1 Tásiha, núti mavana­ranuhi ema Viya, nuyasea­ca­heyare ímiyanava tauri eta éhisirahi éma. Vahi ecueme­pu­rureca eta máemuna­si­rahehi, majaca­pi­ra­he­hivare. 2 (Taicha ani macahehi eta máechaji­ri­ruvahi tayehe eta Sagrada Escritura: “Nuchicha, tétavicava eta pisama­ca­re­vayare eta nuyehe te pipiaracanu. Nucatiu­cha­vi­va­neyare” macahepa. Jéhesare, puiti juca sache ticama­pu­ra­carehi eta epiara­si­ra­yarehi éma, ejaca­pa­ca­rechaha me Viya mapurare achane­hechaha. Esama­ca­rechaha puiti, taicha ema Viya mavaraha ticuchu­cu­ha­heyare eta te ícuña­yaréni taicha eta epeca­turana.)

3 Núti nuvaraha nacuija nacaecahini eta vémata­nerepi viti apóstoleana. Eta tacahe, nupami­cavahi núti tiúriyare eta nuyehe­repiana. 4 Eta tacahe, ichape eta néchapi­ravahi te nímitureca. Nímere­cavahi yátupi eta mavana­rai­ranuhi ema Viya. Ichapemuri eta nucami­chirahi eta nucata­ji­vairana, eta néchuria­sirana, étapa eta tacaje­ravana eta nítáti­ji­rí­sirava. 5 Vahi nucaina­ji­ru­vaimahi táichavene eta náestasi­ranuhi ena nánarana, náerata­si­ra­nu­hivare, tájinanéni viviure­vai­nahini. Te apana avasareana timuri­jia­ca­nuanahi taicha eta nasema­nevahi. Eta nítáti­ji­ri­si­ravahi, ichape eta tamura­cavahi eta nucaema­ta­nerahi. Camuri­hivare eta numacai­ma­si­ravahi. Camuri­hivare eta nécuava eta nupaisirana. 6 Éti ímatinuhi yátupihi eta táurivahi eta nítaresira. Ímati­nu­hivare eta nucaimi­tu­casihi mayehe ema Jesucristo. Táichavenehi eta mávahá­si­ranuhi ema Espíritu Santo, nucayehehi eta paciencia nayehe namutu, nujapa­nu­ra­hi­hivare. Yátupi­quenehi eta némuna­raivahi. 7 Nímitucahi eta yátupihi máimitu­rapiana ema Viáquenu. Éneri­chuvare ema Viya tímica­ta­canuhi tayehe eta máitupa­ji­jia­si­ravahi te tamutu eta nucame­ta­rai­ruirahi eta máechaji­ri­ruvahi, étapa eta nucatiu­chirahi eta véhiruhi. 8 Eta nupaisi­ra­paipahi, natiarihihi ena ticuna­cha­nuanahi, tiúriemanahi eta nuyehe. Natiari­hi­hivare ena tépuru­nuanahi, tíñema­hi­pivare eta nacaye­maquene eta nuyehe. Natiari­hi­hivare ena tímija­re­chanuana tépiya­hirahi. Nutupi­ru­va­hisera tamutu eta nítare­sirahi. 9 Natiari­hivare ena vahi tisuapa­nua­naimahi, taicha tépuruanahi eta apóstolenuirahi. Natiari­hi­sa­mi­va­resera ena tisuapanuana taicha tisamai­ri­ri­ca­nuanahi eta yátupirahi eta nímitu­rapiana. Tatiari­hi­hivare te tiánehipa eta népeni­ra­yaréni. Núchuca­hisera, maicha ema Viya. Natiari­hi­hivare ena téhana­canuana muraca. Váhisera máisapavaca ema Viya eta nacapa­si­ra­nui­nahini. 10 Tatiari­hi­hivare te nucati­sa­mu­revahi ichape. Nútisera nucuri­sa­mu­re­rea­cavahi tamutu sácheana. Páurenuhi eta náimairanuhi ena achaneana. Ichape­mu­ria­na­hisera ena níjara­ruanahi eta tacaima­ha­quenehi eta náchanevana. Ani, tájina nímaha­quenéna. Téhesera apana nítaresira, tétavi­cavaya eta nucaima­ha­que­neraya.

11 Nupara­pe­naveana némuna­ru­queneana, nutupi­ruvahi te nusamure eta juca nuconse­ja­ra­pianahi eyehe. 12 Vahi nuvaraha ecuimi­ja­chahini nínajiacahe eta némuna­si­rahehi. Németea­ca­hisera éti ínajia­canuhi eta émuna­si­ranuhi. 13 Éti, ecutihi nuchicha­na­ve­hé­nahini eta némuna­si­rahehi. Nuvaraha tachavahini eta émuna­si­ranuhi, esuapi­ra­nu­hi­varéni.

14 Nupara­pe­naveana, vahi ecuáva­há­cavaca nácani máehica­ra­hanahi ema Viáquenu. Étaripa te araye­na­heyare, vahi ecuveha nácani máehica­ra­hanahi. Taicha téjeca­ca­yarehi eta panere­rucana. Viti véhicanahi ema Viáquenu, tatupi­ruvahi eta vipanereru. Énasera ena máehica­ra­hanahi, tavayuacahi eta tamauri­queneana. Víti viúricahi eta tijarahi; énasera náuricahi eta timapicu. 15 Taicha víti, mávahá­ru­havihi ema Cristo. Váiparinehi vicacha­némahi ema Váinaraji. Tásiha, te viávahá­cavaca ena masuapa­ji­rai­rahana, tiápita­vai­ri­canahi eta véhisirahi ema Viáquenu. 16 Éneri­chuvare, tiávahá­ca­havipa ema Viya, émaripa ema Vicaiyaquene. Taicha ani macahehi: “Núti návahá­ca­vacaya ena téhica­nuanahi. Néchava­ca­yareva éna, taicha éna yátupi­que­neanahi nuchane­ranahi” macahepa. Eta tacahe, váhiquene táuricahini eta vicasia­pi­ra­vahini eta nayehe ena vahi machane­ra­nai­nahini ema Viya, taicha apanahi ema nasiña­rajihi. 17 Taicha acane macava­nai­ripipa ema Viya, ani macahehi: “Érajicava eta te namuri ena vahi nuchane­ranaina, machu napareacahe eta namaepe­ra­jivana éna. Tacahe, éti nujaca­pa­he­yarehi. 18 Núti yátupi­que­né­nu­yarehi Ecaiya­que­nenuhi. Éti nuchicha­na­veanahi” macahepa ema Viya máitupa­ji­ji­ha­quenehi.