A꞉ibol (Abel, Abel) A꞉ibol e Adama꞉ ene so꞉wa, a꞉la꞉ta꞉ga꞉ ene aowo꞉ Ka꞉in. Ka꞉in eyo꞉ ene ao A꞉ibolo꞉ sana sowo꞉. (Mo꞉mo꞉ 4.1-8; Madi 23.35; Luk 11.51; Hibu 11.4, 12.24)

Ablaham (Ablaham, Abraham) Ablaham eya a꞉la꞉ta꞉ga꞉lo꞉ Isolael so꞉lo꞉ mio꞉ a꞉ma꞉ ema꞉muwo꞉ e. A꞉la꞉ta꞉ga꞉ tilidabuwa꞉ iyayo꞉ e. Gode eyo꞉ emo꞉wo꞉ a꞉la꞉sio꞉, “Go꞉no꞉ heno꞉ ta꞉ta꞉sa꞉ga꞉, hen ho꞉gi a꞉na hamana,” a꞉la꞉sio꞉. A꞉la꞉fo꞉ko꞉lo꞉ e hen a꞉na ane. A꞉la꞉ta꞉ga꞉ Gode eyo꞉ Ablahama꞉ ema꞉mui a꞉no꞉, Godeya꞉no꞉ kaluka꞉isaleyo꞉ waga fa꞉la꞉doma꞉iba a꞉la꞉liki, Ablaham o꞉lia꞉ nenelaki tola꞉len. Iyo꞉ Godeya tilida꞉dalega, eyo꞉ iyo꞉ o꞉li tilidoma꞉ib. (Mo꞉mo꞉ 15; Lom 4; Hibu 6.13-15; Song 105)

Adam (Adam, Adam) Tamindeya Gode eyo꞉ heno꞉ dia꞉sa꞉ga꞉ Adamo꞉ a꞉na dimido꞉. Wi Adam a꞉ma꞉ ha꞉go꞉ we, “E ko꞉le tamina fa꞉la꞉dowo꞉.” Adam o꞉lia꞉ ene inga If a꞉la꞉ma꞉yo꞉ Godeya꞉ towo꞉ go꞉la ba꞉ba꞉ ko꞉lo꞉, a꞉la꞉ma꞉yo꞉ man mogago꞉wo꞉ dimido꞉. A꞉la꞉fo꞉ko꞉lo꞉ man mogago꞉wo꞉ henfelo꞉ kaluka꞉isale nilo꞉ amilo꞉ a꞉lab we a꞉na mo꞉mo꞉da fa꞉la꞉dowo꞉. Mogago꞉ a꞉ma꞉yo꞉ nio꞉ tambo di. (Mo꞉mo꞉ 1-5; Luk 3.38; Lom 5.12-21; 1Kol 15.22,45; 1Tim 2.13-14; Yud 14)

Alon (Fik, Fig) Isolael hen a꞉namio꞉ alona꞉ fowo꞉ nudo꞉ nafa ko꞉lo꞉, kaluka꞉isaleya꞉yo꞉ tula꞉sa꞉ga꞉ na꞉sen. Ko꞉sega niliyo꞉ fowo꞉ mo꞉naki, fo꞉so꞉ ko꞉lo꞉ sia꞉sa꞉ga꞉ na꞉sen. (Mo꞉mo꞉ 3.7, Madi 21.18-21, Luk 13.6-9)

Ana (Anna, Anna) Ana e sa꞉ba꞉lo꞉ ko꞉lo꞉ e Godeya꞉ ene malilo꞉ a a꞉namio꞉ ho꞉leno꞉ tambo nanogo꞉ a꞉na dia꞉len. E Godeya꞉lo꞉ Da꞉feyo꞉ Kalu mia꞉no꞉ a꞉no꞉ ko꞉lo꞉ yasila꞉li elen. E nuluwo꞉lo꞉, ho꞉lenowo꞉lo꞉ Godemo꞉ dulugu sa꞉la꞉li sa꞉sen. Ya꞉suwo꞉ sa꞉la꞉lia꞉sa꞉ga꞉ ho꞉len o a꞉no꞉ fa꞉la꞉dowabikiyo꞉, Godeya꞉ Malilo꞉ aya dia꞉gane ko꞉lo꞉, Ana o꞉lia꞉ Simeon o꞉lia꞉ma꞉yo꞉ Ya꞉su sa꞉la꞉li a꞉no꞉ ko꞉lo꞉ sagalakiyo꞉, Godemo꞉ dulugu sio꞉. (Luk 2.36-38)

Ananaias (Ananias, Ananias) Ananaias o꞉lia꞉ ene inga Safaila o꞉lia꞉ma꞉yo꞉ heno꞉ Godemo꞉ bo꞉ba dimiakiyo꞉, a꞉la꞉ma꞉yo꞉ mole hebo꞉ inin wo꞉no꞉le dia꞉taki, heb nowo꞉ Godemo꞉ dimiakiyo꞉, Bidamo꞉wo꞉ dikili sio꞉. A꞉la꞉ma꞉yo꞉ Bida dikido꞉ma, ko꞉sega Godeyo꞉ ko꞉lo꞉ dikido꞉. A꞉la꞉gabiki Gode eyo꞉ a꞉la꞉yo꞉ sana sowo꞉. (Ilig 5.1-11)

Atemis (Artemis, Artemis) Atemis a꞉no꞉ madali godeya꞉ wiyo꞉ o꞉m. A꞉sia kaluka꞉isale i a꞉ma꞉yo꞉ emo꞉ gulugululaki ene wiyo꞉ duluda꞉sen. A꞉fesa꞉s amisa꞉n a꞉namio꞉ Atemisa꞉ wi duludakilo꞉ gulugulula꞉sen ayo꞉ alan ko꞉lo꞉ dialifa꞉. (Ilig 19.21-41)

Babilon (Babilon, Babylon) Babilon amisa꞉n a꞉no꞉ mada alan. Mo꞉luwo꞉ Babilon iyo꞉ Isolael o꞉lia꞉ buba꞉sa꞉ga꞉, Isolaelo꞉ ili tinio꞉. A꞉la꞉ta꞉ga꞉ Isolael kaluka꞉isaleyo꞉ modo꞉ ko꞉lo꞉ Babilon ili ta꞉lia꞉sa꞉ga꞉, Babilon hamana꞉ki dibodaki, a꞉ma꞉la꞉ mena꞉kiyo꞉ fogo꞉ mo꞉dimi. A꞉la꞉fo꞉ko꞉lo꞉ Isolael iyo꞉ dona do꞉la꞉lowo꞉ dom a꞉la꞉fo꞉wo꞉ a꞉na sen. Yo꞉n eyo꞉ Babilon a꞉no꞉ Godeya꞉ gis kaluwo꞉ o꞉m a꞉la꞉ da꞉fe sio꞉. (Mad 1.11, 12.17 Ilig 7.43, Kala 17-18)

Bal (Bal, Baal) Bal a꞉no꞉ madali gode nowo꞉ o꞉m. Ha꞉la꞉ kaluka꞉isale Isolaela꞉ hen amilo꞉ sen i a꞉ma꞉yo꞉ madali gode Bal a꞉no꞉ ko꞉lo꞉ wabuda꞉sen. A꞉la꞉ta꞉ga꞉ iliyo꞉ Isolael kaluka꞉isaleyo꞉ ini Godeyo꞉ ta꞉foma꞉ki iyo꞉ dikidiyo꞉. A꞉la꞉gabiki, Isolael kaluka꞉isaleyo꞉ ini Gode hendelemo꞉lo꞉ gulugulula꞉sen man a꞉no꞉ ka ta꞉ta꞉sa꞉ga꞉, madali gode Bal o꞉mo꞉ gulugulula꞉len. Ililo꞉ mogago꞉ dimida꞉len a꞉ma꞉ ilikiyo꞉, Gode e mada gadio꞉wo꞉ alan dowa꞉sen. (Lom 11.4)

Bali (Bali, Barley) Bali fo a꞉no꞉ da꞉si o꞉ngo꞉ ko꞉lo꞉, fo a꞉no꞉ tula꞉sa꞉ga꞉ basiab amio꞉ falawa fa꞉la꞉dowa꞉sen. Isolael kaluka꞉isaleya꞉yo꞉ falawa a꞉no꞉ so꞉da꞉sa꞉ga꞉ na꞉sen. (Lud 1-3; Yo꞉n 6.9,13; Kala 6.6)

