1 Iliga꞉felo꞉ kalu o꞉lia꞉ tilidabu kalu Yudia henamilo꞉ sen nol o꞉lia꞉yo꞉, Yu kaluma nolo꞉ Godeya꞉ to tilidabuka꞉ a꞉la꞉sa꞉labi dabu. 2-3 A꞉la꞉fo꞉ko꞉lo꞉ Bida e Ya꞉lusalem ha꞉na꞉ga꞉ fa꞉la꞉dowabikiyo꞉, tilidabu kalu do꞉go꞉fo꞉ hege gedeo꞉ kalu iliyo꞉ Bidamo꞉wo꞉ gadi sa꞉laki a꞉la꞉sio꞉, “Ge do꞉go꞉fo꞉ mo꞉gedeo꞉ kaluwa꞉ aya siliki, ma꞉no꞉ gegele na꞉len.” 4-5 A꞉la꞉sa꞉labiki, Bida eyo꞉ dimido꞉ fa꞉la꞉dowo꞉ o꞉leaumbo꞉ kalu imo꞉wo꞉ tambo fanda sa꞉laki a꞉la꞉sio꞉, “Ne Yoba amisa꞉na siliki, dulugu sa꞉la꞉len amio꞉, ne ho꞉le ba꞉dakiyo꞉, Hebene kolaita꞉sa꞉ga꞉, kelego꞉ nowo꞉ helebeso꞉g alano꞉ o꞉ngo꞉ ko꞉lo꞉ migif fa꞉la꞉da꞉in ami ta꞉lidota꞉ga꞉, ololo to꞉lola꞉i tindabi ba꞉ba꞉. 6 Helebeso꞉g us amio꞉ no꞉ ko꞉li ko꞉lilo꞉ a꞉la꞉ta꞉ga꞉ sowa꞉yo꞉ a꞉la꞉ta꞉ga꞉ o꞉ba꞉ ko꞉li ko꞉lilo꞉, Godeya꞉lo꞉ na꞉so꞉boka꞉ a꞉la꞉likilo꞉ saefa꞉ a꞉no꞉lo꞉ a꞉na delena ba꞉ba꞉. 7 A꞉no꞉ ba꞉da꞉sa꞉ga꞉yo꞉, to nowo꞉ a꞉la꞉sio꞉, ‘Bida, ge dasima! No꞉ we yasala꞉sa꞉ga꞉ maiya!’ 8 A꞉la꞉sa꞉labiki, niyo꞉ a꞉ma꞉la꞉bo꞉ a꞉la꞉sio꞉, ‘Alan, ne a꞉la꞉bo꞉ mada mo꞉dimidama꞉no꞉! Yu kaluwa꞉ ele difa꞉ usamilo꞉ “Na꞉so꞉boka꞉” a꞉la꞉do꞉ saefo꞉ a꞉no꞉ ne mada mo꞉nan.’ 9 A꞉la꞉sa꞉labikiyo꞉, towo꞉ nemo꞉wo꞉ wa꞉ka a꞉sio꞉, ‘Godeya꞉lo꞉ gemo꞉lo꞉, “we nafa ko꞉lo꞉ o꞉li na꞉bika꞉” a꞉la꞉do꞉ sio꞉ a꞉no꞉, giyo꞉ ma꞉no꞉ a꞉no꞉ Gode siwa꞉l amio꞉ mogago꞉ a꞉la꞉likiyo꞉ sa꞉la꞉so꞉bo’ a꞉la꞉sio꞉. 10 A꞉la꞉dimida꞉leno꞉ otalen fa꞉la꞉dota꞉ga꞉ wigibo a꞉naka kelego꞉ a꞉no꞉ a꞉ma꞉la꞉ Hebene ane. 11 Wigibo a꞉naka, kalu otalen, Konilius elo꞉ Sesalia a꞉la꞉ta꞉ga꞉lo꞉ iliga꞉fo꞉ a꞉no꞉ a nilo꞉ sen a꞉na fa꞉la꞉dowo꞉. 