, sur asau ra mot losi torom det ra a taro na lotu ka det ru pas det, sur det in warkurai i? 5 A watungi lenri torom mot sur mot in maimai uni. Pepetlai, kataio tagun mot i mananos sur in pam a warkurai una kum mamaut epotor tan a kum tene nurnur? 6 Ilai ra tu tene nurnur in ben melet tar ara tene nurnur torom det ra ka det nurnur, sur det in warkurai i?

7 A ngasino ri mot murmuri ra mot ubek mot melet ut una warkurai, i upuaso i lena mot sa puku. Ilai ra ka mot madek ru det ra det pam a sakino torom mot? Ilai ra ka mot madek ru det ra det wolong mot? 8 Ikut, mot a taro na nurnur, mot ut mot pam a sakino torom mot, ma mot wolong etetalai mot.

9 Pepetlai, ka mot tasmani lena det ra det pam a sakino ka det in rakon a matanitu anun o God? Gong mot toro mot ut. Uni det ra det pam a kum pamuk na petutna, ma det ra det lotu torom a kum torotoro na god, ma det ra ka det ru a kinkinis na nolin, ma det ra a kum pamuk na musano ra det siuru a pinpinindet, ma a kum musano ra det nolin melet nam a kum musano, 10 ma a kum tene wolong, ma a kum muk, ma a kum tene ininum, ma det ra det emang, ma det ra det ras pas a ututna ra ausur anundet, det rop ra, ka det in rakon a matanitu anun o God.

11 Ara taro tagun mot, numugu mot ser pam a kum ngasino ri. Ikut, una risan a Labino o Iesu Karisito, ma una Niono God anundat, o God i sa gos talapor pas mot gusun anumot a kum sakino petutna, sur mot anun a taro, ma i sa utokodos tar mot sur in watung mot lena mot sa tokodos.

12 Sako taio in watungi lenri, “A kum utna rop i wakak kut sur an pami.” Ikut ausur a kum utna rop in waruti. A kum utna rop i wakak kut sur an pami, ikut kan madek pas tu utna sur in mugu iau. 13 Sako taio in watungi kai lenri, “A utna na inangon sur a balandat, ma a balandat sur a utna na inangon.” Ikut o God in kamar rop ru der. A pinindat ausur sur din pam a kum pamuk na petutna, awu, sur a Labino ut, ma a Labino sur a pinindat. 14 Una dekdekin o God ut, i ukatutur melet pas a Labino gusun a minat, ma dat kai in ukatutur melet pas dat. 15 Pepetlai, ka mot tasmani lena a kum du pinimot det a kum du pinin o Karisito ut? Pepetlai, an upitapo pas lako kum du pinin o Karisito tomo nama pamuk na ino sur der in takai mukut? Awu, ken elar mulus! 16 Pepetlai, ka mot tasmani lena osi ra i upitapo i nama pamuk na ino, der ara pininder mukut nama pamuk na ino? Uni a Buk Tabu i watungi lenri, “Aru der in takai mukut.” Stat 2:24

18 Mot in nan gisen gusun a kum pamuk na petutna. A kum sakino petutna gisen ra taio i pami, ka det kis una pinino. Ikut, ra taio in pam a kum pamuk na petutna, i pam a sakino una pinino ut. 19 Pepetlai, ka mot tasmani lena a pinimot i a rumu anun a Tokodos na Nion? A Tokodos na Nion ra i kis un mot, o God i sa tabor tar mot nami. Mot ut ausur anumot, 20 uni o God i sa kul pas mot nama labino kunukul doko. I mo ra mot in ulabo pas o God nama pinimot.