Ba꞉ndiko꞉s Ho꞉len (Pentikos, Pentecost) Ba꞉ndiko꞉s a꞉la꞉do꞉ sa꞉lab a꞉no꞉ Gilig to ko꞉lo꞉, a꞉ma꞉ ha꞉go꞉ we, do꞉la꞉lowo꞉ bila꞉fo꞉ o꞉m. Isolael kaluka꞉isale iliyo꞉ sagalo꞉ ho꞉len nowo꞉ a꞉no꞉ ko꞉lo꞉ da꞉fe sio꞉. Tinio꞉ Asulo꞉ Ho꞉len a꞉na a꞉la꞉ta꞉ga꞉ aneyo꞉, ho꞉len do꞉la꞉lowo꞉ bila꞉fo꞉ a꞉no꞉ ko꞉lo꞉ fa꞉la꞉dowab amio꞉, Ba꞉ndiko꞉s ho꞉leno꞉ o꞉m. Yu kaluka꞉isale iliyo꞉ Godeya꞉lo꞉ imo꞉lo꞉ asuwa꞉ta꞉sen a꞉no꞉ asulakiyo꞉, sagalo꞉ ho꞉len we da꞉feyo꞉ ko꞉lo꞉, ho꞉len a꞉namio꞉ iliyo꞉ bo꞉ba kelego꞉wo꞉ Godemo꞉ dimia꞉sen.

Bea (Bea, Bear) Bea a꞉no꞉ no꞉ alan. Bea e no꞉ halaido꞉ ko꞉lo꞉, e gadiakiyo꞉ kaluwo꞉ yasala꞉sa꞉ga꞉ na꞉sen. (Kala 13.2)

Bia꞉sibul (Belsebul, Beelzebul) Bia꞉sibul wi a꞉no꞉ madali gode ko꞉lo꞉ Filistia kalu ililo꞉ wabulu sa꞉la꞉seno꞉ o꞉m. Wi a꞉no꞉ madali godelo꞉ bo꞉fo꞉lowan kalu Sa꞉da꞉na꞉ ene wiyo꞉ ko꞉lo꞉ da꞉fe sa꞉laki wikilo꞉. (Mad 12.24; Luk 11.13-19)

Bobalo꞉ so꞉mea꞉sen i fofodo꞉ (Alta, Altar) Tamin amio꞉ Yu kalu iliyo꞉ Godemo꞉wo꞉ bobayo꞉ so꞉mea꞉sen. Iliyo꞉ Godemo꞉ so꞉meakiyo꞉ kao inso꞉ o꞉lia꞉ sibi inso꞉ o꞉lia꞉, a꞉no꞉ ko꞉lo꞉ so꞉mea꞉sen. Mo꞉luwo꞉ iliyo꞉ uwo꞉ dibida꞉sa꞉ga꞉ imili alitakiyo꞉ a꞉na so꞉mea꞉sen, ko꞉sega tifa amio꞉ Mo꞉sa꞉sa꞉ ho꞉len a꞉namio꞉, iliyo꞉ iyo꞉ fofoda꞉sa꞉ga꞉yo꞉, go꞉l o꞉lia꞉ silba o꞉lia꞉yo꞉ wa꞉la oga꞉di alifa꞉. Iliyo꞉ dimida꞉sa꞉ga꞉ dia꞉sia꞉likiyo꞉, boba dimiab a꞉no꞉ a꞉ma꞉ wa꞉la dia꞉ta꞉ga꞉ so꞉mea꞉sen. (Mo꞉mo꞉ 8.20, Ya꞉m 2.21, Kala 11.1)

Bobalo꞉ so꞉mea꞉sen kalu (Pris, Priest) Isolael kalu nolba꞉yo꞉ Godeya꞉ ene Malilo꞉ A a꞉namio꞉ nanogo꞉ dimida꞉sen ko꞉lo꞉, i a꞉no꞉ bobalo꞉ so꞉mea꞉sen kalu a꞉la꞉sa꞉la꞉sen. Iyo꞉ tambo Libaiya꞉ ene so꞉lo꞉wa a꞉la꞉ta꞉ga꞉ fa꞉la꞉dowo꞉. Iliyo꞉ Godeya꞉ ene malilo꞉ a a꞉no꞉ bo꞉fo꞉likiyo꞉, ililo꞉ nanog alande diano꞉ Godemo꞉lo꞉ boba so꞉mea꞉seno꞉ o꞉m. Donayo꞉ tambo amio꞉, ililo꞉ bobalo꞉ so꞉mea꞉no꞉ misa꞉ kalu doma꞉kiyo꞉, iliyo꞉ imilida꞉la꞉ da꞉fe alifela꞉sen. A꞉la꞉ta꞉ga꞉ Isolael kaluka꞉isaleya꞉ mogago꞉ dimida꞉sen a꞉no꞉ tambo hala꞉ma꞉kiyo꞉, e Mada Malilo꞉ Galala꞉ a꞉namio꞉ ina꞉li ha꞉na꞉sen. Ko꞉sega ho꞉len imilise amio꞉, Ya꞉su Keliso eyo꞉ ene mela꞉no꞉wo꞉ walaki dimi, a꞉la꞉ta꞉ga꞉ ene ho꞉bo꞉ a꞉ma꞉yo꞉ tilidabu kaluka꞉isaleya꞉ mogago꞉ dimida꞉len a꞉no꞉ tambo halaki dila꞉. (Hibu 5-10)

Da꞉ibid (Devit, David) Isolaela꞉ ini misa꞉ kalu alan nol us a꞉namio꞉, Da꞉ibid e misa꞉ kalu alan, wa꞉la꞉bo꞉ e. Ene iyayo꞉ Ya꞉si, a꞉la꞉ta꞉ga꞉ Ya꞉siya꞉ ene kalu sowa tifo꞉ e. E misa꞉ kalu alano꞉ o꞉fa꞉la꞉doma꞉nikiyo꞉, tamin amio꞉ eyo꞉ ene iyaya꞉ kabo sibi ko꞉lo꞉ bo꞉fo꞉len. E o꞉so꞉wa ilikiyo꞉, ho꞉len no amio꞉, e kalu alan wilo꞉ o꞉lia꞉ buba꞉sa꞉ga꞉, kalu a꞉no꞉ e sana sowo꞉. Da꞉ibid eyo꞉ Godeyo꞉ mada alan asula꞉sen. Eyo꞉ Godeya꞉ wi duluba꞉no꞉ a꞉laki, gisalo꞉wo꞉ modo꞉ ko꞉lo꞉ sa꞉sa꞉lo꞉. Godeya꞉ ene Da꞉feyo꞉ kalu, Keliso e, Da꞉ibida꞉ ene so꞉lo꞉wa a꞉la꞉ta꞉ga꞉ fa꞉la꞉doma꞉ib a꞉la꞉liki, dinali sa꞉lan kalu iliyo꞉ mo꞉luwo꞉ saefa꞉. A꞉la꞉ta꞉ga꞉ tif amio꞉ to a꞉no꞉ tambo ilili alifa꞉. (Lom 1.3; Kala 22.16)

Donki (Donki, Donkey) Donki a꞉no꞉ no꞉ alan nowo꞉ e. Isolael kaluwa꞉yo꞉ donkiyo꞉ fofa꞉sen ko꞉lo꞉, donki e amio꞉ nanogo꞉ alan dimida꞉sen. Kaluka꞉isale iliyo꞉ hida꞉yo꞉ kelego꞉wo꞉ wa꞉la dia꞉tab amio꞉, e dia꞉ ha꞉na꞉sen. A꞉la꞉ta꞉ga꞉ kaluka꞉isale iyo꞉lo꞉ donki wa꞉l a꞉na asita꞉ga꞉ ha꞉na꞉sen. (Mo꞉mo꞉ 16.12, Madi 21.5)

