1 Ama'na avona Jisas Kraisi agigo azankomofo naneke, Agra Deviti nemofo'e, Deviti'a Abrahamu nemofo'e. 2 Abrahamu'a, Aisaki nefa'e, Aisaki'a Jekopu nefa'e, Jekopu'a, Judane afu'agnahe'ina ksezmante'ne. 3 Juda'a, Perezine, Zerakizni neznafa'e, neznarera'a Tamari kse znante'ne, Perezi'a, Hezroni nefa'e, higeno Hezroni'a, Rami nefa'e. 4 Rami'a, Aminadabu nefa'e, Aminadabu'a, Nasoni nefa'e, higeno Nasoni'a, Salmoni nefa'e. 5 Salmoni'a Boazi ksente'ne. Hagi Boazi nerera agi'a Rehapu'e. Boazi'a Oveti ksente'ne. Hagi Oveti nerera agi'a Ruti'e. Oveti'a Jesi ksentegeno, 6 Jesi'a, kini ne'mofo Deviti nefa'e.

Deviti'a Solomon nefa'e, Betsiba, Uria a'ma eri'nemo ksente'ne. 7 Solomoni'a Rehoboam nefa'e, Rehoboamu'a Abaija nefa'e, hagi Abaija'a Asa nefa'e. 8 Asa'a Jehosafati nefa'e, Jehosafati'a Joramu nefa'e, hagi Joramu'a, Uzia nefa'e. 9 Uzia'a Jotamu nefa'e, Jotamu'a Ahazi nefa'e, Ahazi'a Hezekaia nefa'e. 10 Hezekaia'a Manase nefa'e, Manase'a Amoni nefa'e, hagi Amoni'a Josaia nefa'e. 11 Josaia'a Jekonaia nefakino, afu'agnahe'ine kse zamante'ne. Anama hu'neana kinafima zamavre'za Babiloni vuku haza knafine.

12 Babilon kumate kina ome hutageno Jekonaia'a, Seatiel nefa'za hu'ne, Seatieli'a, Zerubabel nefa'e. 13 Zerubabeli'a, Abihut nefa'e, Abihuti'a, Eliakim nefa'e, hagi Eliakimi'a, Azori nefa'e. 14 Azori'a, Zedok nefa'e, Zedoku'a, Akimi nefa'e, hagi Akimi'a, Eliuti nefa'e. 15 Eliuti'a, Eliaza nefa'e, Eliaza'a, Meteni nefa'e, hagi Meteni'a, Jekopu nefa'e. 16 Jekopu'a, Josefe nefa'za higeno, Josefe'a Mariana neve'e. Hagino Jisasima ksentege'za, agi'a Kraisi'e hu'za antemi'naze.

17 Abrahamunteti vuno Devitinte'ma vahe'ma forehu anante anante hu'nazana 14tini'a naga nofi fore hu'naze. Hagi Devitinteti'ma eno Babiloni kina huzmante'nare'ma e'neana 14tini'a naga nofi fore hunante anante hu'naze. Hagi kinama huzmante'nareti vuno Kraisi knare'ma e'neana 14ni'a naga nofi forehu'nante anante hu'naze.

18 Jisasi Kraisi'ma fore hu'neana amanahu hu'ne, Agri nerera Mariama, Josefente huhampri ante'nageno, nomago hu'ne omni'nakeno, Ruotge Avamu'mo rimpafi emanigeno, amu'ene hu'nege'za kefore hu'naze. 19 Ana hazageno, agri neve Josefe'a fatgo ne' mani'negu, Mariana azeri agaze hu'zanku, oku'a a' atrenaku agu'agesa antahi'ne. 20 Hianagi ana antahintahima retro nehigeno'a, mago Ramofo ankeromo ava'nafi eno anage huno asmi'ne, Josefe, Devit nemofoge, korera osunka Mariana aka'agi avro, na'ankure agri rimpafima mani'neana, Ruotge Avamu'mofo mofavre mani'ne. 21 Ne'mofavre ksentegahianki, ana mofavremofo agi'a, Jisasi'e hunka agi'a antemio, na'ankure Agra vahe 'amokizmi kumi'zmifinti zamaza hugahie. 22 Ama ana maka'zama efore hu'neana, korapa Ra Anumzamo kasnampa ne'te ke hunte'nea zamo nena'a efore hu'ne.

23  Keho vene omni'nea a'mo mofavre amu'ene huno, Ne'mofavre ksentegahie, ana hanige'za zamagra Agri Agi'a Imanueli'e hugahaze, ana agima eri rukrahe haniana, Anumzamo tagrane mani'ne hu'ne. (Aisa 7:14) 24 Mse'nefinti Josefe otino Ramofo ankeromo asmino hunte'nea kante anteno, Mariana a' avare'ne. 25 Hianagi anteno omseno amne kegva hu'negeno, Ne'mofavre ksentegeno, Josefe'a, Jisasi'e huno agi'a ante'ne.