12 A꞉la꞉ta꞉ga꞉ Godeya꞉ Mamaya꞉yo꞉ nemo꞉ a꞉la꞉sio꞉, ‘Ge i o꞉lia꞉ ha꞉nakiyo꞉, kele asula꞉likiyo꞉ ha꞉na꞉so꞉bo’ a꞉la꞉sio꞉. A꞉la꞉ta꞉ga꞉ kalu do꞉go꞉fela꞉fo꞉ we ne o꞉lia꞉ ha꞉na꞉sa꞉ga꞉, Koniliusa꞉ a usa ane. 13 Konilius elo꞉ amilo꞉ fa꞉la꞉dowo꞉ a꞉no꞉ nemo꞉ malolo꞉ me. Ma꞉mula꞉ kaluwa꞉ Koniliusa꞉ aya fa꞉la꞉dota꞉ga꞉ ilikiyo꞉, emo꞉wo꞉ a꞉la꞉sio꞉, ‘Saimon Bida a꞉no꞉ wena mena꞉ki, o꞉go꞉ ge kalu nolo꞉ Yoba amisa꞉na iliga꞉foma. 14 Eyo꞉ to nafayo꞉ gimo꞉wo꞉ sa꞉ma꞉ mia꞉b ko꞉lo꞉ gi o꞉lia꞉ gi ayamilo꞉ so꞉lo꞉ sab a꞉no꞉lo꞉ a꞉ma꞉la꞉ gasiliakilo꞉ mesa꞉no꞉ a꞉no꞉ walama꞉ib.’ 15 Ma꞉mula꞉ kaluwa꞉yo꞉ to a꞉no꞉ sio꞉ ko꞉lo꞉ ne a꞉na ha꞉na꞉sa꞉ga꞉yo꞉, niyo꞉ towo꞉ halaido꞉ mo꞉mo꞉da wida꞉sen amio꞉, Godeya꞉ Mamayo꞉ tamina nilo꞉ amilo꞉ mio꞉ aumbo꞉, ilo꞉ amio꞉lo꞉ a꞉la꞉ mio꞉. 16 A꞉la꞉gabikiyo꞉, niyo꞉ Ya꞉suwa꞉lo꞉ nimo꞉lo꞉ tamina sio꞉ a꞉no꞉ a꞉asulakiyo꞉, eyo꞉ a꞉na sa꞉lakiyo꞉ a꞉la꞉sio꞉, ‘Yona꞉yo꞉ ho꞉n deya to꞉lola꞉len ko꞉sega o꞉go꞉ giliyo꞉ Godeya꞉ Ene Mamaleya꞉ to꞉loma꞉ib.’ 17 Tamin amio꞉ nio꞉ Ya꞉su Kelisowa tilidadabikilo꞉ Godeya꞉lo꞉ boba nimo꞉lo꞉ dimi a꞉no꞉ o꞉go꞉ imo꞉wo꞉lo꞉ dimi ko꞉lo꞉ Godeya꞉lo꞉ dimidab a꞉no꞉ niyo꞉ waga ka꞉ma꞉no꞉wo꞉?” Bida a꞉la꞉sio꞉. 18 Yu amilo꞉ tilidabu kaluka꞉isaleyo꞉ to a꞉no꞉ da꞉dakiyo꞉, iyo꞉ wa꞉kabiyo꞉ mo꞉kele asulaka, Godeya꞉ wiyo꞉ ko꞉lo꞉ dulugu sa꞉lakiyo꞉ a꞉la꞉sio꞉, “O꞉go꞉ Yu kaluka꞉isalema i a꞉no꞉lo꞉ asugo꞉ nodola꞉sa꞉ga꞉, mela꞉no꞉wo꞉ dima꞉ki, Godeya꞉yo꞉ fogo꞉ hendele dimelo꞉b” a꞉la꞉sio꞉.

19 Sitifendo꞉ sa꞉ndab ho꞉len a꞉namio꞉, hida꞉yo꞉ alan fa꞉la꞉dowo꞉ a꞉ma꞉ ilikiyo꞉, tilidabu kaluka꞉isaleyo꞉ dalalelia꞉ga꞉, nolo꞉ Fonisia hen a꞉na, nolo꞉ Saibulus hen a꞉na, a꞉la꞉ta꞉ga꞉ nolo꞉ Antio꞉g amisa꞉n a꞉na ane. Iyo꞉ ha꞉na꞉siakiyo꞉, Godeya꞉ to nafayo꞉ Yu kaluka꞉isalemo꞉ ka wida꞉i ane. 20 Ko꞉sega Saibulus o꞉lia꞉ Salini amilo꞉ tilidabu kalu nolo꞉ Antio꞉g amisa꞉na ha꞉na꞉siakiyo꞉, Ya꞉su Alana꞉ to nafa a꞉no꞉, Yu kaluka꞉isalema imo꞉wo꞉lo꞉ wido꞉. 21 A꞉la꞉fo꞉ko꞉lo꞉ Alana꞉ halaido꞉wo꞉ i amio꞉ asulo꞉wa dofo꞉liki wido꞉ ko꞉lo꞉ kaluka꞉isaleyo꞉ modo꞉ ko꞉lo꞉ tilida꞉da꞉sa꞉ga꞉, Ya꞉su Alan e kudu ane.