Do꞉go꞉fo꞉ hege gedean man (Katim skin bilong pikinini, Circumcision) Tamin amio꞉ Gode eyo꞉ Ablahambo꞉lo꞉ to dinali saefa꞉ a꞉no꞉ ko꞉lo꞉ ele ba꞉ba꞉no꞉wo꞉ we. Yu kaluka꞉isale iyo꞉ Gode amio꞉ hendele tilidabuka꞉ a꞉la꞉li widakiyo꞉, man we ko꞉lo꞉ dimida꞉li mio꞉. Man a꞉no꞉ we. Iliyo꞉ kalu so꞉wayo꞉ sa꞉la꞉lia꞉sa꞉ga꞉, ho꞉len o fa꞉la꞉dowab amio꞉, so꞉wa tuo꞉lun a꞉ma꞉ do꞉go꞉fo꞉ hege gedea꞉sen. Ko꞉sega Yu kaluma iliyo꞉ man o꞉leo꞉ngo꞉wo꞉ mo꞉dimida꞉len. Sa꞉so꞉ ho꞉gi fa꞉la꞉dowab amio꞉, Yu kaluka꞉isalema i nolo꞉ Ya꞉su amio꞉ tilidabu, ko꞉sega iyo꞉ do꞉go꞉fo꞉ mo꞉hege gedea꞉len. A꞉la꞉go꞉ko꞉lo꞉ Yu amilo꞉ tilidabu kalu nolba꞉yo꞉ iyo꞉ sa꞉s usamilo꞉ mia꞉no꞉wo꞉ ka꞉ma꞉no꞉ asulo꞉. Ko꞉sega Fo꞉l eyo꞉ mo꞉ka꞉ma꞉no꞉ asulaki imo꞉wo꞉ fanda wido꞉. Tili dabu a꞉na ilikiyo꞉ Yu kaluka꞉isale do꞉go꞉fo꞉ hege gedeo꞉wo꞉lo꞉, Yu kaluka꞉isalema do꞉go꞉fo꞉ mo꞉hege gedeo꞉wo꞉lo꞉ iyo꞉ tambo imilo꞉ dowab. (Mo꞉mo꞉ 17.9-14)

Fa꞉lisi (Farisi, Pharisee) Fa꞉lisi kalu i we, Isolael kaluka꞉isale i us a꞉namio꞉ wilo꞉ ko꞉lo꞉ elen. Iliyo꞉ Mo꞉sa꞉sa꞉ ele difa꞉ a꞉no꞉ ko꞉lo꞉ fanda asululiaki, mada kudu ha꞉na꞉sen. A꞉la꞉ta꞉ga꞉ ele nol inido꞉wo꞉ a꞉ba꞉lakiyo꞉, ko꞉li ko꞉lilo꞉ a꞉no꞉lo꞉ kudu ha꞉na꞉sen. Fa꞉lisi kalu ini asulakiyo꞉, iliyo꞉ kalu nolo꞉ mada tininila꞉ a꞉la꞉asulaki, inina꞉ma꞉la꞉yo꞉ kaila꞉sen. Fa꞉lisi kalu nolba꞉yo꞉ Ya꞉su o꞉lia꞉yo꞉ gis dowaki, e sana soma꞉no꞉wo꞉ togo꞉ kedo꞉.

Godeya꞉ Malilo꞉ A Helebeso꞉ga꞉lo꞉ Dia꞉leno꞉ (Haus sel bilong God, Tabernacle) Mo꞉sa꞉sa꞉ ho꞉len a꞉namio꞉, Gode e Isolael kaluka꞉isale o꞉lia꞉ ko꞉na꞉ma doma꞉no꞉ a꞉lakiyo꞉, eyo꞉ ene ayo꞉ dima꞉ki, Mo꞉sa꞉sbo꞉ wido꞉. Eyo꞉ a we dia꞉no꞉wo꞉ mano꞉ dinafa fanda widabikiyo꞉, iliyo꞉ a a꞉no꞉ no꞉ do꞉go꞉f o꞉lia꞉ helebeso꞉g o꞉lia꞉ma꞉ di. Gode e a a꞉na dofo꞉lab ko꞉lo꞉, bobalo꞉ so꞉mea꞉sen misa꞉ kalu da꞉feyo꞉ a꞉ma꞉ tina꞉sa꞉ga꞉, Godemo꞉wo꞉ a꞉na so꞉kugulu mea꞉sen. Kaluka꞉isale nolo꞉ ha꞉la꞉ya siliki gulugulula꞉sen.

Godeya꞉ Malilo꞉ A (Haus holi bilong God, Temple) Solomon ho꞉len a꞉namio꞉, Isolael kaluka꞉isale iliyo꞉ Godeya꞉ Malilo꞉ A hendele a꞉no꞉ Ya꞉lusalem a꞉na mo꞉mo꞉da dialifa꞉. Tif amio꞉ gis kalu nolo꞉ ya꞉sa꞉ga꞉, a a꞉no꞉ bidila꞉. Ho꞉len no amio꞉ Sa꞉laba꞉bul eyo꞉ Godeya꞉ Malilo꞉ A nowo꞉ wa꞉ka dialifa꞉ ko꞉sega, a꞉no꞉lo꞉ kalu nolba꞉ bidila꞉. A꞉la꞉ta꞉ga꞉ tif amio꞉ Ha꞉lod eyo꞉ Godeya꞉ Malilo꞉ Ayo꞉ mada nafale nowo꞉ a꞉dialifa꞉ ko꞉lo꞉, Ya꞉sulo꞉ mio꞉ ho꞉len a꞉namio꞉, a a꞉no꞉ o꞉elen. Isolael kaluka꞉isale iliyo꞉ a a꞉na kegea꞉sa꞉ga꞉, Godeya꞉ towo꞉ widaki, Godemo꞉ dulugu sa꞉laki, a꞉la꞉ta꞉ga꞉ bobayo꞉ a꞉na so꞉kugulu so꞉mea꞉len. O꞉go꞉ tilidabu kaluka꞉isaleya꞉ do꞉mo꞉ a꞉no꞉ Godeya꞉ ene malilo꞉ ayo꞉ o꞉m. A꞉la꞉ta꞉ga꞉ ene Mamayo꞉ ni usa sab.

Godeya꞉ Sibi inso꞉ (Sipsip bilong God, Lamb of God) Yu kalu ili man amio꞉ kaluka꞉isaleya꞉ ini mogago꞉wo꞉ hama꞉kiyo꞉, sibi inso꞉ nafa a꞉no꞉ sa꞉nda꞉sa꞉ga꞉, Godemo꞉ so꞉mea꞉sen. Sibiya꞉ ho꞉bo꞉ a꞉ma꞉yo꞉ ili mogago꞉ dimido꞉wo꞉ halab a꞉namio꞉, iyo꞉ Gode o꞉lia꞉yo꞉ nafale malilo꞉ dowa꞉sen. Ya꞉su eyo꞉ henfelo꞉ kaluka꞉isaleyo꞉ asuwa꞉taki, ene mela꞉no꞉ ko dimi ko꞉lo꞉, e Godeya꞉ sibi inso꞉ka꞉ a꞉la꞉bo꞉ a꞉na da꞉fe sio꞉.

Godeya꞉ tolo꞉ dinali sa꞉lan kalu (Profet, Prophet) Kaluka꞉isale abeyo꞉ Godeya꞉ towo꞉ da꞉da꞉sa꞉ga꞉lo꞉ kaluka꞉isalemo꞉lo꞉ kalab amilo꞉ wida꞉lab a꞉no꞉ e Godeya꞉ tolo꞉ dinali sa꞉lan kalu a꞉la꞉sa꞉lan. Isolael ho꞉len a꞉namio꞉ kaluka꞉isale modo꞉wo꞉ nanog a꞉no꞉ ko꞉lo꞉ dia꞉len. Nowo꞉ Samuel, Elaiya, Natan, Aisaya, Ya꞉limaya, a꞉la꞉ta꞉ga꞉ kalu modo꞉ nolo꞉lo꞉ a꞉lab. Iliyo꞉ Godeya꞉ towo꞉ Isolael kaluka꞉isalemo꞉wo꞉ sa꞉la꞉i mio꞉. Ya꞉sulo꞉ fa꞉la꞉dowo꞉ ho꞉len a꞉namio꞉, Yo꞉n ho꞉n amilo꞉ to꞉lolan a꞉no꞉lo꞉ Godeya꞉ tolo꞉ dinali sa꞉lan kalu dowo꞉. A꞉la꞉ta꞉ga꞉ o꞉go꞉ kaluka꞉isale abeyo꞉ Godeya꞉ tolo꞉ wida꞉lab a꞉no꞉lo꞉ Godeya꞉ tolo꞉ dinali sa꞉lan kalu a꞉la꞉sa꞉lab.

