1 अद्रमे विरुद कीयनद कट्‌ला रोमता. पया पोलु विस्वसिरिन तनगा केयतोग़. ओर ओनगा वातस्के, ओरिह्‌क दीरा वानाह वेहतोग़, वेहचि “दाय्ह्‌नन” इनजोर ओरिन कलियिस, इपिसुस सहरताहि मकिदुनिया पटटे दायलाह बोटटोग़. 2 अगा पूरा वेलियतोग़, वेलियसोर अग्डोर विस्वसिरिन, ओरा विस्वस बेर्सलाह वेल्‍लाङे पोल्‍लोङ वेहतोग़. पया अग्डाहि अकाया पटटे अतोग़.* 20:2 अकाया पटटुन युनान वने इंदुर. 3 अनजि अगा मूंड नेलाङ मतोग़. पया सुरिया पटटे दायलाह ओडातगा उदसोर मनेके यहुदिर ओन हव्कलाह अग़ ऊळिह्‌तोर इनजोर केंतोग़.† 20:3 “सुरिया पटटे ओडाताहि रेगिसि, नना अग्डाहि येरुसलेम दाकन,” इनजि पोलुना विचर मता बहे. केंतस्के “सम्दुरता अग़दुन विळ्सिस नना मकिदुनिया पटटुह्‌क अनजि बूमता अग़दुन पोयतकन” इनजि विचर कीतोग़. अस्के मकिदुनियाते नना लूकानन ओना तोळ मतन. 4 बिरिया सहरतोग़ पुरूस पेदिरतोना मग़ि सोपतरु, तिसलुनि सहरतोर अरिस्तरकुस ओसो सिकुन्‍दुस, दिरबे सहरतोर गयुस ओसो तिमोति, आसिया पटटोर तुकिकुस ओसो तुरपिमुस इच्वुर मावा संगे वातोर. 5 ओरग्डाहि बोरो बाताल कीतोर इतेके, मकिदुनियाताहि मुनेन तरोवस सहरते अनजि अगा माक केपतोर. 6 माट ओयवाङ आरिना पोल्वा आनाहि मकिदुनिया पटटा पिलिपि सहरते मतोम, पया पोल्वा मारतस्के अग्डाहि ओडातगा उदतोम. उदिसि एयुङ दियाने तरोवस सहरते एवसि माक केपतोरिन कलियतोम, पया माट वारममेंड तरोवस सहरतेन मतोम.

7 पया ऐतारम दिया किर्स्तुना मोकता सीता कीसि आरिङ तिनदलाह विस्वसिरा संगे जमा आस मतोम. अस्के पोलु इमा दिया अग्डाहि दायना मताह्‌कु ओरिह्‌क नडुमनग़्का एवनाह पोल्‍लोङ वेहचोरेन मतोग़. 8 माट जमा आस मतोम अद पोग़ोटा मदलितगा वेल्‍लाङे चिमलिङ पोतिह कीस मताह्‌कु कांका वीळिस मता. 9 पोलु पोल्‍लोङ वेहचोर मनेके अगा ओर्वोग़ युतुकुस पेदिरतोग़ पेकाल किळ्कितगा उदिस कूर्ह्‌कसोर मतोग़. कूर्ह्‌कनेके उंदिदेबा मूंड मदलिना लोताहि इळ्न अरतोग़. पया वेर रेगिस ऊळनेके ओग़ डोलिस मतोग़. 10 मति पोलु इळ्न रेगतोग़, रेगिस ओन गळ्म ओग़्ङिस ओरिन इतोग़, “बहे आयो रेयमाट! वेना जीवा वेनगान मन्ह्‌ता,” इतोग़. 11 पया ओर पोग़ोन अतोर, अनजि किर्स्तुना मोकता सीता कीसि आरिङ किळ्हचि तितोर. पया पोलु विस्वसिरा संगे पङवियनाह वळ्ह्‌कसोर मतोग़. पया अग्डाहि अतोग़. 12 अद्रमे पया ओग़ पेकाना लोतोर ओन लोन ओतोर. ओग़ जीवात मताह्‌कु ओर पका गिर्दा आतोर.

