1 Si‐kak si Simon Pedro ja makasolat niyay, jet sajay ya solat ko, para son si‐kayon tinodongan nen Jesucristo ja emati son si‐kato. Epateg i pamatiyo son si‐kato ja inges toy pamati mi. Tinodongan shakejo nen Cristo ta nan‐i‐inges i toka pesing so ni totoo. Jet niman ma, si‐kato may Shiyos tayon emin, ja engisedakan son si‐katejo.

Si‐kak i sakey ya apostol nen Jesucristo ja shinotokan ton mansilbi son si‐kato, isonga itnengi jon pasiya iya ikowan ko.

2 Say shawat ko son Apo Shiyos, sapay koma ta sota kaasi to tan talna ja ẃara son si‐kayo, si‐katoy ma‐shoman, ja inges to ngoy kepanka‐shomi ni amtayo maypangkep son si‐kato tan si Jesus ja Apo tayo.

3 Si Apo Shiyos, ta ebadeg i panakabalin to, in‐akan toy emin na kasapolan tayo say meẃad‐an kito ni eshiyosan na ogadi. Jet say inpasing to, inpalobos ton amta‐en tayo i maypangkep son Cristo ja emili son si‐katejo ja memati, say mayda‐kam kito shi shayaw to tan say ingesen tayoy ogadi to. 4 Aliẃen sajay bengat, no diket inkari to pay son si‐katejo ey ẃaray mepesamak alin mapteng nga pasiya tan kaskasshaaw son si‐katejo. Inkari to iyay say eg kayo ma‐edinan nonta edogit ta aramid ni toon eg emati, ta sotan i meneshal son si‐kayo jet piyan ton ingesen tayo i ogadi nen Apo Shiyos.

5 Jet no piyan jon mayto‐to‐ẃa son si‐kayo iyay, mesepol la eg kayo ma‐kep ni inpamatiyo bengat. Mesepol la dag‐en joy kabaalan jon mengshom nonta pamatiyo ni mapteng nga ogadi. Saja mapteng ngon ogadi, ma‐shoman ngo koma ni koston pannemnem. 6 Nem aliẃen sajay bengat i dag‐en jo: mesepol pay ya amta‐en jo shorog ja menosho ni bakdang jo, mengenos ni angken nganton digat, tan mengonod ni olay ni piyan nen Apo Shiyos ja dag‐en jo. 7 Mesepol pay ya meẃad‐an kayo ni olay ni semek so ni eshom, jet aliẃen sota kait jo bengat shi pamati i sesmeken jo, no diket emin na kait jon too. 8 No sajay ira day dag‐en jo ni olay ja nemnemnemen jo, sigoradon ebadeg i panpa‐no‐an ni inpangamtayo so nen Jesucristo ja Apo tayo.

9 No bilang ey ẃaray toon kowan to ey emati, nem sajay den eshiyosan na ogadi ket enshi son si‐kato, sotan na too ket malibag, eg maka‐awat ni maypangkep ni pamati, ta eg to nemnemen sota mapteng nga dingka nen Apo Shiyos son si‐kato ni inpamakaẃan to ni basol to. 10 Isonga si‐kayon a‐akik shi pamati, enshiy panshowashowa‐an jo ey pinidi shakejo nen Apo Shiyos ja manbedin ni too to, nem mesepol la dag‐en jon emin i kabaalan jon mengi‐nam ni ogadiyo nodta pinidi‐an shakejo so. Ta no sajay ya ogadin inkowan ko la ket si‐katoy dag‐en jo, ẃara kayo son Apo Shiyos ni olay ja eg kayo maysi‐jan son si‐kato ingkatod ingka. 11 Jet ipalobos to alin onsekep kayo ja mayda‐kam shi pantoshayan nen Jesucristo ja Apo tayon engisedakan son si‐katejo. Jet sajay ya pantoshayan to, enshiy to pengintegan.

12 Saja inkowan ko la, si‐katoy podnon pinatiyo nonta pilmiro, jet ingkato niman, si‐katoy joka ki‐detin ka‐on‐onori. Nem ekak met laeng ibi‐jag ja mengipinpinshowen mengikowan niyay son si‐kayo, tep piyan kon may‐enam i ogadiyo. 13 Niman na kawashak pay laeng shiya biyag, say ẃared nemnem ko, baka dibkan jo; isonga mapteng no ipinpinshowak iyay son si‐katayo. 14 Ta amtak ey say ketey ko, shanshani may timpo to, ta si‐katoy inpa‐amta nen Jesucristo ja Apo tayo son si‐kak nontan da. 15 Isonga niman na kawashak pay laeng shiya biyag, ishingan ko ni olay ya mengikowan son si‐kayo, say no ma‐enshi‐ak mala, ẃaray penginemneman jo ni olay nonta inkowan ko la.

16 Sajay ya intoro mi son si‐kayo maypangkep nonta kaskasshaaw wa indaw ali nen Jesucristo ja Apo tayo, aliẃen istoriya ja inemag ni toon edaing. Sajay ya indaw to di, etaksholan ni panakabalin nen Apo Shiyos. Sajay, amta min apostol ta inon‐an min mismoy kaskasshaaw wa itsora ni bakdang to, 17-18 nonta ẃara kamin eki‐odop son si‐kato shima shontog ga dinespagan nen Apo Shiyos. Inon‐an min mismo nonta inpanbaliw nen Apo Shiyos ja Ameto i bakdang nen Cristo. Emenenili ma nontan ja inges tos Apo Shiyos. Jet intenengan mi pay sota esel nen Apo Shiyos ja Kangeto‐an ja kowan to ey, “Sajay i Anak ko jet ensemek ko, jet si‐katoy emengi‐kan ni naka pan‐imdengi.”

19 Isonga sota inkowan ira nonta para padto nen Apo Shiyos nonta bayag da, amta tayo men pasiya ey panshindan. Jet pansigshan jo no sotan na esel ni para padto i pati‐en jo. Ta sotan i may‐eshig ey onsilew son si‐katejon ẃared dogad ja embolinget ingkatod onsabi ali sota akew wa idaw mowan ali nen Cristo. Ta si Cristo i may‐eshig ey mamowas sa talaw ja mengipa‐sas ey emankeẃa‐ẃa ma, jet si‐katoy ondawag ni nemnem jo.

20 Nem mesepol la mantanshaan kito, ta angken sipen too, eg to koma iba‐ngat i pengi‐odog to nonta esel nen Apo Shiyos ja insolat ira nonta para padto nonta bayag da. Mesepol la may‐enam nodta kostokoston olog to. 21 Ta sajay ya toro, aliẃen edapod nemnem ni too bengat, no diket si Apo Shiyos met laeng. Jet sajay, inpa‐amta to so nonta ira para padto nonta bayag da jet si‐karay engisodat, ja intorong nonta Ispirito Santo nen Apo Shiyos.