Godeya꞉lo꞉ Da꞉feyo꞉ Kalu (Krais, Christ) Isolael kaluka꞉isale iliyo꞉ kalu nowo꞉ nanogo꞉ ho꞉gi dimia꞉nikiyo꞉, iliyo꞉ kalu a꞉no꞉ gulalu mesea a꞉la꞉ta꞉ga꞉ wa ho꞉no꞉ kalu a꞉ma꞉ misa꞉ wa꞉la tulu alita꞉ga꞉, kalu a꞉no꞉ nanogo꞉ a꞉na dima꞉ki da꞉fea꞉sen. A꞉la꞉fo꞉ko꞉lo꞉ Gode eyo꞉ kaluka꞉isaleyo꞉ a꞉ma꞉la꞉ gasilima꞉kiyo꞉, Godeya꞉ enedo꞉ asulab aumbo꞉ kalu nowo꞉ a꞉na da꞉fe alifa꞉ ko꞉lo꞉, kalu we wiyo꞉ a꞉na wikili alifa꞉. Hibulu towa꞉yo꞉ “Ma꞉saya” a꞉la꞉sa꞉la꞉sen. A꞉la꞉ta꞉ga꞉ Gilig towa꞉yo꞉ “Keliso” a꞉la꞉sa꞉la꞉sen. Keliso a꞉la꞉do꞉ sa꞉lab a꞉no꞉, ha꞉g nolo꞉ a꞉lab. Nowo꞉ Ya꞉suwa꞉ wiyo꞉ o꞉m. Nowo꞉ Godeya꞉lo꞉ Da꞉feyo꞉ kaluwo꞉ o꞉m. A꞉la꞉ta꞉ga꞉ nowo꞉ kaluka꞉isale Ya꞉su amilo꞉ tilida꞉dab a꞉no꞉lo꞉ Keliso kaluka꞉isale a꞉la꞉sa꞉la꞉lab.

Ha꞉fo꞉lo꞉ Dowan ho꞉len (De Sabat, Sabbath) Mo꞉mo꞉do꞉ bugo꞉ amio꞉ Gode eyo꞉ henfelo꞉ we ho꞉gi dimidakiyo꞉, ho꞉len do꞉go꞉fela꞉fo꞉ us a꞉namio꞉, eyo꞉ nanogo꞉ tambo dimida꞉i ha꞉na꞉sa꞉ga꞉, a꞉na edo꞉. Ho꞉len doma꞉yo꞉ e ha꞉fo꞉ dowo꞉. A꞉la꞉ta꞉ga꞉ elo꞉ dimido꞉ o꞉leaumbo꞉, Yu kaluka꞉isale iyo꞉lo꞉ a꞉la꞉kudu ha꞉na꞉melea꞉ki, eyo꞉ eleyo꞉ a꞉na saefa꞉. A꞉la꞉fo꞉ko꞉lo꞉ Isolael kaluka꞉isaleyo꞉ Ha꞉fo꞉lo꞉ Dowan ho꞉len a꞉namio꞉ nanogo꞉ mada mo꞉dimida꞉sen. Hibulu towa꞉yo꞉ ho꞉len a꞉no꞉ “Sabat” a꞉la꞉sa꞉la꞉sen. Nililo꞉ ho꞉len do꞉go꞉fe sa꞉lab a꞉no꞉ Yu kalu iliyo꞉ ho꞉len domo꞉ o꞉m. (Mo꞉mo꞉ 2.1-3, Luk 6.1-11, 13.10-17, 14.1-5)

Ha꞉ga (Hega, Hagar) Ha꞉ga e Ablahama꞉ inga Selaya꞉ ene nanogdo꞉ dian ga. Sa꞉la eyo꞉ Ablahambo꞉wo꞉ so꞉wayo꞉ mo꞉sa꞉la꞉mea꞉no꞉ dowabikiyo꞉, Sa꞉la eyo꞉ Ha꞉ga a꞉no꞉ inbo꞉ dima꞉ki dimi. A꞉la꞉ta꞉ga꞉ Ha꞉ga e Ablaham o꞉lia꞉ alila꞉sa꞉ga꞉, e a꞉na alelo꞉ ko꞉lo꞉, kalu so꞉wa Ismaelo꞉ a꞉na sa꞉la꞉li. (Mo꞉mo꞉ 16, 21.8-21, Gala 4.24-25)

Ha꞉lod

1. Ha꞉lod Alan(Helot, Herod the Great)Ha꞉lod Alan e Ya꞉sulo꞉ sa꞉la꞉li ho꞉len a꞉namio꞉ Yudia hen a꞉namilo꞉ misa꞉ kalu alan seno꞉ e. Ho꞉len a꞉namio꞉ Loma꞉ misa꞉ kalu iliyo꞉ Yudia hen a꞉no꞉ ili bo꞉fo꞉len. Ha꞉lod e Yu kalu ko꞉sega e Loma꞉ misa꞉ kalu i o꞉lia꞉ ege dowabiki, iliyo꞉ e Yudia hen a꞉no꞉ e bo꞉fo꞉melea꞉ki ta꞉fo꞉. Ha꞉lod eyo꞉ hen elo꞉ a꞉no꞉ kalu noma꞉yo꞉ diabena꞉kiyo꞉ e tagila꞉sen. A꞉la꞉fo꞉ko꞉lo꞉ Ya꞉sulo꞉ sa꞉la꞉li ho꞉len a꞉namio꞉, Ha꞉lod eyo꞉ misa꞉ kalu ho꞉gi nowo꞉ sa꞉la꞉liaka꞉ a꞉la꞉do꞉ sa꞉lab a꞉no꞉ da꞉da꞉sa꞉ga꞉yo꞉, eyo꞉ kalu so꞉wa tuo꞉lun a꞉no꞉ tambo yasala꞉ma꞉no꞉ a꞉la꞉saefa꞉. (Madi 2.1-22, Luk 1.5)

2. Ha꞉lod Antibas (Helot Antipas, Herod Antipas) Ha꞉lod Antibas e Ha꞉lod Alan a꞉ma꞉ ene so꞉wa. Ya꞉su eyo꞉ towo꞉ widaki, molo ha꞉na꞉no꞉lo꞉ dimida꞉len ho꞉len a꞉namio꞉, kalu wema꞉yo꞉ Galili hen a꞉no꞉ bo꞉fo꞉len. Ga Ha꞉lodias a꞉no꞉ e di ko꞉lo꞉, eyo꞉ Yo꞉n ho꞉n amilo꞉ to꞉lolan kalu a꞉no꞉ sana sowo꞉. A꞉la꞉ta꞉ga꞉ Yu kalu iliyo꞉ Ya꞉suwo꞉ sana soma꞉no꞉ dowabikiyo꞉, Ha꞉lod Antibas eyo꞉ Ya꞉suwo꞉ mo꞉walilo꞉. (Mak 6.14-29, Luk 23.6-12)

3. Ha꞉lod Agiliba (Helot Agiliba, Herod Agribba) Ha꞉lod Agiliba e Ha꞉lod Alan a꞉ma꞉ ene ema꞉mu. Ya꞉su amilo꞉ tilidabu kaluka꞉isaleya꞉yo꞉ sa꞉so꞉ ho꞉gi mo꞉mo꞉dabikiyo꞉, kalu Ha꞉lod Agiliba eyo꞉ iyo꞉ mada dikido꞉. A꞉la꞉ta꞉ga꞉ kalu wema꞉yo꞉ Yo꞉na꞉ ene ao Ya꞉ma꞉so꞉ sana sowo꞉. (Ilig 12.1-23)

4. Ha꞉lod Agiliba 2 (Helot Agiliba 2, Herod Agribba 2) Ha꞉lod Agiliba 2 e Ha꞉lod Agiliba a꞉ma꞉ ene so꞉wa. Kalu nolba꞉yo꞉ Folo꞉ mo꞉walilab amio꞉, kalu wema꞉yo꞉ alobana ba꞉ba꞉. (Ilig 25.13 - 26.2, 26.19, 27-32)

Hibulu (Hibru, Hebrew) Hibulu a꞉la꞉do꞉ sa꞉lab a꞉no꞉ Isolael kaluka꞉isaleya꞉ to wiyo꞉ o꞉m. A꞉la꞉ta꞉ga꞉ i a꞉no꞉lo꞉ Hibulu kaluka꞉isale a꞉la꞉sa꞉la꞉sen. Ili wi nowo꞉ Yu. Kaluka꞉isale i a꞉no꞉ Ablahama꞉ eso꞉lo꞉wa a꞉la꞉ta꞉ga꞉ fa꞉la꞉dowo꞉. A꞉la꞉ta꞉ga꞉ kaluka꞉isale ililo꞉ to sa꞉lab a꞉no꞉lo꞉ Hibulu to a꞉la꞉sa꞉la꞉sen.

