1 Epame Godtapo ma Moses watle epo atlaiyo, “Na꞉tapo mosukulu wotiyalle hatlopeye Pelo mate epo ya꞉ opa Isip so mate dla hamilowepo. Epalati yia꞉tapo wotiyalle iye natimama asiyama Pelota wua꞉ye Isip mo tle alikili a꞉ma taiya demama mosukulu dodolomsallepe. 2 Epedeme wa꞉ Isalael so dla atlamane, yia꞉tapo gold ewala mate epo silba ewala mateta mimita꞉pele alisisiye yimkadulo Isip so dla dlalepame halomelepo depame,” diyo. 3 Adipalati, Godtapo Isip so dla dupa malamale ka꞉dle hamiyo, ma yia꞉tapo Isalael so mate ka꞉pi namkale demha꞉ha꞉lepo depame. Epammama Pelo ya꞉ oko so mate epo Isip so hapuloma matetapo ma Mosesye pato oplami demdiyo.

4 Epalati Mosestapo Pelo watle epo atlaiyo, “Godtapo ipo atla, wata utula꞉la dukuslopi dla ya꞉tapo Isip mo pato duka tle tlowepo de. 5 Epapele oloma edla itapu hohomale akimlala hapulomata pallipe. Epele dulu dla wa꞉ maseyemala itapu hamale tatle polope, epame Isip so yia꞉ akimlala itapu hohomale so hapuloma mape medla palimtelepe. Epame wua꞉ aliya halo dulu dla mape itapu usulli patetalo hapuloma ma pallipe de. 6 Epapele dulu dla sikemte a꞉lle yu patotapo Isip mo pato dla ellepe. Epapedeme a꞉lle yu epapeleye ka꞉yapa podalemdena, epame a꞉lle yu ipapele mape alotle ma podallowa. 7 Amasiyama Isalael so dulu dla itapu hohomale so akimlala hapulomatapo popalilalo, me-ha꞉ha꞉lepe de. Koko hapulomatapo Isalael so dulu dla woloma me-homta ellepe. Epame yia꞉ aliya halo dulu dla haleta popolowa. Wa꞉ta koko i natimama malamelepe, Godtapo Isalael so gadlalo halaye. 8 Epame ma wa꞉ oko sotapo na꞉ hete sitali dla puame heodepo otele yu mate epo atlamyelepe, ‘Wa꞉ mo itle wa꞉ opa mate epo wa꞉ alisisi mate alikili a꞉ma mo-woyapo tane,’ demyelepe. Epalati na꞉tapo na꞉ alisisi hapuloma halopo na꞉ opa eleme alikili a꞉ma woyamolowepo,” diyo. Mosestapo yu iye atlemhalepo gudepame siyaladle mate Pelo aya tle alikili a꞉ma woyapo taiyo.

9 Ka꞉yapa Godtapo Moses watle epo atlaiyo, “Pelotapo wa꞉ yu dla dalepame poheodemhallowa. Epalati na꞉tapo ulugiyemale koko patotoye Isip mo dla halomhallowepo,” diyo. 10 Epapele koko tle Moses mate epo A꞉lon matetapo ulugiyemale koko patotoye Pelo mila꞉pi tle halomha꞉ha꞉iyo. Amasiyama Godtapo Pelo dupa malamaleye ala me-kokalepo meledemhalemdiyo, Isalael sota Isip mo tle alikili dla wowoyamalala depame.