Aisaiya
Lainuwanega
Niga bukana ba taugiuwatana ḡemota isana Aisaiya isanemo buka ai isa bi tana 750 B.C. modomododimo Yelusalemmo i miya. Niga bukanemo giugiu yabedi faiona.
Laidalolo 1-39 ba ya giugiuweda te Asaliya dobuna ḡalibonana ḡaiḡailisina bi ena tauwaiḡaviya a moito te Islael malagaidi ai ḡaviyedi bi a lau yovoḡedi. Taugiuwatana Diuda lavedi i giuwedi te maso mote wali ḡalibona bi ena tauwaiḡaviya sima nailedi. Bi tedi maso Maimaituwa ai sumaḡe bi taunaḡa kalinana a vaiye.
Laidalolo 40-55 niga mainana i giu Babilon ḡalibonana i moito te Diuda lavedi i lau yovoḡedi bi wapewapedi i nawedi Babilonmo a miya. Diuda lavedi mba dobunemo a miyamiya bi taugiuwatana i laibagidi te Maimaituwa kaka ya munaḡa tavaitedi Yelusalem bi yawasana valivaliuna ya vitedi.
Laidalolo 56-66 ba Diuda lavedi edi tava munaḡana bi Yelusalemmo a miyamiyana i giuwata. Bi taugiuwatana, Maimaituwa ena ogatala Yelusalem, dobu, kalina, dam bi bai matabudi niga dobuna dabanemo i giuwata.
2
Nuwauba kenakena nonoḡina
1 Maimaituwa wailove Eimosi natuna Aisaiya i vite te bai ya voiye Yelusalem bi Diuda dobudimo.
2 Laḡan ya natonatona, kaka niga mainana kauwa sa tubuḡa.
Bada ena vanuwa ena animoito oyana ya tausaḡana kaka oya ḡesaudi.
Dabatuwa ya saḡa kamaḡedi bi dobu lavedi matabudi kaka ḡome sa liya tava.
3 Bi lava wapewapedi sa giuna gado,
“Ko nato bi ta saḡa ta nawa Bada ena oyamo,
Islael edi Maimaituwa ena vanuwemo.
Bi ena kauwa yai loveloveda te eta kauwaḡa ta nawa.
Bi ena waiḡake Saiyonmo sa potipotiyovo
bi Bada giuna Yelusalemḡa* Saiyon mba Yelusalem isana ḡesau banina oya Saiyon dabanemo Yelusalem malagaina a ḡala. Nigilisimo Zion. sa yovoyovo.”
4 Sauginemo dobu bi dobu sai saḡasaḡana ba Bada kaka ya kadidimanidi.
Bi lava waikagiudi kaka ya sivu kauwedi.
Edi aniwaiḡaviya ḡoneḡonedi ya voiye vitaledi te aniwadi
bi alaiya ya voiye vitaledi te kwatikwati anilaugula sa tubuḡa.
Dobu bi dobu mote simai ḡasiḡasi munaḡa,
bi wai ḡaviya aubaina mote simai ogatala.
5 Islael lavemi ko nato Bada
ena yanayanaḡa ta nawa.
*2:3: Saiyon mba Yelusalem isana ḡesau banina oya Saiyon dabanemo Yelusalem malagaina a ḡala. Nigilisimo Zion.