Iliga꞉felo꞉ kalu (Aposel, Apostle) Ya꞉su eyo꞉, e kudu mena꞉kiyo꞉ kaluwo꞉ kugula꞉fo꞉ ko꞉lo꞉ da꞉feyo꞉. Iyo꞉ e o꞉lia꞉ sia꞉likiyo꞉, Ya꞉suwa꞉lo꞉ to wida꞉lab a꞉no꞉ tilida꞉daki kudu ha꞉na꞉len. Ya꞉su eyo꞉ to mano꞉ imo꞉ wida꞉la꞉ga꞉, iyo꞉ asululiabikiyo꞉, eyo꞉ i a꞉no꞉ hen nowa sia꞉liki kaluka꞉isalemo꞉wo꞉ walama꞉ki iliga꞉felo꞉. A꞉la꞉fo꞉ko꞉lo꞉ iyo꞉ iliga꞉felo꞉ kalu a꞉la꞉sio꞉. Iliga꞉felo꞉ kalu a꞉la꞉do꞉ sio꞉ a꞉no꞉, Gilig towa꞉yo꞉ “Abasol” a꞉la꞉sa꞉lan. I a꞉no꞉, sa꞉sdo꞉ bo꞉fo꞉lowan kalu dowo꞉. (Madi 10.1-4, Mak 3.13-19, Luk 6.12-16)

Isolael (Israel, Israel) Aisa꞉g dia꞉ La꞉ba꞉ga lia꞉ma꞉ so꞉wa imili nowo꞉ Ya꞉kob. Ya꞉kob e kalu dowabiki, e Gode o꞉lia꞉ bubo꞉ ko꞉lo꞉, ho꞉len a꞉namio꞉ Gode eyo꞉ e wi ho꞉gi nowo꞉ dimiaki, Isolael wikilo꞉. Eyo꞉ kalu so꞉wayo꞉ kugula꞉fo꞉ sa꞉la꞉li ko꞉lo꞉, i a꞉na a꞉la꞉ta꞉ga꞉yo꞉ Isolael so꞉lo꞉ kugula꞉fo꞉wo꞉ a꞉na fa꞉la꞉dowo꞉. Tif amio꞉ Isolaela꞉ ema꞉mu i a꞉no꞉ tambo Isolael kaluka꞉isale a꞉la꞉sa꞉lan.

Kalule Dowo꞉ (Pikinini Bilong Man, Son of Man) Ya꞉su e Godeya꞉ ene So꞉wa ko꞉lo꞉ e Gode. Ko꞉sega e Hebeneyo꞉ ta꞉ta꞉ga꞉, henfelo꞉ wenamio꞉ e wilo꞉ma kalu doma꞉ni tindakiyo꞉, e henfelo꞉ so꞉wale o꞉ngo꞉ sa꞉la꞉li. E henfelo꞉ kalule fa꞉la꞉dowo꞉ ko꞉lo꞉, e “Kalule Dowo꞉” wi a꞉no꞉ ko꞉lo꞉ di. Wi a꞉ma꞉ ha꞉g a꞉no꞉, imilo꞉ ko꞉m, Godeya꞉ Da꞉feyo꞉ Kalu. (Mak 10.33,45, Luk 19.10)

Ka꞉mol (Kamel, Camel) No꞉ ka꞉mol e mada alan ko꞉lo꞉, ene fela꞉kiyo꞉ mada sasal. Hida꞉yo꞉ kelego꞉wo꞉ e wa꞉la dia꞉ta꞉ga꞉yo꞉, kalaleli hen a꞉namio꞉ e heno꞉ ko꞉na꞉yo꞉ o꞉li ka dia꞉ha꞉na꞉sen. A꞉la꞉ta꞉ga꞉ kaluka꞉isaleyo꞉ e wa꞉l amio꞉ o꞉li asita꞉ga꞉ ha꞉na꞉sen. (Madi 3.4, 19.24, Mak 10.25, Luk 18.25)

Keliso kaluka꞉isale (Kristen, Christian) Kaluka꞉isale abeyo꞉ Ya꞉su emo꞉lo꞉ foga꞉le sa꞉la꞉sa꞉ga꞉lo꞉ asulo꞉wo꞉ nodolaki, man mogago꞉wo꞉ fa꞉s dimiab a꞉no꞉, iyo꞉ Keliso kaluka꞉isale a꞉la꞉ sa꞉la꞉sen. Kaluka꞉isale i we Ya꞉su amio꞉ tilidabu ko꞉lo꞉, iyo꞉ ene man a꞉no꞉ kudu ha꞉na꞉sen. A꞉la꞉fo꞉ko꞉lo꞉ iliyo꞉ Ya꞉suwa꞉ ene wiyo꞉ a꞉na di. Antio꞉g amisa꞉n a꞉namio꞉ sa꞉so꞉ fa꞉la꞉dowabikiyo꞉, kalu nolba꞉yo꞉ Ya꞉su amilo꞉ tilidabu kaluka꞉isale i a꞉namilo꞉ sab a꞉no꞉ “Keliso kaluka꞉isale” a꞉la꞉bo꞉ a꞉na mo꞉mo꞉da wikilo꞉. (Ilig 26.28, 1Bid 4.16)

Lasalas (Laselas, Lazarus) Lasalas e Ya꞉suwa꞉ ene mili kalu nowo꞉ e. Malia o꞉lia꞉ Mada o꞉lia꞉ma꞉ aowo꞉ e. Lasalas e walaf ba꞉la꞉sa꞉ga꞉ sowo꞉ ko꞉lo꞉, ado a꞉la꞉ma꞉yo꞉ Ya꞉suwo꞉ mena꞉ki ho꞉ido꞉. Ya꞉su e a꞉na ha꞉na꞉sa꞉ga꞉yo꞉, Lasalaso꞉ o꞉ma dali alifa꞉lo꞉biki ba꞉ba꞉ ko꞉sega, Ya꞉su eyo꞉ e a꞉ma꞉la꞉ dasi alifa꞉. (Yo꞉n 11.1-44)

La꞉ba꞉ga (Rebeka, Rebekah) La꞉ba꞉ga e, Ablahama꞉ kalu so꞉wa Aisa꞉ga꞉ ingaya꞉ wiyo꞉ o꞉m. Eyo꞉ so꞉wayo꞉ a꞉la꞉, Iso꞉ dia꞉ Ya꞉kob dia꞉ ko꞉lo꞉ sa꞉la꞉li. Ya꞉kob eya a꞉la꞉ta꞉ga꞉yo꞉ Isolael so꞉lo꞉ kugula꞉fo꞉ fa꞉la꞉dowo꞉ a꞉ma꞉ inuwo꞉ La꞉ba꞉ga. (Mo꞉mo꞉ 24 - 27, Lom 9.10-13)

Lehab (Rahap, Rehab) Isolael kalu a꞉la꞉ ko꞉lo꞉ Ka꞉ina꞉n heno꞉ ba꞉ba꞉nikilo꞉ o꞉lusen ane a꞉namio꞉, gis kaluwa꞉yo꞉ iyo꞉ ba꞉da꞉sa꞉ga꞉ yasala꞉ma꞉nigabiki, Lehab eyo꞉ a꞉la꞉yo꞉ asuwa꞉taki, wo꞉no꞉le ta꞉fo꞉la꞉ga꞉, kea꞉fo nuluwo꞉ fufalo꞉ dia꞉no꞉ ho꞉gulu a꞉na tina꞉sa꞉ga꞉, ha꞉la꞉ya hamana꞉ki iliga꞉fo꞉. A꞉la꞉fo꞉ko꞉lo꞉ Isolael kaluka꞉isaleyo꞉ ya꞉sa꞉ga꞉, Kenan kaluka꞉isale o꞉lia꞉ bubab amio꞉, iliyo꞉ Lehab o꞉lia꞉ ene so꞉lo꞉ o꞉lia꞉yo꞉ mo꞉sana sowo꞉. Lehab e Isolael ga fa꞉la꞉dowo꞉, a꞉la꞉ta꞉ga꞉ Lehab eya a꞉la꞉ta꞉ga꞉yo꞉, tif amio꞉ Da꞉ibid o꞉lia꞉ Ya꞉su o꞉lia꞉yo꞉ a꞉na fa꞉la꞉dowo꞉. (Madi 1.5, Hibu 11.31, Ya꞉m 2.25)

