1 Mpìr-à ma kwonn hing shinnwá ma Yesu Kristi, Shìdun má ta kà fig ku mà lu pyìr-à ni bàna. 2 Awun Shìdun í zyun-à má ya yi yonki, wà ya kwonn hing shinnyí ma Yesu Kristi. Awun-à níng hi kab rìghing gbam bu pyìr, n zìg zu rìghing yi á bu pyìr zyun-à nìm má sìnn kà yi á ki níng. 3 Doka Musa kab fig gbam bu pyìr bàna, jir kai bàna mpìr bàna ma gbam-à wà kwá wib doka-à níng hi. Ama Shìdun swam bi sig wùnwá á dunyaru àràg í mpìr jíkwìnn, ku wu sig jir shinn bu pyìryí, jirà aku zìg zu yi á bu pyìryí ni. 4 A jir shinn wàníng ni, tàma-à níng yi ri sa kó kai bidìm pár àràg barà Shìdun ri zìm ayi sa ma pìkyinn ńzyun, àràg barà doka dang sig. Bu-à sa níng, í jirà tàma-à níng yi shi sig àràg barà Awun Shìdun ri zìm. Yi shi fig rag àràg barà bu-à bibaiká á pìkyinnyí ni ri zìm ayi shi níng bàna. 5 Mpìrká zyun-à ri sìnn kà pìkyinnbá á byar bu-à bibai níng, big ri sa íri bu bibai. Ama mpìrká ká ma ri zìm Awun Shìdun aku sìnn kà big abig sa bu sìsàn, mpìr káníng hi í ká zyun-à ri sa bu-à Awun Shìdun ri zìm. 6 Bu-à bibai kyab ri sìnn kà mpìr á ki, ama mpìr-à Awun Kyìkyàr ma shi sig á pìkyinnwá ni, kwá dìg yonki, pìkyinnwá má na tag tìnn. 7 Mpìr-à ma mònn sig ma bu-à bibai á pìkyinnwá ni, ku í mpìr-à ri zib Shìdun, jir kai bàna ku wib fig bu-à doka Shìdun dang sig bàna. Kwá wib sar fig bàna tìnn. 8 Mpìr-à ma mònn hing ma bu-à bibai á pìkyinnwá ni, kwá sa sar fig bu-à Shìdun ri zìm bàna.

9 Ama bigná, ning bàna ma pìkyinn-à bibai, pìkyinn ná kyàr shi nímá, jir kai bàna Awun Shìdun shi sig á pìkyinn ná ni. Mpìr-à ma bàna ma Awun Kristi á pìkyinnwá ni, mpìr-à níng hi shi fig bu Kristi bàna. 10 Wà Kristi ma shi sig á pìkyinn ná ni, Awun Shìdun má sìnn kà ning aning wìm zu ma yonki, kó barà dìrná má wu á jir shinn bu pyìr. Kristi má sa aning wìm jakàng ma yonki, jir kai bàna Shìdun sìnn sig ning, ning í mpìrká ǹsàn á pyànnwá ni. 11 Wà Awun Shìdun zyun-à gbar dù nann zu sig Yesu mà amir-à ni níng, ma shi sig á pìkyinn ná ni, í wà ku zyun-à gbar dù nann zu sig Yesu mà amir-à ni níng, kwá ya dìrná zyun-à wu sig níng yonki jir shinn Awunwá zyun-à shi sig á pìkyinn ná ni níng.

12 Yiwaimí big, á jir shinn wàníng ni, ayi sìnn kà shinnyí ma ayi sa bu ǹsàn zyun-à Shìdun ri zìm, ma wà yá sa bu-à bibai zyun-à pìkyinnyí ri zìm. 13 Wà ning ma ri sa bu-à bibaiká zyun-à kyinn ná ri zìm, kyinn-à bibai-à ning shi sig ma kàhi níng, í bu-à má gban ning. Ama wà Awun Kyìkyàr-à ning shi sig ma kàhi á pìkyinn ná ni níng, ma gban hing pìkyinn bibai-à níng, ná dìg yonki kinn kinn. 14 Mpìrká zyun-à Awun Shìdun ma shi síg nì zubá, mpìr káníng hi, í yann Shìdun. 15 Awun Kyìkyàr-à Shìdun ya sig ning níng, ku ya fíg ning jirà aning shi í fàu ma aning shàr zinn bàna, ama jirà aning shi í yanká buwá. Awun Kyìkyàr-à ning shi sig ma kàhi níng, sa síg nì í wà ning shi yann Shìdun. Wàníng í bu-à sa yi ri bar Shìdun, “Tayí, Tayí.” 16 Awun Shìdun kà sig á pìkyinnyí ni, mi ri tàg yi rag yì yann Shìdun. 17 Barà yi shi síg yann Shìdun níng, yá dìg bu ǹsàn-à ku sìnn ya sig mpìrká buwá, ma bu ǹsàn-à ku sìnn ya sig Kristi. Wà ya wa hing shwìn á shinn Kristi, Shìdun má swam yan yi ma ku ábìr-à ni.

