Nahum
Talk Fo God
1
Da One In Charge Stay Huhu
Wit Da Nineveh Peopo
Wit Da Nineveh Peopo
(Rome 10:15; Efesus 6:15)
1 ✡ 1:1: Isa 10:5-34; 14:24-27; Zef 2:13-15Da One In Charge show Nahum from Elkosh town someting jalike one dream, bout wat goin happen to da Assyria peopo dat live Nineveh town.
2 Da One In Charge, da Boss,
He one jealous God.
He no like fo peopo pray to odda gods.
He pay back peopo fo wat dey do.
He stay real huhu.
Fo shua, he pay back da peopo dat stay agains him.
He had it wit wat da peopo do dat go agains him.
3 Da One In Charge no get huhu real fas.
He get plenny powa.
He erytime punish da peopo dat get da blame.
He show his powa inside da tornado an da storm.
Da clouds, jalike da dus his feets kick up.
4 He can talk strong to da ocean, an make um come dry.
He make all da rivas come dry.
Da green grass all ova Bashan an Carmel come no good too.
Da flowas inside Lebanon come no good an mahke.
5 Da mountains shake cuz a him,
Jalike da hills melt.
Da groun shake in front him.
Erybody dat live on top da earth, dey shake too.
6 Wen Da One In Charge stay real huhu,
No mo nobody can stan in front him.
Wen he mad, jalike he throw fire on top you.
Jalike da cliffs come broke up cuz a him.
7 Da One In Charge, he good!
He jalike one place fo hide wen get trouble.
He take kea da peopo dat trus him.
8 But he goin wipe out da Nineveh peopo,
Jalike wen one big flood come.
He goin chase da peopo dat stay agains him,
An make dem run inside one dark place.
9 Wateva you Nineveh guys figga fo do
Agains Da One In Charge,
Dass da end.
Dat trouble no goin happen one mo time.
10 Jalike he goin make dem come
All jam up inside da thorn bushes.
Dey goin come piloot from drink dea wine.
Dey goin come burn up jalike da dry junks from da wheat.
11 One guy come from Nineveh,
He make one plan fo do bad kine stuff
Agains Da One In Charge.
He tell peopo az good fo dem
Do real pilau kine stuff.
12 Dis wat Da One In Charge tell:
“No matta da Assyria guys plenny peopo
An get plenny frenz,
I goin cut um down.
No matta I wen punish you Judah peopo,
I no goin do dat one mo time.
13 Now, jalike I goin broke da Assyria yoke from on top yoa neck,
An jalike I goin pull off da straps dat tie you to da yoke.”
14 Da One In Charge tell wat fo do bout you Nineveh peopo:
“You guys no goin get kids fo carry yoa name!
I goin wipe out da idol kine god statues
Dat you guys cut from wood an stone,
An da kine gods you guys melt from metal,
Dat stay inside da temples fo yoa gods.
I goin make yoa graves ready,
Cuz you guys stay do stuff dass good fo notting!”
15 ✡ 1:15: Isa 52:7Look ova dea on top da mountains!
One guy stay come,
Dat bring good kine stuff fo tell.
He tell dat da peopo can res an no fight!
You Judah peopo, make yoa spesho religious ceremonies now.
Do wat you wen make one strong promise fo do.
Da no good kine guys no goin attack you guys no moa!
Dey goin come all wipe out!