Lesol (Resel, Rachel) Lesol e Ya꞉koba꞉ ingayo꞉ nowo꞉ e. Ya꞉kob eyo꞉ Lesol e mada alan asula꞉sen. E Yosa꞉b o꞉lia꞉ Ba꞉nsamen o꞉lia꞉ma꞉ anowo꞉ e. (Mo꞉mo꞉ 29 - 35, Madi 2.18)

Madali nanog dian kalu (Wokboi nating, Slave) Madali nanogdo꞉ dian kalu a꞉no꞉ misa꞉ kalu noma꞉ ha꞉ga dowaki, nanogo꞉ elo꞉ sa꞉lab au dimida꞉sen. Misa꞉ kaluwa꞉yo꞉ iyo꞉ moleya꞉ kililia꞉sen ko꞉lo꞉, iliyo꞉ inin asulo꞉ a꞉no꞉ mo꞉kudu ha꞉na꞉ib. Iliyo꞉ ini misa꞉ kaluwa꞉lo꞉ asulab au ka kudu ha꞉na꞉sen. Keliso kaluka꞉isale ili misa꞉ kaluwo꞉ Ya꞉su ko꞉lo꞉, iyo꞉ elo꞉ asulab au kudu ha꞉naki, iyo꞉ Ya꞉suwa꞉ ene madali nanog dian kaluka꞉isale dowo꞉. (1Kol 7.20-24, A꞉fes 6.5-9, Kolo 3.22-25)

Mana (Mana, Manna) Mo꞉luwo꞉ Isolael kaluka꞉isaleyo꞉ Isib heno꞉ ta꞉ta꞉ga꞉, ma꞉no꞉lo꞉ma kalaleli hena ha꞉nabikiyo꞉, Gode eyo꞉ ma꞉no꞉ ho꞉gi nowo꞉ imo꞉ maiya꞉ki dimi. Ho꞉leno꞉ tambo iyo꞉ kalaleli hena sia꞉labikiyo꞉, Godeya꞉ ene dimidalia꞉ga꞉ dimia꞉len. Isolael kaluka꞉isaleyo꞉ ma꞉no꞉ a꞉no꞉ tamin amio꞉ mo꞉ba꞉da꞉sen. Iliyo꞉ ma꞉n a꞉no꞉ mana a꞉la꞉wikilo꞉. Hibulu towa꞉lo꞉ Mana a꞉la꞉do꞉ sa꞉lab a꞉no꞉, nili towa꞉yo꞉ “We o꞉ba꞉?” a꞉la꞉sa꞉lab. (Yo꞉n 6.31,49, Hibulu 9.4, Kala 2.17)

Ma꞉kisedeg (Melkisedek, Melchizedek) Ma꞉kisedeg e Godemo꞉lo꞉ bobalo꞉ so꞉mea꞉sen kalu nowo꞉ e. Ablaham eyo꞉ Lodo꞉ asuwa꞉taki gis kalu nol o꞉lia꞉ buba꞉sa꞉ga꞉ a꞉ma꞉la꞉ ya꞉len amio꞉, Ma꞉kisedeg e usa galili. Ma꞉kisedeg eyo꞉ Ablahamo꞉ dinafa mesea꞉ki, Godemo꞉ dulugu sio꞉. A꞉la꞉ta꞉ga꞉ Ablaham eyo꞉ buba꞉sa꞉ga꞉lo꞉ gis kaluwa꞉ kelego꞉ elo꞉ di a꞉no꞉, heb do꞉ a꞉no꞉ Ma꞉kisedegbo꞉ dimi. (Mo꞉mo꞉ 14.17-24, Hibu 5 - 7)

Ma꞉mula꞉ kalu (Ensol, Angel) Ma꞉mula꞉ kalu iyo꞉ Hebene halona iliki, Godeya꞉ nanog dimida꞉sen. A꞉la꞉ta꞉ga꞉ iyo꞉ henfelo꞉ wena ya꞉ga꞉yo꞉, Godeya꞉ towo꞉ kaluka꞉isalemo꞉wo꞉ sa꞉la꞉sen. Ma꞉mula꞉ kalu a꞉no꞉ kalu o꞉ngo꞉ma, iyo꞉ mama ko꞉lo꞉ sab. Taminde amio꞉ ma꞉mula꞉ kaluwo꞉ tambo Hebene sen ko꞉sega, imili noma꞉yo꞉ Gode o꞉lia꞉ yo꞉le dowaki a꞉la꞉iyo꞉. Ene wiyo꞉ Sa꞉da꞉na꞉. A꞉la꞉gabiki Gode eyo꞉ e o꞉luga꞉fo꞉. Ho꞉len a꞉namio꞉ ma꞉mula꞉ kaluwo꞉ aloba꞉daki, nolo꞉ Godeya꞉ ha꞉ga o꞉do꞉waki, nolo꞉ Sa꞉da꞉na꞉ o꞉lia꞉ dowo꞉. Ma꞉mula꞉ kalu Sa꞉da꞉na꞉lo꞉ kudu ane a꞉no꞉, niliyo꞉ mama mogago꞉ a꞉la꞉sa꞉lab. (Mo꞉mo꞉ 3.24, Luk 1.19,26, Ilig 12.6-11, 27.23, Hibu 1.14)

Mo꞉sa꞉s (Moses, Moses) Isolael kaluka꞉isaleyo꞉ Isib hen a꞉na sen amio꞉, Isib kaluwa꞉yo꞉ iyo꞉ halaido꞉ bo꞉fo꞉labikiyo꞉, iyo꞉ Isiba꞉ ili madali nanog dian kaluka꞉isale dowo꞉. A꞉la꞉gabikiyo꞉, Gode eyo꞉ kaluka꞉isale enedo꞉ a꞉no꞉ asuwa꞉taki a꞉ma꞉la꞉ gasilima꞉kiyo꞉, kalu nowo꞉ da꞉feyo꞉. Kalu a꞉no꞉ Mo꞉sa꞉s. Mo꞉sa꞉s eyo꞉ Isolael kaluka꞉isale ko꞉lo꞉ Isib hen amilo꞉ hida꞉yo꞉ dia꞉likilo꞉ sen a꞉no꞉, tililia꞉ga꞉ Ka꞉ina꞉n hen a꞉na ane. Iyo꞉ Ka꞉ina꞉n hena ha꞉nab amio꞉, Gode eyo꞉ ene eleyo꞉ Mo꞉sa꞉sbo꞉ dimi.

