2 Agra anage hu'ne,

Nagra tusi'a hazenkefi mani'ne'na Ramofo agi hanta vazugeno, Agra kenona hunami'ne.

Fri vahe'mofo kumapi mani'nena fri'za nehuna naza huogu kezatugenka, kagra zavi ke'ni'a antahi'nane. 3 Kagra nasga hunka ame fenkame hage rimofo agu'afinka nagrira natre'nane.

Anampi timofo hnavemo nazeri kagigagi hu'ne.

Kagrama hanave'ane zaho hunatankeno kranto kranto huno e'nea timo, nagrira nazeri nakrino refite'ne. 4 Ana hige'na, Kagripintira ko nagrira nahe anatitrenane hu'na nagra antahi'noe.

Kagri ruotge ra mono nonka'a (tempol) mago'ene onkegahue, hu'na ngesa antahi'noe. 5 Kagigagi huno avune ante'nea timo, nanankempi mrerige'na ti nakrika ate'noe,

Ame fenkame tami'nea timo nazeri kagigeno,

Hgerimpi inozamo nanuna eri anovazi'ne. 6 Agonamofo agafafi nagra urami'noe,

Ana mopamofo agu'afinka rentrako hunantesige'na kina hu'na manivava hugahue hu'na nagesa antahi'noe.

Hu'neanagi, Kagra Ra Anumzamoka, ana kerifintira tumoni'a naza hunka navare atre'nane. 7 Navu evuevu hige'na frinaku nehu'na,

nagra Ramoka nagesa antahi kmugeno, nunamuni'amo ruotge ra mono nonka'afine, Kagrite'ene e'ne.

8 Knare osuno havi anumzante mono hunentaza vahe'mo'za, Anumzamofo asunku'zana zamagra erigaragi, zamagena hunemize.

9 Hianagi, Ranimoka kezati'na kagia erisga nehu'na, nagra zgamepinti Kagritega ofa hugantegahue Ranimoka.

Nagrama huvempama Ranimokane hua kea, amage hugahue, na'ankure nazahu hanavea Ramoka Kagrakere.