13 दायनामुने पोलु माक इद्रम इन्ज मतोग़, “मीट ओडाते मुनेह पेसिस मूसिया एरियाता असुस सहरते अनजि मन्ह्‌टु, नना इद तरोवसताहि बूमता अग़दुन पोसि अगा एवयह्‌नन, पया अग्डाहि मीवा संगे ओडातगा उदकन,” इनजोर वेहच मतोग़. अदिह्‌क माट मुनेन पेसिस ओडातगा उदतोम. 14 अद्रमे पया पोलु माक असुस सहरतगा कलियतोग़, कलियिस मावा संगे ओडातगा उदतोग़. पया माट लेसबोस तोग़दा मितुलेने सहरते एवतोम. 15 पया मावा ओडा अग्डाहि पेसता, इमा दिया कियुस इनदना तोग़दा एरे एवता, पया इमा दिया अग्डाहि सामुस इनदना तोग़दगा वने एवता, ओसो इमा दिया आसिया पटटा मिलेतुस सहरते एवतोम, अदु इपिसुस सहरता एरे मता. 16 पंटाता पोल्वातुह्‌क येरुसलेम सहरते एवयलाह पोलु कंद्रेम आंदोग़, अदिह्‌क इपिसुस सहरते रोमतेक अचोन इदे आसिया पटटगा पका आल्सेम आयग़ा इनजि, “इपिसुस सहरतुन एग़िस दायनद ओडा पोयतकन,” इनजोर मुने विचर कीस मतोग़.

17 पया इपिसुस सहरतोर विस्वसिराङ मुक्यालोरिह्‌क “मीट मिलेतुस सहरते वासि नाक कलियाट,” इनजोर कबुर लोहतोग़.‡ 20:17 इपिसुस सहर मिलेतुस सहरताहि जोक-जोक पनास किलोमिटर जेक मता. 18 ओर वातस्के ओरिन इद्रम इतोग़, “नना मुने आसिया पटटे वासि, इग्डाह पेसिस अनाह्‌जोम मीवा संगे बेद्रम मतन इनजोर मीट पुतिरे. 19 यहुदिर नाक हव्कलाह कोहन्दुर, अस्के नाक पका तिपल वाता. मति नना उड्‌ला बुदते ताकसोरे, कनिर पोहचोरे येसुना सेवा कीसोर मतन. 20 नना रेयवालेवा मीवा पाय्दाताङ पोल्‍लोन बेविने मीक वेहतलाह तपोन. लोकुरा मुनेह काग़्हतन, ओसो लोह्‌क-लोह्‌क अनजि वने काग़्हतन इनजोर मीट पुतिर. 21 पापमता अग़दाहि जर मलसि, देवुळता पोल्‍लो केंजिसि, मावा येसुसामिन विस्वस कीयना इनजोर यहुदिरिह्‌क ओसो युनानिरिह्‌क वेहतन.

22 “इंजेके देवुळता जीवा नाक येरुसलेम ओयलाह आता. अगा नाक बाताल आयग़ इनजोर पुनोन. 23 मति इचोन पुतन, ‘मन्कलोर नीक तिपल कीयनुर ओसो जेलते वाटनुर’ इनजोर नना तिरियनव सबे सहर्कने देवुळता जीवा नाक मुनेन वेहचोरेन मन्ह्‌ता. 24 मति हातेकाय, पिसतेकाय, नावा जीवाता नना पर्वा केवोन. ‘देवुळता दयाता कबुरतुन पोकुर कीम,’ इनजोर येसुसामि नाक ईतद सेवातुन मारिह कीयनद, इदे नाक बेसु.