O꞉lif (Olif, Olive) O꞉lif a꞉no꞉ i wiyo꞉ o꞉m. I a꞉no꞉ Isolael kaluka꞉isale ili gela꞉sen. Iliyo꞉ i fo a꞉no꞉ na꞉sen, a꞉la꞉ta꞉ga꞉ fo nolo꞉ basiaki, o꞉wa꞉l ho꞉no꞉ a꞉na dia꞉sen. (Lom 11.17,24, Ya꞉m 3.12, Kala 11.4)

Sadusi kalu (Sadyusi, Sadducees) Sadusi kalu i we, Isolael kaluka꞉isale i us a꞉na wilo꞉ di kalu ko꞉lo꞉ elen. Sadusi kalu i a꞉ma꞉yo꞉ Mo꞉sa꞉sa꞉ ele difa꞉ a꞉no꞉ fanda asululiaki, mada kudu ha꞉na꞉sen. Iyo꞉ Fa꞉lisi kalu o꞉ngo꞉, ko꞉sega Fa꞉lisi o꞉lia꞉ Sadusi o꞉lia꞉yo꞉ mada alan kega꞉sen. Mo꞉wo꞉ Fa꞉lisi kalu iliyo꞉ dane ane kaluka꞉isale i a꞉no꞉ tif ami a꞉ma꞉la꞉ dasima꞉ib a꞉la꞉ tili asulo꞉, ko꞉sega Sadusi kalu iliyo꞉ a꞉la꞉bo꞉ mo꞉tili asulo꞉. Sadusi o꞉lia꞉ Fa꞉lisi kalu o꞉lia꞉ma꞉yo꞉ Ya꞉sumo꞉wo꞉ mo꞉beakiyo꞉, iyo꞉ asulo꞉wo꞉ imilise dowaki, Ya꞉su sa꞉ma꞉no꞉wo꞉ togo꞉ keda꞉len. (Madi 22.23, Ilig 23.6-8)

Sagala꞉sa꞉ga꞉lo꞉ Falawa Mosolo꞉ dowo꞉fa꞉ ma꞉no꞉ ho꞉len (Bikpela De Bilong Bret I No Gat Yis, Feast of Unleavened Bread) Donayo꞉ tambo amio꞉, Isolael kaluka꞉isaleyo꞉ Tinio꞉ Asulo꞉ ma꞉no꞉ ho꞉len a꞉no꞉ edab amio꞉, Sagala꞉sa꞉ga꞉lo꞉ Falawa Mosolo꞉ dowo꞉fa꞉ ma꞉no꞉ ho꞉leno꞉ a꞉na fa꞉la꞉dowo꞉. Ho꞉len a꞉namio꞉, iyo꞉ sagalaki kegea꞉sen. So꞉go꞉ agelo꞉ imilise us a꞉namio꞉, iliyo꞉ falawalo꞉ anayan kelego꞉wo꞉ mo꞉dia꞉taki, falawa mosowo꞉ soda꞉sa꞉ga꞉ na꞉sen. Ililo꞉ a꞉namilo꞉ kegeab a꞉no꞉ Isib hen amilo꞉ ga꞉lilo꞉ sili alifa꞉ a꞉no꞉ ko꞉lo꞉ asulaki dimida꞉sen. (Kisim 12.14-20, Madi 26.17, Luk 22.1)

Sainai (Sainai, Sinai) Sainai a꞉no꞉ hen misio꞉. Isolael kaluka꞉isaleyo꞉ Isib hen a꞉no꞉ ta꞉ta꞉ga꞉ mio꞉ a꞉namio꞉, iyo꞉ Sainai misio꞉ a꞉na fa꞉la꞉dowo꞉. Mo꞉sa꞉so꞉ Sainai misio꞉wa ha꞉na꞉sa꞉ga꞉, Godeyo꞉ a꞉na gido꞉. A꞉la꞉yo꞉ a꞉na sen amio꞉, Gode eyo꞉ ele do꞉la꞉fo꞉wo꞉ u ami sa꞉sa꞉la꞉sa꞉ga꞉, emo꞉wo꞉ a꞉na dimi. (Kisim 19-20, Gala 4.21-31)

Sa꞉da꞉na꞉ (Satan, Satan) Sa꞉da꞉na꞉ e mama mogago꞉ nol ko꞉li ko꞉lilo꞉ sab o꞉lo꞉ bo꞉fo꞉lab a꞉ma꞉ misa꞉ alano꞉ e. Sa꞉da꞉na꞉ e Gode o꞉lia꞉ kaluka꞉isale Godelo꞉ kudu ha꞉nab i o꞉lia꞉lo꞉ gis alando꞉ dia꞉labo꞉ e. Keliso kaluka꞉isaleyo꞉ mogago꞉wo꞉ dimidama꞉kiyo꞉ eyo꞉ dikida꞉lab. A꞉la꞉ta꞉ga꞉ madali tolo꞉ sa꞉lan a꞉ma꞉ iyayo꞉ e. (Luk 10.18, Yo꞉n 12.31, 2Kol 4.4, Kala 12.7-9, 20.2)

Sibilo꞉ bo꞉fo꞉lowan kalu (Wasman bilong sipsip, Shepherd) Sibilo꞉ bo꞉fo꞉lowan kalu iliyo꞉ sibi bo꞉fo꞉liki, fugus nafa o꞉lia꞉ ho꞉n nafa o꞉lia꞉ maiya꞉kiyo꞉, kalu a꞉ma꞉yo꞉ sibiyo꞉ tililia꞉ ha꞉na꞉sa꞉ga꞉yo꞉, heno꞉ nafaya ta꞉taki bo꞉fo꞉lowa꞉sen. A꞉la꞉ta꞉ga꞉ iliyo꞉ sibiyo꞉ saila gasaya꞉ sa꞉ma꞉ni yabena꞉ki bo꞉fo꞉lowan. Ya꞉sulo꞉ sa꞉la꞉li ho꞉len a꞉namio꞉ sibilo꞉ bo꞉fo꞉lowan kalu nolo꞉ amisa꞉n ha꞉la꞉ya sibi bo꞉fo꞉len ko꞉lo꞉, iyo꞉ Ya꞉sulo꞉wa ya꞉sa꞉ga꞉, e wabudaki Godemo꞉ mada o꞉m a꞉la꞉sio꞉. A꞉la꞉ta꞉ga꞉ Ya꞉su eyo꞉ e amilo꞉ tilida꞉dab kaluka꞉isaleyo꞉ sibi o꞉ngo꞉ ko꞉lo꞉ bo꞉fo꞉lowa꞉sen. (Luk 2.7-20, Yo꞉n 10.11, 1Bid 5.2)

Sodom (Sodom, Sodom) Sodom a꞉no꞉ amisa꞉n wiyo꞉ o꞉m. Lod e amisa꞉n a꞉na ha꞉na꞉sa꞉ga꞉ sen. A꞉la꞉ta꞉ga꞉ Sodom anib amilo꞉ eleno꞉ amisa꞉n nowo꞉ Gomola. Amisa꞉n a꞉la꞉ a꞉no꞉ man mogago꞉wo꞉ alan dimida꞉labiki, Gode eyo꞉ amisa꞉n a꞉no꞉ tambo yasala꞉. (Mo꞉mo꞉ 18-19, Madi 10.15, 11.23-24, Luk 17.29, Kala 11.8)

Tili wida꞉sen kalu (Disaipel, Disciple) Kaluka꞉isale abeyo꞉ kalu nowo꞉ ko꞉lo꞉ kudu ha꞉nakilo꞉ to elo꞉ widab amilo꞉ tili da꞉dab a꞉no꞉, tili wida꞉sen kaluwo꞉ i o꞉m. Ya꞉su e henfelo꞉ wena silikiyo꞉, kalu kugula꞉fo꞉ ko꞉lo꞉ da꞉fea꞉sa꞉ga꞉, i a꞉no꞉ elo꞉ tili wida꞉sen kalu a꞉la꞉sa꞉lan. Ya꞉su e Hebene a꞉ma꞉la꞉ ane a꞉namio꞉, Ya꞉su amilo꞉ tilidabu kaluka꞉isale i a꞉no꞉ tambo enedo꞉ tili wida꞉sen kaluka꞉isale a꞉la꞉sa꞉la꞉sen. A꞉ma꞉ fa꞉s amio꞉ tilidabu kaluka꞉isaleyo꞉ “Keliso” wiyo꞉ a꞉na di. (Madi 10.1-4, Ilig 11.26)

