1  Bada ena ḡailisi lisigumo i yovo bi Aluwina i wai doli nawegu gwagwamo siliḡe tatakalidi lapudimo. 2  Bada Aluwina i wai etadoliyegu te siliḡe kaisavodiḡa mba gwagwana e nawa yaḡosi. Bi e nawanawana ba siliḡe tatakalidi wai daba kenekenedi e kita kovidi. 3  Bada i wai talaeguna gado, “Lava ota, ḡemoḡemotina mba siliḡedi saila lava munaḡa, ee?”

Bi ena giu ei munena gado, “Bada wailewapanim tam taumḡa kuna sibe.”

4  Bada i giuweguna gado, “Siliḡe tatakalidi kwa giuwedi te giugu sa vaiye. 5 Tagu kaka yawasigu lisimimo yà sako bi yà voiyemi te ko yawasana munaḡa. 6 Tagu kaka walowalo bi visiḡo yà kapatupatudi te saila tubuḡa bi kwapi yà vai te tubuḡa yài kotedi te saila lava bi mote simai dagudagu. Tagu kaka yawasigu yà bunanai nawe lisidimo te sa yawasana munaḡa. Ḡome kaka ko sibegu te tagu Bada.”

7  Bada kalinana e giugiuwe ba siliḡe a nato a kaka patupatudina, taleledi e vaiye. 8 Bi ḡome e waikita ba visiḡo siliḡe a gei sumatawidi, mulinemo kaka kwapi tubuḡa a sumatawidi. Bi mba tubuḡidi mote siwai dagudagu.

9  Bada i giuweguna gado, “Lava ota, Bada ena giuvavasaḡa luvanemo, yavala kwa giuwe te niga dobuna liuna 4 maiḡa yalau suve nato, tubuḡa pekipekidi nopodimo te sa yawasana munaḡa.” 10 Bi kota Bada ena giuvavasaḡa luvanemo e giugiu ba yawasi i sola saḡa tubuḡemo, te ai dagudagu bi a kenakena moito. Ba ḡaviya kumna ai nonokamaḡe.

11 Ḡome Maimaituwa i giuweguna gado, “Lava ota, Islael lavedi ba mai niga siliḡedi tatakalidi. Tedi a giugiuna gado, ‘Tada ba tatakalida te pekina mote aiyai imai yawasanida.’ 12 Taunana aubaina kalinagu kwa giu vitedi, Bada wailewapanina niga mainana i giu: Oo egu lava tagu kaka emi kokowaga yà laipaipailidi bi yà solu wailovotavimi. Kaka yà munaḡemina Islael doḡanemo. 13 Sauginemo egu lava kokowagemo kona kenakena ba e solu wailovotavimi te ko sibegu te tagu Bada. 14 Tagu kaka Aluwigu yà vitemi te ko yawasana munaḡa bi yà munaḡemi emi doḡa otinemo ko miya. Ḡome kaka ko sibe te tagu Bada bi bai e giugiuwapaena ba yà voiye.”