18 A myàngmí ni, shwìn-à yi ri wa tàma-à níng, yá màg sar fig ma àsàn Shìdun, ma àjwár-à Shìdun má ya yi á pyànn níng bàna. 19 Buká Shìdun màm sig á jànn-à ni bidìm pár ri sa àtùtwài abig myàng àyúnn-à Shìdun má tìya big mpìrká zyun-à í yanká buwá. 20 Buká Shìdun màm sig níng, kàng rìghing bu átai, bàna ma yìr. Shìdun sìnn kàng síg nì àdòníng, big zìm fíg nì bàna. 21 Kó barà sa sig àdòníng, big bir sig pìkyinnbá rag àyúnn zyun buká Shìdun màm sig níng, má shi fig rag fàu bàna, má swàr fig rag bàna, má dìg gbam má shi shu shinn dìrbá àràg yann Shìdun. 22 Yi yì hing rag, hár tàma-à níng buká Shìdun màm sig ri fig àwá wàni, àràg barà uwà ma ri mà wùn, ku ri fig àwá níng. 23 Iri buká zyun-à Shìdun màm sig níng ri fíg nì àwá bàna, yi má zyun-à Shìdun ya sig yi Awun Kyìkyàrwá jirà aku tìya yi rag yi í mpìrká buwá níng, yi ri fig àwá-à hi tìnn. I bu-à sa yi ri sa àtùtwài jirà Shìdun aku sìnn kàng yi, ayi shi yanká buwá, ma aku ya yi dìr àpyú. 24 Yi sìnn sig kyinnyí á dìr Shìdun, jirà aku pinn zu yi. Ama wà ya dìg hing bu-à yi sìnn sig kyinnyí áni níng, yá shi kir fig rag á kyinnyí ni bàna, jir kai bàna yi dìg rìghing bu-à yi ri zìm. 25 Wà ya sìnn sig kyinnyí á shinn bu-à ya dìg fig ma bàna, yá tib pìkyinnyí, má shi kir jirà ayi dìg.

26 Wàníng má, Awun Shìdun ri shang yi á byarká gbamyí fòr fig bàna, jir kai bàna yi yì fig barà yá vig Shìdun áni bàna. Awun Shìdun í zyun-à má vig ya yi Shìdun ma nài jír ngbam nímá zyun-à yá dang yì sar fig bàna. 27 Shìdun zyun-à ri myàng pìkyinnyí níng yì hing bu-à Awunwá ri zìm, jir kai bàna Awun-à níng ri vig Shìdun áshinn mpìrká bu Shìdun ni. Ku ri vig bu-à Shìdun ri zìm.

28 Yi ká yi ri zìm Shìdun níng, yi yì hing rag bu-à ma dìg yi bidìm pár, Shìdun sìnn kàng bu-à hi jirà ayi dìg bu ǹsàn áni, yi ká ku bar sig yi ayi shi mpìrká buwá. 29 Mpìrká zyun-à Shìdun shig zu bab sig níng, ku sìnn kann rìghing big a kur àjirà abig shi àràg í wùnwá Yesu, jirà Yesu aku shí nì àgbam-à áyau wunzàká buwá ni. 30 Mpìrká zyun-à Shìdun sìnn kann rìg big akur níng, í ká zyun-à ku bar sig. Ká zyun-à ku bar sig níng, í ká ku sìnn sig big rag big í mpìr sìsàn á pyànnwá ni, n sìnn sig big abig shi mpìr ùwài àràg ku.

31 Bu-à yá dang á shinn jír káníng ni, í kai rà? Barà Shìdun ri zìm yi àdòníng, mpìr-à kinn sig wà kwá zib yi íni ra? 32 Shìdun dim fig yi wùnwá bàna, ku ya sig yi wùnwá jirà a wàníng wu jir shinnyí bidìm pár. Barà ku ya sig yi wùnwá níng, í barà kwá ya yi kó kai bidìm pár átai áni. 33 Shìdun ma shinnwá dang bai fig mpìrká ku shig zu sig níng bàna, mpìr-à má dang bai big í ni rà? 34 Yesu Kristi zyun-à wu sig, n dù nann zu sig mà amir-à ni ma yonki níng, shi sig mà agunn vìm nu bu Shìdun, mi ri vig ya yi Shìdun. A jir shinn wàníng ni, walai mpìr-à má dang bai yi. 35 Walai bu-à má gàfinn yi ma Kristi zyun-à ri zìm yi níng, kó fòr, kó shwìn, kó ba kìg kà yi á tonn fi, kó amor, kó ashi, kó ki. 36 Aràg barà jir Shìdun dang sig rag: