1 Goteto wuane leane nembo toto, yamapane yene yame, nanimato Gote yuku wato, nanimana umbaini tandini okolaponga mana koo kalato atene tupa pitaka awua tepa alu, mana epene wete tupa minu atamakale. 2 Nanimato wandakali mindi andakasa wato, balana minditaka mindikipi mindi mia napema. Jia. Nanimato mana koo mindi minuto, wandakali mindi minu koya napema teke. Tene okonena, yakamato nanima towa epelewa yamapa yo atalapape.

3 Nambato yakamanga koo tene mindi epe loyale pii utupa pitaka naleyo. Jia. Nanimato yakama towa epelewa yamapa yo ateyama lo nambato yakama wamba langewa okoni. Yakama saka ateaindo, nanimapi yakama towa atu saka atamakale nembo teyama. Yakama omeaindo, nanimapi yakama towa atu oma-makale nembo teyama. 4 Kenda-pene kambua nanimanga epalane tekeko, Goteto nanimana mini epene mo pale leya-kola, namba epele andane wetete eyo. Yakamato mana epene tupa minalaini lo wayumane nembo toto, ole kambuanga nambato yakamana gene tupa laiyu lalawane.

5 Enene, wamba nanima Masetonia potopinjia okona peakaiyu lema-angi, nanima katulo oto aŋako mindi mia napema. Jia. Wandakali waka tupamane nanima towa pii yanda pua ateai-kola, kenda-pene mindipene-mindipene tupa nanimanga epea. Okone angi nanima yukuwa atema. * 2Ko 2:13 6 Wuane tekeko, mini kendawa ateyai wandakali tupana mini epene mo pale lalane Gote oko balato Taitasa nanima atemanga epeakale leane okomane nanimana mini epene mo pale laya yane.

7 Taitasa epeane okomane nanimana mini epene pale laya yane tekeko, okonemane angu jia. Wamba yakamato namba towa embowa ateaini tekeko, matili yakama mini kenda wato, yamapane peke leainipia. Yamapane peke loto, andipa yakama namba towa nembo mindiki palu atamakale nembo toto, namba andaima lakae lo nembo teyai. Yakamato wuane nembo teyama lo Taitasa lamawuato, balana mini epene mo pale laya yai-kola, bala nanima atemanga epoto, nanima langea. Langea-kola, Goteto nanimana mini epene mo pale laya yane okonena, namba epele wete eyo.

8-9 Wamba nambato yakamana pepa peyo epe lewa okomane yakamana mini mo kenda piya ewa nembo toto, nambapi mini kenda ewa. Wuane tekeko, pepa peyo epe lewa okonemane mee ole alu mindiki angu yakamana mini mo kenda piya ewa nembo toto, andipa namba mini kenda naene, epele eyo. Nambato yakamana mini mo kenda piya ewa okonena, namba epele naeyo. Jia. Matili nanima yakama ateyainga epoto, kenda-pene mindi yakama gulumane nembo toto, nambato yakamana pepa okone peyo epe lewa. Nambato wuane pewa okomane Goteto yakamana mini mo kenda piya ya-kola, yakamato yamapane peke leai. Tene okonena, namba epele eyo. * 2Ko 2:1-4

10 Yuu okona kenda-pene tupamane wandakali mindina mini mo kenda piya wato, bala ome laya alane tekeko, Goteto wandakali mindina mini mo kenda piya eya-kola, wandakali okone bala yamapane peke lalane. Yamapane peke leya-kola, Goteto wandakali okone bala molo-peke lalane. Tene okonena, wandakali mindi bala yamapane peke leando, matili balato nembo tolo-peke loto, wamba namba yamapane peke lewane okonemane kopeta pewa nembo natolo-peya. Jia. * Mt 27:3-5; Ip 12:16-17

11 Nambato yakamana pepa peyo epe lewa okomane Goteto yakamana mini mo kenda piya ya-kola, yakamato yamapane peke loto, mana epene kambua miniyama nembo talapape. Wamba akali yakama towa atu atalane okonemane mana koo wete mindi minalane lo pepa peyo epe lewa okone yakamato dii lo andoto, bala towa yataka yainipia. Koo tene mindi yakamanga yolane nembo toto, yakamato Gote ando yuku yainipia. Akali okonemane mana koo mineane okone konda yakale nembo toto, yakamato kenda-pene minditupa balanga yata yainipia. Dee, yakamato namba towa nembo mindiki palu atamakale nembo toto, namba andaima lakae lo nembo teainipia. Yakamato mana epene utupane pitaka mineaini okonemane akali okonena koo tene yane okonena mindi yakamanga pata naeya lo andawa leainipia.

12 Akali mana koo minu ateane okonena mana koo oko mo tika puyale yandopi, akali bala minu koyane oko moyoyale yandopi, piape okone-lapona mindi pukale nembo toto, nambato yakamana pepa okone peyo epe nalewa. Jia. Gotena wenonga yakamato nanima towa epelewa yamapane yo ateyai oko yakama tane andalapale nembo toto, nambato yakamana pepa okone peyo epe lewa.

13-15 Andipa yakamato nanima towa epelewa yamapane yo ateyai okone andoto, nanima mini epene palu ateyama. Wamba Taitasa bala yakama ateyainga epoyale atoto, nembo kambua tea-kola, nambato yakamana gene tupa laiyu loto, yakamato mana epene tupa minalaini lo bala lamaewa. Bala yakama ateainga epea-angi, yakamato bala yuku amawua, balato pii lola tupa watamakale nembo toto, wayu epeleya lo, bala lameainipia. Balato mangene minditupa piyapa lea-kola, yakamato pii balato leane tupa ale wato, mangene utupane peainipia. Wamba yakama pitaka-mane wuane pua, balana mini epene mo pale laya yai-kola, andipa balato yakamana mana epene utupane nembo tolo-peke loto, epele wete eya-kola, nanimapi epele wete eyama. Balato yakamana mana epene utupane nembo tolo-peke loto, yakama towa wayumane epelewa yamapane yo ateya. Wamba nanimato pii enene tupa angu yakama langema okoni. Wuane pua teke, nanimato yakamana gene tupa laiyu loto, yakamato mana epene tupa minalaini lo Taitasa lamaema-kola, nanimana pii okone enene gulea. Yakamato mana epene utupane mineai-kola, namba yala naewa.

16 Andipa namba katulo yakamanga wayumane tungi peyo atolo-peyawa ya lo nembo toto, epele wete eyo.