Ihayeo Mati
Ihayeo me ka Yama Hanibonemetemone Amake.
1
Teoso biti fare bati nima naka.
1 Teoso e ka iti hihiyara tohehimatamonaka, ati yoro tokanari, he ati kakamina ati me hikaminahari. 2 Hibayata ya Teoso amo ni yabokire ya era hiyaremataka, biti yosekihari. Efe yama nafi hiri nematamonaka, Teoso hiyosehari. E nafi ka Hiti tohaka waha, yama nafi Hiti toha nari, Teoso ati ehene. 3 Fare bati nima nawahaka waha. Fare bati kiti nima kiti naka. Yama nafi yosete amaka. Haha yama hiyoseha ahabarineke, kitahari.
Teoso nanarifa me aamosa rabake, Teoso biti ehene.
E ka yama hiyara soko ne manakobisa itarimatamonaka Teoso ka kanihina ka ya, neme ya. 4 Teoso ati ehene itari Teoso ino hinawatematamonaka, ino amosari. Amosi mati tohate amaka. Teoso nanarifa me ta me aamosa raba ke, ehene. Makoni ino amosi mati tohate amaka. Teoso nanarifa me ini aamosa raba ke, ino ehene. Teoso biti hinihematamonaka, he nanarifa me ta biti mera toniharahari. 5 Teoso ati e nareka ahi, hinaka yama hani ya:
"Okatao ama tike. Abi ama oke waha",
ati nareka. Ati owa e nareka ahi:
"Batiba ama oke waha. Okataoba amaka waha",
ati nareka, towisawabona hinihari. Teoso ati e neba ati yana tere amaka he nanarifa me ni ya. 6 Teoso ati ehene Teoso biti taiti wate ya Teoso ati e nematamonaka ahi:
"Owa nanarifa me nafi kasohaboneke he nokosi ya",
ati nematamonaka. 7 He nanarifa mera kamine ati e nematamonaka ahi:
"He nanarifa boni nima me nawaha, yifo hiri ni nima me nawaha narake, ati ehene",
ati nematamonaka. 8 Ati e rematamonaka ahi biti kaminari. Biti kamine ati e nematamonaka ahi:
"Teoso me yosi fawa titeraba ama tike. Me tiyoseha tiwehene amosatehaba ama tike. 9 Yama amosa tinofate ama tike. Yama hiyara tinofatera ama tike. Makoni towisawa kiti mati tohe tihawahara tike, tika Teoso ati ehene, yayai tinahabone tiwa",
ati nematamonaka biti kaminari. 10 Ati owa e nareka ahi:
"E ka Hiti yama watateri ya mata bofe ka yama nafi tikanawanemete ama tike. Neme hiri, tinehemete ama tike. 11 Wami ahaba, neme ahaba, tehaba amake. Ha tiwa ta tihabateraba ama tike. Wami ya neme famaha bototehaba amake, makari botoha nima. 12 Kini tikawatehaba amake, makari bote kini nawahi nima. Tohawahaba amake, makari akawaha nima. Tihawateraba ama tike ha tiwa. Tihabarihi titehaba ama tike",
ati nematamonaka, biti kaminari. 13 Ati owa amaka hari:
"Tiwitarehi oko kanihina ka ya. Tiwa me nofara me kitaraba me amake tiwehene, owati ihi. Tiwariabone tike me mese ya, me tai tikana tiwa",
ati nematamonaka biti ni ya. He nanarifa me ni ya ati e neba watatere amaka. 14 He nanarifa mebone mera hiri nematamonaka, me hikasomatehabani me me kakatomahabone mati.