Tinio꞉ Asulo꞉ Ma꞉no꞉ ho꞉len (Bikpela De Bilong Tingim De God i larim Israel i Stap Gut, Passover) Donayo꞉ tambo amio꞉, Isolael kaluka꞉isaleyo꞉ Godeya꞉lo꞉ i asufa꞉ a꞉no꞉ asulakiyo꞉, iyo꞉ sagalaki kegea꞉sa꞉ga꞉ ma꞉no꞉wo꞉ a꞉na na꞉sen. Isolael kaluka꞉isaleyo꞉ Isibdo꞉ sen a꞉no꞉, iyo꞉ ga꞉li mesea꞉kiyo꞉, Gode eyo꞉ iyo꞉ sili alifa꞉. Iyo꞉ sili alifa꞉nikiyo꞉, Gode eyo꞉ Isiba꞉lo꞉ wa꞉la꞉b so꞉wa sa꞉la꞉li a꞉no꞉ tambo yasala꞉ma꞉nikiyo꞉, Gode eyo꞉ Isolael kaluka꞉isalemo꞉wo꞉ a꞉la꞉sio꞉, “Gio꞉ sibiyo꞉ sa꞉nda꞉sa꞉ga꞉, ho꞉bo꞉wo꞉ wasulia꞉sa꞉ga꞉yo꞉, tog amilo꞉ sowa꞉kif o꞉lia꞉ kea o꞉lia꞉ a꞉na mulula꞉bi. A꞉la꞉go꞉lalega, Godeya꞉ ene ma꞉mul kaluwo꞉ yakiyo꞉, ho꞉bo꞉wo꞉ ba꞉dalikiyo꞉, a a꞉no꞉ tinia꞉li ha꞉na꞉ib” a꞉la꞉sio꞉. A꞉la꞉dimido꞉ ko꞉lo꞉ dona tambo amio꞉, Isolael kaluka꞉isale iliyo꞉ dimido꞉ a꞉no꞉ a꞉asulakiyo꞉, ma꞉no꞉ ma꞉nikiyo꞉ a꞉na kegea꞉sen. (Kisim 12, Madi 26.2,5,17-19)

Wain ho꞉n (Wain, Wine) Wain i a꞉no꞉ me o꞉ngo꞉ ko꞉lo꞉ uwo꞉lakiyo꞉, fowo꞉ genelo꞉ helema꞉ib. Isolael kaluka꞉isale iliyo꞉ fowo꞉ tula꞉sa꞉ga꞉, u wa꞉la basia꞉sa꞉ga꞉yo꞉, ho꞉no꞉ a꞉na dia꞉sen. Ho꞉n a꞉no꞉ dia꞉fo꞉lab amio꞉, wain ho꞉no꞉ a꞉na fa꞉la꞉dowa꞉sen. Wain ho꞉n a꞉no꞉ iliyo꞉ ma꞉no꞉ o꞉lia꞉ na꞉sen. A꞉la꞉ta꞉ga꞉ wain fo nolo꞉ iliyo꞉ tula꞉sa꞉ga꞉, ofa dia꞉fo꞉la꞉ga꞉, kalaliliaba na꞉sen. (Yo꞉n 15, Madi 21.33-43)

Wit (Wit, Wheat) Isolael kaluka꞉isale iliyo꞉ wit fo a꞉no꞉ gelan. Wit fo a꞉no꞉ hedab amio꞉, iliyo꞉ gedea꞉sa꞉ga꞉, fo a꞉no꞉ kegenelia꞉ dia꞉ta꞉sen. A꞉la꞉ta꞉ga꞉ iliyo꞉ fo a꞉no꞉ u alana꞉ wa꞉la basia꞉sa꞉ga꞉yo꞉, mu fa꞉la꞉dowab amio꞉ falawa dimida꞉sen. Falawa a꞉no꞉ iliyo꞉ soda꞉sa꞉ga꞉ na꞉sen. Bali fo a꞉no꞉ wita꞉ fo o꞉leo꞉ngo꞉ dowo꞉.

Ya꞉si (Jesi, Jessi) Ya꞉siyo꞉ Da꞉ibida꞉ iyayo꞉ o꞉m. (Madi 1.5-6, Luk 3.32, Ilig 13.22, Lom 15.12)

Ya꞉su (Jisas, Jesus) Ya꞉su e Godeya꞉ ene so꞉wa. Ya꞉su wi a꞉la꞉do꞉ sa꞉lab a꞉ma꞉ ha꞉go꞉ we, eyo꞉ kaluka꞉isaleyo꞉ asuwa꞉taki gasilia꞉sen. Ya꞉suwa꞉ ene wiyo꞉ nowo꞉ we, Ya꞉su Keliso, Godeya꞉ ene So꞉wa, Kalule Dowo꞉, a꞉la꞉ta꞉ga꞉ Da꞉ibida꞉ ene e ma꞉mu.

Ya꞉su Asulo꞉ Ma꞉no꞉ (Kaikai bilong Bikpela, Communion) Keliso kaluka꞉isaleyo꞉ kegeakiyo꞉, Ya꞉su sowo꞉ a꞉no꞉ asulaki, wain ho꞉n o꞉lia꞉ falawa dowo꞉fa꞉ o꞉lia꞉yo꞉ na꞉sen. Wain ho꞉n a꞉no꞉ Ya꞉suwa꞉ ene ho꞉bo꞉wo꞉ o꞉m. A꞉la꞉ta꞉ga꞉ falawa dowo꞉fa꞉ a꞉no꞉ ene do꞉mo꞉wo꞉ o꞉m. Ya꞉su e o꞉sana soma꞉no꞉ ilikiyo꞉, enedo꞉ tiliwida꞉sen kalu o꞉lia꞉ siliki ma꞉no꞉ na꞉likiyo꞉, imo꞉wo꞉ man a꞉no꞉ ko꞉lo꞉ dimida꞉li ha꞉na꞉melea꞉ki walalifa꞉.

Yis (Yis, Yeast) Yis a꞉ma꞉yo꞉ falawayo꞉ anama꞉ki dia꞉tan. Yis ha꞉lu a꞉no꞉ falawa o꞉lia꞉ wo꞉gela꞉sa꞉ga꞉ ta꞉ta꞉b amio꞉, falawa a꞉no꞉ mada alan doma꞉ib. Ya꞉su eyo꞉ yis a꞉na bale sa꞉lakiyo꞉, kelego꞉ ha꞉lula꞉su a꞉ma꞉yo꞉ nanogo꞉ mada alan fa꞉la꞉do alifa꞉ib a꞉la꞉liki wido꞉. (Madi 13.33, 16.6,12, 1Kol 5.6-8, Gala 5.9)

Yo꞉sua (Josua, Joshua) Mo꞉sa꞉s e sowab amio꞉, Yo꞉sua e Isolael kaluka꞉isalelo꞉ tililia꞉ ha꞉na꞉no꞉ kaluwo꞉ e ko꞉lo꞉ fa꞉la꞉dowo꞉. Eyo꞉ kaluka꞉isale i a꞉no꞉ Ka꞉ina꞉n hen a꞉na tililia꞉gane. Hen a꞉no꞉ Godeya꞉lo꞉ Isolaela꞉ kaluka꞉isalemo꞉lo꞉ dimia꞉no꞉ saefa꞉yo꞉ o꞉m. Isolael kaluka꞉isaleyo꞉ hen us a꞉na tina꞉sa꞉ga꞉yo꞉, Iliyo꞉ hendo꞉ biso꞉ kalu o꞉lia꞉ buba꞉i ha꞉na꞉la꞉ga꞉ tinio꞉ ko꞉lo꞉, hen a꞉no꞉ a꞉na di. Yo꞉sua eyo꞉ hen a꞉no꞉ aloba꞉da꞉sa꞉ga꞉, Isolael so꞉lo꞉ kugula꞉fo꞉ o꞉mo꞉ heb heb a꞉la꞉dimia꞉i ane. Ko꞉sega Libai so꞉lo꞉ a꞉no꞉ so꞉mea꞉sen kalu dowo꞉ ko꞉lo꞉, hen a꞉no꞉ hebo꞉ imo꞉wo꞉ mo꞉alobana me. (Ilig 7.45, Hibu 4.8)

Yu Kaluka꞉isale (Yuda, Jew) Ablahama꞉ ene ma꞉mui ta꞉i mio꞉ i a꞉no꞉ Yu kaluka꞉isale a꞉la꞉sa꞉la꞉sen. ABLAHAM to a꞉no꞉ bo꞉ba. Tamin amio꞉, to Yu a꞉ma꞉ ha꞉go꞉ we, kaluka꞉isale Yuda hen amilo꞉ seno꞉ o꞉m. Kaluka꞉isale i a꞉no꞉, Ablahama꞉ kalu so꞉wa Yuda eya a꞉la꞉ta꞉ga꞉lo꞉ fa꞉la꞉dowo꞉wo꞉ o꞉m. Ko꞉sega tif amio꞉ Yu wi a꞉ma꞉yo꞉ Isolael kaluka꞉isale tambowo꞉ ko꞉lo꞉ da꞉feaki sio꞉. ISOLAEL to a꞉no꞉ bo꞉ba.