1 Poli'na, Krais Jisasi aposol eri'za ne'mo'na Anumzamo Agra'a avesite huhampri nantenege'na, Efesasi kumate zmentinti nehaza naga'ma (Saints) mani'ne'za, Krais Jisasinte tamage zamentinti nehu'za amage' nentaza vahetega ama avona kre netroe. 2 Anumza Nerafantegati ene Ranti Jisasi Kraisintegati asunku'zane, rimpa fruzane tamagritega vie.

3 Anumzamofo ra agi amisune, Ranti Jisas Kraisi Nefa'ma mona kumapinti Kraisimpi, avamupina maka asomura hurante'ne. 4 Korapara Agra mopa erifore osu'nea knafi agu'areti avesiranteno, Kraisi'ene otage huta fatgo zampi, havizana omanesigeta Agri avure manisnune huno tagrira huhamprirante'ne. 5 Korapa Agra huhampri tanteno mofavreni'aza hugahaze huno Jisas Kraisinteti, tavreno Agrarega tante'ne, Agra'a so'e zanteti antahi ramino ana hu'ne, 6 Anumzamo, avesinentemofo Jisas Kraisimpi taza hu'zana eri tagitregeno erami'neazankura, ra agi amisune, 7 Kraisi koranu tahokeheno miza seneranteno, maka kumitia eri fnane nehuno, tusi'a asunku zama'areti Agra asuragiranteno taza hu'ne, 8 Agra rama'a zampi tagrira tza hu'ne. Mika fatgo antahintahine, knare tagu tagesa tami'ne. 9 Korapa Agri'a agu'afi oku'a me'nea antahi'za eriama huno taveri hu'ne. Kraisi'a zamaza hugahie huno agu'afi atre'nea tzahu'za, Agra'a eriama hu'ne. 10 Anumzamo ofenka'ati mago knama esia zupa, monane mopane eri mago huno, maka Kraisi kvafi antenaku antahi'neane,

11 korapa agafare Anumzamo Agra'a avesite ko antahino keno huteno, maka'zana Kraisinteti erisanti hare'snaze huno tvarenaku huhampri rante'ne. 12 Tagra ana nehuta, Jiu vahemota Kraisinte tamentintima pusante nehumota tagra, Anumzamofona ra agi amigahune. 13 Tamagranena tamage kema Kraisimpinti ko antahitetma, manivava tamasimu eri'zanku Knare MusenKe'are tamentinti nehazageno, Agra Ruotge Avamu'anu azanko avona kreno huhampri (seal) tamanteno tamamine. 14 Avamu'ama tami'neana agu'areti huhampri tanteno neramino, tahokeheno Anumzamo Agrarega tavrente'negu, muse hunenteta ra agi amisune.

15 E'ina hu'nea agafare nagranena, Ranti Jisasinte tamagra tamentintima nehza ke'ne, maka Anumzamofo naga otge hu'za nemni'za naga'ma tamavesima nezmantaza zanku nentahi'na, 16 maka zupa nunamuni'afina nagerakani noramante'na, tamagrikura Anumzamofona susu hunentoe. 17 Ana nehugeno Ranti Jisas Kraisi Anumzamo, so'e hihamu'ane msamofo Nfa'amo, knare antahi'zane, tamagu tamagesane, tamage ke'a huama hu antahi'zamofo avamura tamisnigeta Agrira antahita keta nehuta, avamupina ra hugahaze. 18 Nagra nunamu nehuankino antahintahitamofona msa tamina, tamagu'amofo avurgamo hari nehanigetma, Agrama kezatino fore hugahie huno tamagima nehiazana, tamagra kegahaze. Mizama'a mreri'nea zantmi, hihamu'ane msazama'afi Anumzamo'a tamina, Agrite mni ruotge nehaza vahe'mo'zane, tamagra erigahaze. 19 Hanki tagrama tamentinti nehuna vahe'ma agatererfa razama, Agra hanave'a tami'neana, ama ana hihamu'agino, 20 tusi'a hihamu'afi Kraisina fri'nefintira, Agra azeri oti'teno monare azantamaga kaziga avare antegeno mani'ne. 21 Mreri onagate'nea tra'ma kvahu hanavema, hampo'na'ma, makazante kvama hu'neane, mika zamofo agima ko'ma antemi'neane, menima ama mani'nona knafinkerompage, henkama esia knafi'nena agtereno onaga'a manigahie. 22 Maka'zana Kraisi azampi kva hanie huno ante'ne, Agri kvafi maka'zana mono kevumotagu (sios) huno ante'ne, 23 Agri avufamo'a mono nonkna hu'ne, Kraisi mani viteno nemnino maka zampina anazanke huno mani vite'ne.