25 “इंजेके नावा पोल्‍लोतुन केंजाट, देवुळि मन्कलोरगा राजेम कीयनद पोल्‍लोतुन पोकुर कीसोर नना मियगा तिरियसोर मतन. मति इंजेटाहि मीट इपिसुसतोरिर नावा मोकमतुन बेस्केन ऊळविर आयकिर इनजोर पुतन. 26-27 देवुळि मियेनाह्‌क तासिस मतद बेदे पोल्‍लोतुन वेहवालेवा मकिह केवोन, पूराय वेहतन. अदिनेनाह्‌क नेंड मीकु बेस वेहतलाह वातन, मियग्डाह बोग़ाय देवुळता अग़दाहि लेसतेके, ताना जबब्दर नना आयोन. 28 ओसो आपुना अहे मियग्डोर विस्वसिरा मुडा बेस राका कीसोर मन्ह्‌टु, बह इतेके ओरा मुक्यालोर आयना इनजि देवुळता जीवाये मीक निल्पिह कीता. देवुळि तना मग़ना नेतुरता कर्सा कीसि ओरिन असता, इदिन सीताते तासाटु. अदिह्‌क मीवा नडुम मनदनदु देवुळता गोह्‌डटुन गोलालोरा लेह्‌का मनजि ओरिन बेस ऊळाटु. 29 नना अतस्के, लोळ्ङस्क एर्रेन पोस ओयना लेह्‌का जोल काग़्हवालोर मियगा वायनुर, इनजोर नना पुतन. ओर विस्वसिरिन विळ्सोर आयनुर. 30 ओसो मीवाय विस्वसिरग्डाहि उय्तुर बाताल कीयनुर, विस्वसिरिन तमेह ओयलाह देवुळता सेतेम पोल्‍लोतुन मिळ्हच-मिळ्हच काग़्हतनुर, इनजोर नना पुतन. 31 अदिह्‌क उसरते मन्ह्‌टु, नना मूंड वर्साङ मीकु नग़्का-पिळ्विळ पियल-पोळ्दु, वग़ोग़-वग़ोग़ मन्कन कनिर पोहच बुद काग़्हचोर मतदिन सीताते तासाटु.

32 “इंजेके नना मीकु देवुळता कयदे विळ्सिस ईय्ह्‌नन. ताना दयाता पोल्‍लोतुन सीता कीसोर मन्ह्‌टु, अद्रम सीता कीतेके, अद मीवा विस्वसतुन बेर्सिह कीसोर दायग़ा. ओसो बेद बर्कत देवुळि तना पवित्र लोकुरेनाह्‌क तासतद मन्ह्‌ता, अद बर्कत मीक दोर्कग़ा. 33 ओसो नना बोनाङ वेंडिङ, सोनोङ, गेंदेना बेस्केन लालुस केवोन. 34 इव नावाङ कय्किन ऊळाट, इवे कय्कने कबळ कीसि, नावा ओसो नावा तोळतोर मन्कलोरा पिसवग़ आता, इदिन मीट पुतिरे. 35 इद्रम एपुर पेसनाह कबळ कीसि, कबळ कीया पग़वोरिन ओंडे कीयनदु इनजोर नना नावाङ सबे कबस्कने कीस तोहतन. अह कीनेके येसुसामि कुदि वेहतद इद पोल्‍लोतुन सीता कीम्ह्‌टु, ‘दुस्रोनग्डाहि एतनदिह्‌काय, ओन्क ईतेकेने एक्वा गिर्दा वास्ता,’ ” इनजोर इतोग़.

36 इव पोल्‍लोङ वेहचि, मिंडाङ कोटिस ओरा संगे पार्तना कीतोग़. 37-38 पया “इंजेके नावा मोकमतुन बेस्केन ऊळविर आयकिर,” इनजोर पोलु वेहतद पोल्‍लोतुन सीता कीस ओर मुक्यालोर पका अळतोर. अळसोरे, ओरु पोलुन गळ्म ओग़्ङिस लोंडटोर. ताना पया ओर ओन ओडातगा एवनाह ओसीतोर.