22 Amisa꞉n a꞉namilo꞉ fa꞉la꞉dowo꞉ a꞉no꞉ Ya꞉lusalem tilidabu kaluka꞉isaleyo꞉ dabu ko꞉lo꞉ iliyo꞉ Banabaso꞉ Antio꞉g a꞉na iliga꞉fo꞉. 23 E a꞉na fa꞉la꞉dowaki ba꞉ba꞉yo꞉, Godeya꞉yo꞉ kaluka꞉isaleyo꞉ asufa꞉lo꞉biki ba꞉da꞉ga꞉, e sagalakiyo꞉, iyo꞉ Alan o꞉lia꞉ tambo ege dowaki, asugo꞉ himuwa oga꞉dita꞉ga꞉ doma꞉ki, e halale alifa꞉.

24 Banabas e kalu nafa, a꞉la꞉ta꞉ga꞉ tilidabu elo꞉wo꞉ halaido꞉ a꞉la꞉ta꞉ga꞉ Godeya꞉ Mamayo꞉ eyamio꞉ wa꞉lifo꞉liki wido꞉ ko꞉lo꞉ kaluka꞉isale modo꞉wo꞉ asugo꞉ nodola꞉sa꞉ga꞉, Ya꞉su Alan e ko꞉lo꞉ kudu ane. 25-26 A꞉la꞉ta꞉ga꞉ Banabas e So꞉l kelema꞉ni ane. E Tasus amisa꞉n a꞉na ha꞉na꞉sa꞉ga꞉, Solo꞉ galili ko꞉lo꞉ Antio꞉g amisa꞉na a꞉ma꞉la꞉ tililia꞉ mio꞉. A꞉la꞉yo꞉ dona imiligo꞉ tilidabu kaluka꞉isale o꞉lia꞉ siliki, kaluka꞉isale modo꞉mo꞉ wida꞉len. A꞉la꞉fo꞉ko꞉lo꞉ kaluka꞉isale a꞉namilo꞉ sen a꞉ma꞉yo꞉ Ya꞉sulo꞉ kudu ha꞉nab kaluka꞉isale a꞉no꞉ “Keliso kaluka꞉isaleka꞉” a꞉la꞉liki Antio꞉g a꞉na mo꞉mo꞉da wikilo꞉.

27 Ho꞉len a꞉ma꞉ imilib amio꞉, Godeya꞉ dinali sa꞉lan kalu nolo꞉ Ya꞉lusalem a꞉na a꞉la꞉ta꞉ga꞉ Antio꞉g a꞉na ane. 28 Kalu i a꞉no꞉, nowo꞉ wiyo꞉ Agabus ko꞉lo꞉ e Godeya꞉ Mamaya꞉ halaido꞉wo꞉ eya iliki, ho꞉le ba꞉dabikiyo꞉, e kalu kegeo꞉ siwa꞉la kagayaki a꞉la꞉sio꞉, “Henfelo꞉ wenamio꞉ maiyo꞉wo꞉ alan fa꞉la꞉doma꞉ib” a꞉la꞉sio꞉. (Kolodius e Lom hen bo꞉fo꞉lab ho꞉len a꞉namio꞉, dinali sio꞉ a꞉no꞉ hendele fa꞉la꞉dowakiyo꞉, maiyo꞉wo꞉ alan dowo꞉.) 29 A꞉la꞉fo꞉ko꞉lo꞉ tilidabu kaluka꞉isale iliyo꞉ towo꞉ saitakiyo꞉, moleyo꞉ enedo꞉ asulab aumb kegea꞉sa꞉ga꞉yo꞉, Yudia hen amilo꞉ ao i sab nolo꞉ asuwa꞉fa꞉niki kegeo꞉. 30 Kegea꞉la꞉ga꞉, Banabas dia꞉ So꞉l dia꞉mo꞉ dimia꞉sa꞉ga꞉, Ya꞉lusalem misa꞉ kalulo꞉wa dia꞉hamana꞉ki, iliga꞉fo꞉.