1 Nem si‐kayon a‐akik shi pamati, nonta ẃara‐ak son si‐kayo ingkato nonta indekjas takejo so, ẃara pay laeng sota sigod ja ogadiyon ngaaw. Singa a‐anak i itsora ni pamatiyo. Istay say intorok koma nontan son si‐kayo, sota maytotop shi toon kawad‐an ni Ispirito Santo, nem enshi. 2 Mesepol la nam‐ay nin i intorok tep eg jo kabaalan pay laeng sota na‐oneg ja toro. Isonga say intorok son si‐kayo nontan, arig to sota katas ja maypesoso shi nga‐nga tep eg to kabaalan na mengekmon ni apag. Jet angken niman, eg jo pay laeng kabaalan, 3 ta si‐kayo, ẃara pay laeng sota sigod ja ogadiyon ngaaw. Say ka‐asan niyay, ẃara pay laeng son si‐kayo sota apal, jet kayoka pay manbabakal. Sajay i ka‐asan to ey si‐kayo, singa inges jo ira sota toon enshiy pamati to. 4 Sota eshom kono son si‐kayo, kowan sha ey si‐kak i onoren sha, jet sota eshom, kowan sha ngo ey si Apolos i onoren sha. Jet sajay ya eg jo pan‐i‐inawatan, singa inges joy itsora ni toon eg emati.

5 Nemnem jo kari iyay. Apay sipa kami nen Apolos? Si‐kamin showa, kamika bengat emansilbi so nen Apo Jesucristo. Agpayson si‐kamiy kabol la emati‐an jo, nem say mika pandag‐a bengat, sota obda ja kowan nen Apo Jesucristo ey dag‐en mi. 6 Sajay i kay‐eshigan ni obda mi: si‐kak i singa engimoda nonta botil, jet si Apolos i singa simibog so. Nem sotan na mola, eg onba‐deg no eg peba‐deg nen Apo Shiyos. 7 Isonga sota toon engimoda, ono simibog so, aliẃen si‐karay epateg, ta si Apo Shiyos i inpaba‐deg so. 8 Sota engimoda tan simibog so, nan‐atang bengat ira, jet si Apo Shiyos, si‐katoy mengi‐kan ni sobadit shen showa, no ngantoy inpasing shen nan‐obda. 9 Jet sajay den obda min Apolos, si Apo Shiyos i mika pan‐i‐obda‐i; aliẃen kamika mandongba. Jet si‐kayoy singa payew ton inpa‐iso to son si‐kami.

Say sakey pay ya kay‐eshigan ni obda mi, singa si‐kayo i inpaitowen nen Apo Shiyos ja baley to. 10 Jet si‐kak i inpangitowen to ni tokod tep si‐kak i maka‐amten mengiroki, jet apil ngoy engitodoy. Nem sota mengitodoy, mesepol la singpeten toy pesing ton ondaga so; eg to koma ba‐ba‐ngaten. 11 Ta si‐kayo, say nay‐edetan ni pamatiyo, si Jesucristo; enshiy eshom. Si‐katoy arig nonta inkowan ko ey intowen kon tokod. Eg mebedin na mesa‐datan sotan na tokod, ta si‐kato may naytowen. 12-13 Jet sota ira toon mengitodoy niyay ya obdak, mesepol la eg sha iba‐ngat i shaka pengitosho, ta no onsabi sota timpon pengigsheng ali nen Apo Shiyos no sipay maysedakan, ma‐amta‐an ngo eshan no sipay kostoy toro to, ta singa apoy i osalen ton pemeshas to ni obda ni sakey tan sakey. Jet sota kostoy toro to, may‐eshig ey say inpangitoloy to nodta sigod ja tokod ja naytowen, balitok, ono palata, ono sota eshom ma ebanol et eg mepoolan sotan. Nem sota apil i toro to, may‐eshig ey say inpangitoloy to nodta nayshogin baley, sota kiyew, ono sota sapsap. Jet sotan, mepoolan. 14 Jet no sota obda ni sakey tan sakey ja in‐amag to nodta sigod ja intowen ko ket, mebay‐an ni kepeshas to ali shi apoy, si‐katoy ẃaray eẃaten ton konkona. 15 Nem no say obda nontan na too ket, mepoolan ni kepeshas to ali shi apoy, enshiy to kon‐oren. Maysedakan mango, nem palashan i inpasing ton engilesat nonta apoy.

16 Ngantoy intolokan jo so nonta ira apil i toro sha? Singa dinibkan jo ey si‐kayon emati, may‐eshig kayo ey Timplo nen Apo Shiyos, ta sota Ispirito Santo to, ẃara son si‐kayo. 17 Jet no sipay ondogit so nonta Timplo nen Apo Shiyos, si Apo Shiyos met laeng i onshosa so. Si‐kayo i may‐eshig so nontan na Timplo nen Apo Shiyos, jet aliẃen bolos ja kompormiy medeka nodtan.

18 No ẃara son si‐kayo i kowan to ey matekal tep ẃara son si‐katoy daing ni toon eg emati, mannemnem koma, ta naytopo sotan na nemnem. Say pesing to koma, i‐onod to ey enshiy silbi nontan na kowan to ey amta to, say ẃara et pay koma i amta‐en ton mapmapteng. 19 Ta sota kowan ni toon eg emati ey takal sha, enshiy silbi nontan son Apo Shiyos. Si‐kato sota kowan nonta naysolat nonta bayag da ey, “Sota in‐amag ni toon matekal ja solo, sotan met laeng i osalen nen Apo Shiyos ja mengna son si‐kara.” 20 Wara pay i naysolat nonta bayag da ja kowan to ey, “Si Apo Shiyos, amta toy ẃared nemnem ira nonta kowan sha ey matekal, jet sotan, enshiy silbi to son Apo Shiyos.” Kowan to. 21 Isonga enshiy en idastog ni sakey tan sakey son si‐kayo ja to ikowan ey ẃaray matekal ja inonod ton too. Enshiy pateg niyay; eg mesepol la sajay i pesing jo, ta in‐akan met nen Apo Shiyos i emin son si‐kayo. 22 Si Apolos, si‐kak, si Pedro, saja dobong, tan angken nganton banag ja onmotok shi ma‐onod alin timpo, ono sota ẃara niman, angken sota ketey jo, ono kawashayo pay laeng shiya biyag, nay‐akan na pansigshan jo. 23 Nem si‐kayo, say Apo jo, si Cristo, jet say Apo ngo nen Cristo, si Apo Shiyos.